Kuvhululelwa 7:1-17
7 Andzhako ka lezvo, ndzi no wona a mune wa tingilozi na ti yimile ka mune wa matlhelo ya misava, na ti khometele a mune wa mimoya ya misava zvi tiya, kasi ku ngabi moya laha misaveni, kutani bimbini, hambu ni ka sinya yin’we.
2 Ndzi no wona a ngilozi yin’wani na yi huma hi le mutsuwuka-gambo na yi hi ni cifungo* ca Nungungulu a hanyako. Yi no banguleka hi gezu ga hombe yi byela a mune wa tingilozi leti ti nga nyikilwe a ntamu wa ku wonha a misava ni bimbi,
3 yiku: “Mu nga wonhi misava kutani bimbi hambu ni tisinya, kala hi mbheta ku vekela zvifungo* zvikandzeni* zva malandza ya Nungungulu wa hina.”
4 Ndzi nozwa a ntsengo wa lava va fungilweko,* va wa hi 144 000 va fungilweko na va huma ka tixaka tontlhe ta vana va ka Izrayeli:
5 Ka lixaka la ka Judha i 12 000 va fungilweko;*ka lixaka la ka Rubheni i 12 000;ka lixaka la ka Gadhi i 12 000;
6 ka lixaka la ka Axeri i 12 000;ka lixaka la ka Naftali i 12 000;ka lixaka la ka Manase i 12 000;
7 ka lixaka la ka Simeyoni i 12 000;ka lixaka la ka Levhi i 12 000;ka lixaka la ka Isakari i 12 000;
8 ka lixaka la ka Zebhuloni i 12 000;ka lixaka la ka Josefa i 12 000;ka lixaka la ka Bhenjamini i 12 000 va fungilweko.*
9 Andzhako ka lezvo, ndzi no cuwuka ndzi wona a citshungu ca hombe ca tsandza-vahlayi, ci humako ka wontlhe matiko, ni tixaka, ni mifumo, ni tirimi, na ci yimile mahlweni ka citshamu ca wuhosi ni mahlweni ka Yivhana. Va wa bohile a tinguwo to basa ta kuleha, na va hi ni micindzu mandleni yabye.
10 Va no banguleka hi gezu ga hombe, vaku: “A kuhanyiswa ka hina kuta hi ka Nungungulu wa hina, loyi a tshamileko citshan’wini ca wuhosi, ni ka Yivhana.”
11 A tingilozi tontlhe ti wa yimile ti randzela a citshamu ca wuhosi, ni madhota, ni mune wa zvivangwa zvi hanyako. Ti nowa lahasi hi tinghohe mahlweni ka citshamu ca wuhosi, ti khozela Nungungulu,
12 tiku: “Amen! A wudzundzo, ni kungangamela, ni wutlhari, ni kubonga, ni wudhumo, ni ntamu, ni wukulu, a zvive ka Nungungulu wa hina kala kupindzuka ni kupindzuka. Amen.”
13 A gin’we ga madhota gi no ndzi wutisa, giku: “Kasi hi vamani lava va bohileko a tinguwo leti to basa ta kuleha, kona vata hi kwihi?”
14 Ndzi no tekela ku gi hlamula, ndziku: “Hosi yanga, hi wena u zvi tivako.” Giku ka mina: “Lava hi lava va humako kuxanisekeni ka hombe. Va hlazvile a tinguwo tabye ta kuleha, va ti basisa nkhateni wa Yivhana.
15 Hikwalaho, va yimile mahlweni ka citshamu ca wuhosi ca Nungungulu, va mu tirela mumu ni wusiku tempeleni yakwe; Loyi a tshamileko citshan’wini ca wuhosi i ta gwimba a tenda gakwe hehla kabye.
16 Va nga ta hazwa ndlala ne tora, va nga ta ha tlahuliwa kambe hi gambo hambu hi kuhisa,
17 hakuva a Yivhana, leyi yi nga cikari* ka citshamu ca wuhosi, yi ta va risa, yi va yisa zvibukeni zva mati ya wutomi. Nungungulu i ta kulula mihloti yontlhe matihlweni yabye.”
Mitlhamuselo ya lahasi
^ Kutani: “co markara hi cona”.
^ Kutani: “timarka”.
^ Kutani: “zvimombyeni”.
^ Kutani: “va markarilweko”.
^ Kutani: “va markarilweko”.
^ Kutani: “va markarilweko”.
^ Kutani: “cikari na cikari”.
