Luka 12:1-59
-
A livrina ya vaFarisi (1-3)
-
Chavani Nungungulu, mu nga chavi vanhu (4-7)
-
Loyi a vhumelako lezvaku mupizani wa Jesu (8-12)
-
Mufananiso wa wanuna wo ganya na a hi cipumbu (13-21)
-
Tsikani ku karateka (22-34)
-
Ntlhambi wutsongwani (32)
-
-
Rindzelani (35-40)
-
Nandza go tsumbeka ni nandza go kala ku tsumbeka (41-48)
-
A ndzi nehi kurula, kanilezvi ndzi neha kuhambana (49-53)
-
Tivani ku hlola zvikhati (54-56)
-
Ndlela yo lulamisa timhaka (57-59)
12 Ka cikhatana caleco, laha a citshungu ca makume ya mazana yo tala ci nga hlengeletene laha ka kuza ci kandzihelana, Jesu i no sangula ku wulawula ka vapizani vakwe, aku: “Ti woneleni ka livrina ya vaFarisi — ku nga wukanganyisi.
2 Hakuva a ku na nchumu wu fihlilweko wu to kala ku wonekeliswa, ne hambu cihundla ci to kala ku tiviwa.
3 Hikwalaho, ni cihi leci mu wulako munyameni ci ta zwiwa kuwonekeleni, ni lezvi mu hlevako na mu hi lomu tikwarutwini zvi ta chumayelwa ka vanhu vontlhe.
4 Ndza mu byela n’wina mu nga vanghana va mina ndziku: Mu nga chavi lava va dayako miri na va nga hi na ntamu wa ku maha zvin’wani andzhako ka lezvo.
5 Kanilezvi ndzi ta mu komba loyi mu faneleko ku mu chava: Chavani Loyi a nga ni ntamu wa ku daya a tlhela a hoxa Gehena.* Ina, ndza mu byela ndziku: Chavani Loye.
6 A ntlhanu wa zvinjingiri a zvi xavisiwi hi mali ya lahasi nguvhu ke? Hambulezvo ci hava ni cin’we ci rivakelweko* hi Nungungulu.
7 Kanilezvi hambu ni misisi yontlhe ya tihloko ta n’wina yi hlayilwe. Mu nga chavi; n’wina mu va lisima nguvhu a ku hundza zvinjingiri zvo tala.
8 “Ndza wula ka n’wina ndziku: Ni wihi loyi a ndzi vhumelako mahlweni ka vanhu, a N’wana wa munhu yenawu i ta mu vhumela mahlweni ka tingilozi ta Nungungulu.
9 Kanilezvi loyi a ndzi alako mahlweni ka vanhu, yenawu i ta aliwa mahlweni ka tingilozi ta Nungungulu.
10 Ni wihi a wulawulako kubiha hi N’wana wa munhu i ta tsetselelwa; kanilezvi loyi a rukatelako a moya wo basa a nga ta tsetselelwa.
11 Loku va mu yisa mahlweni ka vanhu,* ni ka tihosi, ni ka vafumeli, mu nga karateki mu ku hi ta wulawulisa kuyini kutani hi ta wula yini kasi ku ti yimela,
12 hakuva a moya wo basa wu ta mu gondzisa ka cikhati caleco lezvi mu faneleko ku wula.”
13 Hi kulandzela, a wokari cikari ka citshungu i te ngalo kakwe: “Mugondzisi, byela a makabye wa mina lezvaku a avana tshomba na mina.”
14 Jesu aku kakwe: “Hesa, himani a nga ndzi yimisa kuva mulamuli kutani muaveli wa tshomba cikari ka n’wina va vambiri ke?”
15 Aku kabye: “Vhulani mahlo, mu ti wonela ka tixaka tontlhe ta kunavela,* hakuva hambu loku munhu a hi ni zvilo zvo tala, a wutomi gakwe a giti hi ka lezvi a nga nazvo.”
16 Hi kota ya lezvo i no va hlawutela mufananiso aku: “A simu ga wanuna wo kari wo ganya gi no pfuna nguvhu.
17 Hikwalaho i no sangula ku ti byela lezvi: ‘Ndzi ta kuyini hakuva a ndzi na wutshamu ga ku hlengeletela kona a timbewu ta mina?’
18 Aku: ‘Ndzi ta maha lezvi: Ndzi ta hohlola a matshala ya mina ndzi aka ya hombe kasi ndzi chela lomo a timbewu ta mina tontlhe ni zvilo zva mina zvontlhe.
19 Ndzi taku ka mina n’winyi:* “U* hlengeletele zvilo zvo tala zva zvi nene zvi ringanako malembe yo tala; humula, uga, unwa, u ti buza.”’
