Luka 10:1-42
10 Andzhako ka zvilo lezvi, a Hosi yi no yimisa van’wani va 70 yi va ruma hi vambiri vambiri mahlweni ka yona vaya ka madhoropa wontlhe ni matshamu lawa yi nga lava kuya ka wona.
2 Yiku kabye: “A ntiro wa kutshovela wa hombe, kanilezvi a vatiri va tsongwani. Hikwalaho, kombelani a N’winyi wa ntiro lezvaku a rumela vatiri kutshoveleni kakwe.
3 Makunu fambani! Ndza mu ruma kota tiyivhu cikari ka mahlolwa.*
4 Mu nga teki cipachi ca mali kutani pasta ya zvakuga hambu zvilato,* ne mu nga losi munhu* lomu ndleleni.
5 Ni ka wihi muti mu nghenako, a ku ranga muku: ‘A kurula a kuve ka muti lowu.’
6 Loku ku hi ni munhu ka muti lowo a randzako kurula, a kurula ka n’wina ku ta tshama kakwe. Kanilezvi loku a nga hi kona, a kurula ku ta tlhela ka n’wina.
7 Tshamani mutini lowo, muga ni kunwa lezvi va mu nyikako, hakuva a mutiri i fanelwe hi hakhelo yakwe. Mu nga tshami hi ku rurarura.
8 “Ni ka gihi dhoropa mu to nghena va mu amukela, ganani lezvi zvi vekiwako mahlweni ka n’wina,
9 mu hanyisa vababyi va nga ka gona, mu va byela muku: ‘A Mufumo wa Nungungulu wu tshinele ka n’wina.’
10 Kanilezvi ni ka gihi dhoropa mu to nghena va nga mu amukeli, humani muya maruweni ya gona mu yaku:
11 ‘Ha phuhuna hambu ni lithuri la dhoropa legi li namareleko mikondzweni ya hina kota wukustumunyu ka n’wina. Hambulezvo, zvi tiveni lezvaku a Mufumo wa Nungungulu wu tshinele.’
12 Ndza mu byela ndziku: Hi siku lego a kutsayiswa ka dhoropa lego ku ta hundza loku ka Sodhoma.
13 “Khombo ka wena Korazini na wena Bhetsaidha! Hakuva loku a zvihlamaliso lezvi zvi mahilweko ka n’wina zvi wa no mahiwa le Tire ni le Sidhoni na va ti solile kale nguvhu, va boha tisakwa va tshama khumeni.
14 Hizvalezvo, a kutsayiswa ka n’wina ku ta hundza loku ka Tire ni Sidhoni.
15 Wena Kapernawume, u alakanya ku u ta tlakuselwa tilweni? Kokwihi! Uya Cilahleni!*
16 “Ni wihi loyi a mu ingiselako i ingisela na mina. Ni wihi loyi a mu alako i ala na minawu. Ni loyi a ndzi alako i ala ni Loyi a ndzi rumileko.”
17 Lava va 70 va no wuya hi kutsaka va taku: “Hosi, hambu ni madhimoni ma hi ingisa hi lezvi hi tirisako vito ga wena.”
18 Laha a ngazwa lezvo i te ngalo kabye: “Ndzi wona Sathani na a wile hi le tilweni a ku khwatsi cingwalangwandla.
19 Ndzi mu nyikile ntamu wa ku kandzihela tinyoka ni tihume ni ku hlula ntamu wontlhe wa nala, ci hava ci to mu bayisa.
20 Hambulezvo mu nga tsaki hi lezvi a madhimoni ma mu ingisako, kanilezvi tsakani hi lezvi a mavito ya n’wina ma tsalilweko matilweni.”
21 Ka cikhati caleco i no tsaka nguvhu hi kota ya moya wo basa aku ngalo: “Ndza ku dhumisa Papayi mahlweni ka vanhu, wena Hosi ya tilo ni misava hakuva u fihlile a timhaka leti ka vatlharihileko ni ka lava va gondzileko nguvhu, u ti tivekisa ka lava va ti koramisako a ku fana ni vanana. Ina Papayi, hakuva loko hi kona kurandza ka wena.
22 Papayi i ndzi nyikile zvilo zvontlhe. A ku na munhu a mu tivako N’wana lezvaku himani saseka Papayi. Ne a nga kona a mu tivako Papayi lezvaku himani saseka N’wana, ni lava a N’wana a xuvako ku va gondzisa hi Papayi wakwe.”
