Kuvhululelwa 5:1-14
5 Ndzi no wona a bhuku gi nga tsalilwe seno ni seno* na gi hi canjeni ga cinene ga Loyi a tshamileko citshan’wini ca wuhosi, na gi lemilwe zvi tiya hi 7 wa zvifungo.*
2 Makunu ndzi no wona a ngilozi ya ntamu na yi huwelela hi gezu ga hombe, yiku: “Himani a ringanelwako hi ku vhulula a bhuku ni ku namula a zvifungo zva gona ke?”
3 Kanilezvi ku wa nga hi na munhu le tilweni kutani laha misaveni, hambu lahasi ka misava a nga zvi kota ku vhulula a bhuku kutani ku wona lezvi zvi nga tsalilwe ka gona.
4 Ndzi no rila nguvhu hakuva ku wa nga hi na munhu a nga ringanelwa hi ku vhulula a bhuku kutani ku wona lezvi zvi nga tsalilwe ka gona.
5 Kanilezvi a gin’we ga madhota gi te ngalo ka mina: “Miyela ku rila. A Nghala ya lixaka la ka Judha, a mutsu wa Dhavhidha, yi hlulile kasi yi vhulula a bhuku ni ku namula a 7 wa zvifungo* zva gona.”
6 Ndzi no wona a yivhana na yi yimile cikari* ka citshamu ca wuhosi, ni cikari ka mune wa zvivangwa zvi hanyako, ni cikari ka madhota, na yi ku khwatsi yi delwe. Yi wa hi ni 7 wa timhondzo ni 7 wa matihlo — a matihlo lawa ma yimela a 7 wa mimoya ya Nungungulu leyi yi rumelweko misaveni yontlhe.
7 Zvalezvo a Yivhana yi no tshinela yi teka a bhuku canjeni ga cinene ga Loyi a nga tshamile citshan’wini ca wuhosi.
8 A cikhati leci yi nga teka bhuku, a mune wa zvivangwa zvi hanyako, ni 24 wa madhota va nowa lahasi mahlweni ka Yivhana. A mun’we ni mun’wani wabye i wa hi ni citende ni ngelo wa ouro wu nga tele hi libani. (A libani li yimela a mikhongelo ya vobasa.)
9 Va wa yimbelela a lisimu liswa, vaku: “Wena wa ringanelwa hi ku teka a bhuku u namula a zvifungo* zva gona, hakuva u wa delwe niku hi nkhata wa wena u xavile vanhu va tixaka tontlhe, ni tirimi, ni matiko kasi va lumba Nungungulu,
10 u va yimisa a kuva mufumo ni vapristi va Nungungulu wa hina, niku va ta fumela misava.”
11 Ndzi no cuwuka, ndzizwa magezu ya tingilozi to tala ti nga randzele a citshamu ca wuhosi, ni zvivangwa zvi hanyako, ni madhota. Ti wa tele nguvhu, ti wa hi ta tsandza-vahlayi.*
12 Ti wa banguleka hi gezu ga hombe, tiku: “A Yivhana leyi yi nga delwe ya ringanelwa hi ku amukela ntamu, ni titshomba, ni wutlhari, ni wukulu, ni wudzundzo, ni wudhumo, ni makatekwa.”
13 Ndzi nozwa a zvivangwa zvontlhe zva le tilweni, ni zva laha misaveni, ni zva lahasi ka misava, ni zva le bimbini, ni zvontlhe zvi nga ka zvona, zviku: “A makatekwa ni wudzundzo ni wudhumo ni ntamu a zvive ka Loyi a tshamileko citshan’wini ca wuhosi ni ka Yivhana kala kupindzuka ni kupindzuka.”
14 A mune wa zvivangwa zvi hanyako zvi te ngalo: “Amen!” ni madhota ma nowa lahasi ma khozela Nungungulu.
Mitlhamuselo ya lahasi
^ Hi kukongoma: “gi nga tsalilwe ndzeni ni lahandle”.
^ Kutani: “selos”.
^ Kutani: “selos”.
^ Kutani: “cikari na cikari”.
^ Kutani: “selos”.
^ Kutani: “makume ya makume ya mazana ma wuyetilweko hi makume ya makume ya mazana”.