20 Kanilezvi Nungungulu aku kakwe: ‘Cipumbu ndziwena, ka wusiku galegi u tafa.* Makunu, himani a to sala ni zvilo lezvi u hlengeleteleko?’
21 Ku maheka zvalezvo ka munhu loyi a ti hlengeletelelako titshomba kanilezvi na a nga ganyangi mahlweni ka Nungungulu.”
22 Hi kulandzela i no byela vapizani vakwe aku: “Hizvalezvo ndza mu byela ndziku, tsikani ku karateka hi wutomi ga n’wina, mu ku hi taga yini kutani hi mimiri ya n’wina mu ku hi ta boha yini.
23 Hakuva a wutomi ga lisima nguvhu a ku hundza zvakuga, ni miri wa hundza nguvhu a tinguwo.
24 Cuwukani zvikunguwa: A zvi byali ne a zvi tshoveli; a zvi aki matshala ne zvihlangala, hambulezvo Nungungulu wa zvi wundla. N’wina a mu va lisima ku hundza zvinyanyani ke?
25 Himani cikari ka n’wina a zvi kotako ku lehisanyana wutomi gakwe hi ku karateka ke?
26 Hikwalaho loku mu nga zvi koti a ku maha nchumu lowu wa wutsongwani, hikuyini mu karatekako hi lezvi zvin’wani?
27 Cuwukani lezvi a zvitsangi zvi kulisako zvona: A zvi tiri, ne a zvi swuli; kanilezvi ndza mu byela ndziku: Hambu Solomoni ni titshomba tontlhe leti a nga hi nato a nga zangi a bohisa a ku khwatsi hi cin’we ca zvona.
28 Makunu loku Nungungulu a gi bohisisa lezvo a byanyi ga khwati, legi gi nga kona nyamutlha kuveni a mandziko gi ta hoxiwa ndzilweni, a nga ta mu bohisisa a ku hundza lezvo, n’wina lava va kukholwa kutsongwani ke?
29 Hikwalaho, tsikani ku karateka hi ku mu taga yini kutani mu tanwa yini. Tsikani ku karateka nguvhu;
30 hakuva a zvilo lezvi zvontlhe hi lezvi a vanhu va tiko va ti karatelako ku zvi kuma, kanilezvi a Papayi wa n’wina wa zvi tiva lezvaku ma zvi lava a zvilo lezvi.
31 Simamani ku lava a Mufumo wakwe, zvontlhe a zvilo lezvi zvi ta engetelwa ka n’wina.
32 “Mu nga chavi n’wina ntlhambi wu tsongwani, hakuva kurandza ka Papayi wa n’wina a ku mu nyika Mufumo.
33 Xavisani lezvi mu nga nazvo, mu nyika zvisiwana. Ti maheleni zvipachi zvi nga hlakaliko, yi nga tshomba le tilweni leyi yi nga mbheliko, laha a khamba gi nga tshineliko kusuhani ni laha a muhlwa wu nga giko.
34 Hakuva laha a tshomba ya wena yi nga kona, ni mbilu ya wena yi tava kwalaho.
35 “Bohani tibhandi ti tiya zviwunwini zva n’wina,* ni tikandiya ta n’wina ti vhura,
36 mu fana ni vanhu va rindzelako a hosi yabye lezvaku yi wuya hi muchadhweni, kasi loku yi chikela yi gongondza va tekela ku yi vhululela.
37 Ma katekile a malandza lawa a hosi ya wona yi to wuya yi ta ma kuma na ma ha rindzela! Ndza tiyisa ka n’wina ndziku: Yi ta boha libhandi li tiya ciwunwini yi ma tshamisa mezeni yi ma tirela.
38 Ni loku yi chikela cikari ka wusiku* hambu kubeni ka nkuku* yi ta ma kuma na ma longile, ma katekile a malandza lawo!
39 Kanilezvi tivani lezvi: Loku a n’winyi wa muti i wa no ci tiva a cikhati leci a khamba gi tota hi cona, na a nga tsikangi a yindlu yakwe yi pandziwa.
40 N’winawu tshamani na mu longile hakuva a N’wana wa munhu wata hi cikhati mu nga ci alakanyiko.”
41 Makunu Pedro i te ngalo: “Hosi, a mufananiso lowu u byela hina hoce kutani u byela vontlhe ke?”
42 A Hosi yiku: “Himani loyi hakunene a nga nandza go tsumbeka,* legi go tlhariha, legi a n’winyi wa gona a to gi yimisa hehla ka malandza yakwe,* kasi gi simama ku ma avela zvakuga hi cikhati ca kona ke?
