Kuvhululelwa 8:1-13
8 Laha yi nga namula a cifungo* ca wu 7, ku no miyelwa ku ku zwe le tilweni hi cipimo ca khihlanya ga hora.
2 Ndzi no wona a 7 wa tingilozi leti ti yimako mahlweni ka Nungungulu na ti nyikiwa a 7 wa mimpundzu.
3 Ku nota a ngilozi yin’wani yi ta yima laha alatini na yi hi ni cibya ca ouro co hisela kona libani. Yi no nyikiwa a libani lo tala nguvhu lezvaku yi li nyikela zvin’we ni mikhongelo ya vobasa vontlhe ka alati ga ouro gi nga hi mahlweni ka citshamu ca wuhosi.
4 A musi wa libani leli li nga hi canjeni ga ngilozi wu no tuvikela mahlweni ka Nungungulu zvin’we ni mikhongelo ya vobasa.
5 Zvalezvo a ngilozi yi no teka cibya co hisela kona libani yi ci tata hi ndzilo wa laha alatini, yi ci hoxa misaveni. Ku no zwala kudzindza ni magezu, kuba zvingwalangwandla ku tlhela kuva ni kutsekatseka ka misava.
6 A 7 wa tingilozi ti nga hi ni 7 wa mimpundzu ti no ti longisela kuba mimpundzu.
7 Leyi yo sangula yi noba a mpundzu wa yona. Ku nova ni maralala ni ndzilo wu nga patsene ni nkhata, zvi hoxiwa misaveni; hikwalaho, ku noswa cipandze ca wunharu ca misava, kuswa ni cipandze ca wunharu ca tisinya, kuswa ni byanyi gontlhe go nyuka.
8 A ngilozi ya wumbiri yi noba a mpundzu wa yona. Ku no woneka nchumu wo fana ni citsunga ca hombe ci vhurako ndzilo, wu hoxiwa bimbini. A cipandze ca wunharu ca bimbi ci no cica ci maha nkhata;
9 ni cipandze ca wunharu ca zvivangwa zvi hanyako zva lomu bimbini zvi nofa; ni cipandze ca wunharu ca zvitimela* zvi no pandzekela zvi mbomba.
10 A ngilozi ya wunharu yi noba a mpundzu wa yona. Ku nowa nyeleti ya hombe hi le tilweni yi nga vhurisa ku khwatsi cihlahle,* yi wela cipandze ca wunharu ca micongo ni zvibuka zva mati.
11 A vito ga nyeleti leyo hi Kubava.* A cipandze ca wunharu ca mati ci no cica ci bava, a vanhu vo tala vafa hi kota ya mati lawo hakuva ma wa cicile ma bava.
12 A ngilozi ya wumune yi noba a mpundzu wa yona. Ku no biwa a cipandze ca wunharu ca gambo ni cipandze ca wunharu ca hweti, ni cipandze ca wunharu ca tinyeleti, kasi a cipandze ca wunharu ca zvona civa munyama ni lezvaku a cipandze ca wunharu ca siku ci ngavi na kuwonekela, a wusiku gonawu zvi mahisa zvalezvo.
13 Ndzi no wona ndzi tlhela ndzizwa a gama gi nga kari gi puruma cikari ka tilo, na gi wula hi gezu ga hombe, giku: “Khombo, khombo, khombo ka lava va akileko misaveni hi kota ya kuvhuma ka mimpundzu ya tingilozi tinharu leti ti lavako kuba a mimpundzu ya tona!”
Mitlhamuselo ya lahasi
^ Kutani: “selo”.
^ Kutani: “mapaketi; tinavhiyo”.
^ Kutani: “i kandiya”.
^ Ku wuliwa a sinya yo kari yo bava nguvhu, na yi hi vhenene.