23 Andzhako ka lezvo i no wulawula ni vapizani vakwe na va hi voce aku: “Ma katekile a matihlo lawa ma wonako lezvi n’wina mu zvi wonako.
24 Hakuva ndza mu byela ndziku: A vaphrofeti vo tala ni tihosi va wa xuva ku wona lezvi n’wina mu zvi wonako kanilezvi a va zvi wonangi, ni kuzwa lezvi n’wina mu zvi zwako kanilezvi a va zvi zwangi.”
25 A wanuna wo kari a nga hi mugondzisi wa Nayo i no suka a yima kasi ku mu ringa aku: “Mugondzisi, zvini ndzi faneleko ku maha kasi ndziga tshomba ya wutomi ga pindzukelwa?”
26 Jesu aku kakwe: “Zvini zvi tsalilweko Nayweni? U gondza yini ka wona?”
27 I no mu hlamula aku: “‘Randza Jehovha Nungungulu wa wena hi mbilu ya wena yontlhe, ni muhefemulo* wa wena wontlhe, ni ntamu wa wena wontlhe, ni kupima ka wena kontlhe’, u ‘randza ni muakelani wa wena a ku fana ni lezvi u ti randzisako zvona’.”
28 Jesu aku kakwe: “U hlamulile khwatsi. Simama ku maha zvilo lezvi u ta kuma wutomi.”
29 Kanilezvi na a lava ku ti maha wa kululama, i te ngalo ka Jesu: “Himani khwatsi-khwatsi a muakelani wa mina?”
30 Jesu i no hlamula aku: “A wanuna wo kari i wa kari a relela hi Jerusalema aya Jeriko. Makunu i no tlhangana ni zvigevenga zvi mu tlhatlhela tinguwo, zvi muba, zvi mu siya na a hi kusuhani ni kufa.
31 Lezvo zvi no kotlana na ku relela mupristi hi ndlela leyo, kanilezvi a cikhati leci a nga mu wona i no mu potsa a ti fambela.
32 Ku nota muLevhi; yenawu a cikhati leci a nga chikela a mu wona, i no mu potsa a ti fambela.
33 Kanilezvi a muSamariya wo kari a nga kari a endza hi ndlela leyo, i no chikela ka wutshamu lego, laha a nga mu wona i no mu zwela wusiwana.
34 Hikwalaho i no mu tshinelela a mu chela mafura ni vhinyo lomu ka zvilondza, a mu bhandicha. Andzhako ka lezvo i no mu khileta laha ka cifuyo cakwe a famba naye ndlwini yo amukela vapfhumba a ya mu hlayisa.
35 Hi mandziko wa kona i no humesa tidhenaryo* timbiri a nyika muhlayisi wa yindlu aku: ‘Sala u mu hlayisa. Zvontlhe lezvi u to zvi tirisa zvo hundza mali leyi, ndzi ta ku hakhela a cikhati leci ndzi to wuya.’
36 U alakanya ku hi wihi cikari ka lava va vanharu a ti mahileko muakelani wa wanuna loyi a nga tlhangana ni zvigevenga?”
37 Aku: “Hi loyi a nga mu mahela wuxinji.” Jesu aku kakwe: “Famba u ya mahawu zvalezvo.”
38 Laha va nga kari va famba, Jesu i no nghena ka cidhoropana co kari. A wasati wo kari a vitaniwako ku hi Marta i no mu amukela mutini wakwe.
39 Marta i wa hi ni makabye a vitaniwako ku hi Mariya, loyi a nga tshama mikondzweni ya Hosi a ingisela lezvi yi nga kari yi wula.*
40 Kanilezvi Marta i wa khomekile hi mitiro yo tala. Hikwalaho i nota ka Jesu a taku: “Hosi a wu na mhaka ni lezvi a makabye wa mina a ndzi tsikako ndzi tira ndzoce? Mu byele a ta ndzi vhuna.”
41 A Hosi yi no mu hlamula yiku: “Marta, Marta, u karateka ni ku vilela hi zvotala.
42 Phela zvilo zvi tsongwani zvi lavekako, kutani cin’we basi. Mariya i hlawulile ciavelo ca ci nene,* leci a to kala ku tekelwa hi munhu.”
Mitlhamuselo ya lahasi
^ Kutani: “lobos”.
^ Hi kukongoma: “masandalya”.
^ Kutani: “losi munhu hi ku mu bharasara”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Hi kukongoma: “mhaka yakwe”.
^ Kutani: “ciavelo ca ci nene a ku hundza zvontlhe”.