43 Gi katekile a nandza lego loku a n’winyi wa gona a wuya a ta gi kuma na gi maha lezvo!
44 Ndza tiyisa ka n’wina ndziku: I ta gi nyika ntiro wa ku wonelela zvontlhe a nga nazvo.
45 Kanilezvi loku a nandza lego go tshuka gi ti byela lezvi mbilwini ya gona: ‘A n’winyi wa mina wa hlwela ku wuya’, gi sangula kuba malandza-kulobye ya cinuna ni ya cisati, giga ni kunwa gi popiwa,
46 a n’winyi wa nandza lego i ta wuya hi siku legi gi nga mu rindzelangiko ni cikhati leci gi nga ci tiviko, a ta gi tsayisa zva xapi, a gi nyika ciavelo ca gona zvin’we ni lava vo kala ku tsumbeka.
47 A nandza legi gi ku tivileko a kurandza ka n’winyi wa gona kanilezvi gi nga ti longiseli kutani ku maha lezvi a nga gi byela,* gi ta biwa timhika to tala.
48 Kanilezvi, legi gi nga kala ku ku tiva hambulezvo gi maha zvilo zvi ringanako ku gi biwa, gi ta biwa timhika ti tsongwani. Kunene, ni wihi loyi a nyikilweko zvotala, ku ta londziwa zvotala kakwe; ni loyi a yimisilweko hehla ka zvotala, i ta londziwa zvotala nguvhu.
49 “Ndzi tele ku ta lumeka ndzilo misaveni, ndza ha lava yini kambe loku makunu wu vhura?
50 Ina, ku na ni kubhabhatisa loku ndzi faneleko ku bhabhatiswa hi kona, niku ndza karateka nguvhu kala zvi maheka!
51 Mu alakanya ku ndzi tele ku ta neha kurula laha misaveni? Ndza mu byela ndziku: Ahihi, ndzi tele ku ta neha kuhambana.
52 Hakuva kusukela lezvi ku tava ni kuhambana laha ngangweni. Loku ku hi ni ntlhanu wa vanhu ka wona, a vanharu va ta vhukela vambiri, ni vambiri va vhukela vanharu.
53 Va ta vhukelana: A papayi i ta vhukela mufana, ni mufana a vhukela papayi; a mamani i ta vhukela nhanyana, ni nhanyana a vhukela mamani; a n’wingi i ta vhukela katamwane, ni katamwane a vhukela n’wingi.”
54 I no tlhela a byela citshungu aku: “Loku mu wona a refu na gi huma hi mupela-gambo mu tekela ku: ‘Kuta cingulo’, zvi maheka.
55 Loku mu wona a moya na wuba wuta hi dzongeni,* mu ngalo: ‘Ku ta hisa’, zvi maheka.
56 Vakanganyisi ndzin’wina, ma zvi tiva ku tlhamusela a matshamela ya misava ni tilo, kanilezvi hikuyini mu nga zvi tiviko ku tlhamusela a cikhati leci hi nga ka cona ke?
57 Hikuyini mu nga zvi tiviko ha n’wece lezvi zvi lulamileko?
58 Loku loyi a ku kecarako a famba na wena wuhosini, zama ku lulamisa timhaka naye na ma ha hi ndleleni, kasi a nga ku yisi ka mulamuli, a mulamuli a ku nyikela ka mugadhi wa paxo, ni mugadhi wa paxo a ku vhalela paxweni.
59 Ndza ku byela ndziku: U nga ta huma kala u riha a mali yontlhe.”
Mitlhamuselo ya lahasi
^ Wona Tlhamuselo wa magezu ya Bhibhiliya.
^ Kutani: “kalako ci nga woniwi”.
^ Kutani: “thethisa masinagogeni”.
^ Kutani: “wunavenave”.
^ Kutani: “muhefemulo wa mina”.
^ Kutani: “Muhefemulo, u”.
^ Kutani: “ka wusiku galegi va ta teka a muhefemulo wa wena”. Wona laha ka ku: “Muhefemulo” ka Tlhamuselo wa magezu ya Bhibhiliya.
^ A magezu lawa ma wula ku longa ku tira.
^ Kusukela lomu ka ma 21 hora kala zero hora.
^ Kusukela zero hora kala lomu ka ma 3 hora.
^ Kutani: “muwoneleli wo tsumbeka wa zva laha mutini”.
^ Kutani: “zvitiri”.
^ Kutani: “ku maha kota lezvi a n’winyi wa gona a zvi lavisako zvona”.
^ Kutani: “sul”.
