Luka 14:1-35
14 Ka khati gin’wani, Jesu i noya a yaga zvakuga hi sabhadho mutini wa mun’we wa varangeli va vaFarisi, vona na va mu cuwukisela khwatsi.
2 Makunu ku wa hi ni wanuna mahlweni kakwe a nga babya hi mababyi ya ku tala mati lomu mirini.
3 Hikwalaho, Jesu i no wutisa vagondzisi va Nayo ni vaFarisi, aku: “Zva fanela ku hanyisa hi siku ga sabhadho kutani a zvi faneli?”
4 Va no miyela. Hikwalaho, i no khoma a wanuna loye hi canja a mu hanyisa a gumesa a mu tsika a famba.
5 Aku kabye: “Himani cikari ka n’wina wa ku loku a n’wana wakwe kutani homu yakwe yi wela lomu hloweni hi sabhadho a nga tekeliko ku yi tsawula ke?”
6 A va zvi kotangi ku mu hlamula.
7 Laha a nga wona lezvaku lava va rambilweko vo langa matshamu ya le phambeni, i no va hlawutela mufananiso, aku kabye:
8 “Loku a wokari a ku ramba festeni ya muchadho, u ngayi ka wutshamu ga le phambeni u ya tshama kona. Kuzvilava a munhu mun’wani wo chaviseka ku hundza wena i rambilwewo.
9 Makunu loyi a rambileko n’wina va vambiri i tata ka wena a taku: ‘Suka laha, ku tshama inaloyi.’ Kwalaho u ta suka na u dhana uya ka wutshamu ga lendzhako.
10 Kanilezvi loku u rambiwa, famba u ya tshama lendzhako kasi loku loyi a nga ku ramba ata, aku ngalo ka wena: ‘Munghana, famba phambeni.’ Makunu u tava ni wudzundzo mahlweni ka vapfhumba vontlhe.
11 Hakuva ni wihi loyi a ti tlakusako i ta koramiswa, ni loyi a ti koramisako i ta tlakuswa.”
12 Hi kulandzela, i no byela loyi a nga mu ramba aku: “Loku u ramba vanhu lezvaku va ta fihlula* kutani ku lalela,* u nga vitani vanghana va wena, kutani vamakabye va wena, kutani maxaka ya wena, ne vaakelani va wena lava vo ganya. Hakuva va nga tshuka va ku rambawu, zviva ku ku tlhelisela.
13 Kanilezvi loku u maha festa, ramba zvisiwana, ni zvikhurubu, ni zvilima, ni zvikhumu;
14 u ta kateka hakuva lavo a va na ca ku ku tlhelisela hi cona. Kanilezvi u ta tlheliselwa kuvhukeni ka valulamileko.”
15 Laha a mun’we wa lava va nga rambilwe a ngazwa lezvo, i te ngalo: “I katekile loyi a gako* Mufun’weni wa Nungungulu.”
16 Jesu aku ngalo kakwe: “A wanuna wo kari i no maha festa ya hombe, a ramba vanhu vo tala.
17 I no ruma nandza gakwe hi cikhati ca festa lezvaku gi ya byela lava va rambilweko, giku: ‘Tanani, hakuva zvontlhe zvi mbhelele.’
18 Kanilezvi, vontlhe va no sangula ku ti lavela zvigelo zva ku ti yimelela va ngayi. Loyi wo ranga i no byela nandza lego aku: ‘Ndzi xavile petso, makunu ndzi lava ku ya wu wona; ndzi tsetselele sawena, ndzi nga ta zvi kota.’
19 A mun’wani aku: ‘Ndzi xavile a ntlhanu wa zvipani zva tihomu, ndzi lava ku ya ti ringisa; ndzi tsetselele sawena, ndzi nga ta zvi kota.’
20 Ni mun’wani kambe i te ngalo: ‘Ndza hi ku chadha, hi cigelo leco ndzi nga ta zvi kota kuta.’
21 Hikwalaho a nandza gi no wuya gi ta byela hosi ya gona a timhaka leti. A n’winyi wa muti i no zangara a byela nandza gakwe aku: ‘Hatlisa u famba maruweni ya hombe ni ka zvindlelana zva lomu dhoropeni u ya vitana zvisiwana, ni zvikhurubu, ni zvikhumu, ni zvilima u wuya nazvo.’
22 A cikhati leci a nandza gi nga wuya, gi te ngalo: ‘Hosi, lezvi u nga laya zvi mahilwe, kanilezvi ka ha hi ni wutshamu.’
23 A hosi yi no byela nandza yiku: ‘Famba maruweni ni lomu tindleleni, u ya kurumeta vanhu kuta kasi a muti wa mina wu tala.
24 Hakuva ndza ku byela ndziku: I hava ni mun’we wa lava va rambilweko a to ringa a zvakuga zva mina.’”
25 Makunu ku wa hi ni citshungu ca hombe ci nga famba zvin’we naye; i no hundzuluka aku ka cona:
26 “Loku a munhu ata ka mina na a nga vengi* a papayi wakwe, ni mamani wakwe, ni sati wakwe, ni vana vakwe, ni vamakabye vakwe, hambu ni wutomi gakwe, a nge mahi mupizani wa mina.
27 Ni wihi loyi a nga rwaliko a mhandze yakwe ya hlomulo* a ndzi landzela, a nge mahi mupizani wa mina.
28 Himani cikari ka n’wina wa ku loku a lava ku aka yindlu* a nga rangiko hi ku tshama hasi a hlayela ntsengo, kasi ku wona lezvaku i nazvo zvontlhe zvi lavekako kasi ku yi mbheta ke?
29 Loku a nga mahi lezvo, a nga tshuka a zima ciseketelo* kanilezvi a nga zvi koti ku yi mbheta. Makunu a vahundzi va ndlela va ta mu hleka,
30 vaku: ‘A munhu loyi i sangulile ku aka kanilezvi a nga zvi kotangi ku mbheta.’
31 Kona hi yihi hosi leyi yi fambako yi yalwa ni yin’wani hosi na yi nga rangangi hi ku tshama hasi yi lava wusungukati, kasi ku tiva lezvaku yi nga zvi kota hi 10 000 wa masochwa a kulwa ni leyi yi tako ka yona ni 20 000 wa masochwa ke?
32 Loku yi wona lezvaku yi nga ta zvi kota, yi ta rumela vaembaxadhori* kasi ku ya kombela kurula ni hosi leyi yin’wani na ya ha hi kule.
33 Makunu n’winawu zvi tiveni lezvaku ni wihi cikari ka n’wina a nga tsikiko zvilo zvakwe zvontlhe, a nge mahi mupizani wa mina.”
34 “A munyu wu nene. Kanilezvi loku a munyu wu pswhama wu ta lungiwa hi yini ke?
35 A wa ha vhuni nchumu, ne ka misava ne ku maha citrume, wo hoxiwa. Loyi a nga ni tindleve ta kuzwa, i wa ingise.”
Mitlhamuselo ya lahasi
^ Kutani: “almosara”.
^ Kutani: “jantara”.
^ Hi kukongoma: “a gako pawa”.
^ Kutani: “mu randzi kutsongwani”.
^ Wona Tlhamuselo wa magezu ya Bhibhiliya.
^ Hi kukongoma: “torre”.
^ Kutani: “a maha fundasawu”.
^ Kutani: “vayimeli”.
