Luka 16:1-31
16 Andzhako ka lezvo, Jesu i no byela vapizani, aku: “A wanuna wo kari wo ganya i wa hi ni nandza* gi nga kecariwa ka yena lezvaku ga xakela tshomba yakwe.
2 Hikwalaho, i no gi vitana a taku ka gona: ‘Zvini lezvi ndzi zvi zwako hi wena? Famba u ya tsala mubiko wa ntiro wa wena hakuva u nga ta ha wonelela zva muti wa mina.’
3 A nandza gi no pimisa mbilwini ya gona giku: ‘Ndzi ta kuyini lezvi a hosi ya mina yi lavako ku ndzi hlongola ntirweni? A ndzi na ntamu wa ku rima, niku zva ndzi dhanisa a ku kombela zomola.
4 A! Ndza zvi tiva lezvi ndzi to maha kasi loku ndzi hlongoliwa ntirweni wa mina wa ku wonelela zva muti a vanhu va ndzi amukela mimitini yabye.’
5 I no vitana hi mun’we mun’we lava va nga dhevha a hosi yakwe a ta wutisa loyi wa kusangula aku: ‘Zvini u dhevhako ka hosi ya mina?’
6 I no hlamula aku: ‘Ndzi dhevha 2200 wa tilitro* ta mafura ya olivha.’ Aku kakwe: ‘Hatlisa u teka a phepha ga mangava ya wena u tsala a 1100.’
7 Hi kulandzela i no wutisa loyi mun’wani aku: ‘Wena ke, zvini u dhevhako?’ Aku: ‘Ndzi dhevha a 100 wa tisakwa* ta trigo.’ Aku kakwe: ‘Teka a phepha ga mangava ya wena u tsala a 80.’
8 A hosi ya nandza lego yi no gi dzundza, hambu lezvi gi nga lulamangiko, hakuva gi wa tlharihile. A vana va tiko legi* va tlharihile ka cizukulwana cabye a ku hundza a vana va kuwonekela.
9 “Ndza wula kambe ka n’wina ndziku: Ti maheleni vanghana hi titshomba ti nga lulamangiko, kasi a cikhati leci ti to mbhela va fela ku mu amukela matshan’wini ya pindzukelwa.
10 Loyi a tsumbekako ka lezvi zvi tsongwani i tsumbekile ni ka lezvi zva hombe, ni loyi a nga lulamangiko ka lezvi zvi tsongwani a nga lulamangi ni ka lezvi zva hombe.
11 Hikwalaho, loku mu nga tsumbekangi ka titshomba ti nga lulamangiko, himani a to mu nyika ku hlayisa lezvi zva lisine ke?
12 Kona loku mu nga tsumbekangi ka lezvi zvi nga zva mun’wani munhu, himani a to mu nyika lezvi zvi lumbako n’wina ke?
13 A ku na nandza gi zvi kotako ku tirela tihosi timbiri, hakuva gi ta venga yin’we gi randza leyi yin’wani, kutani ku namarela ka yin’we gi kanyisa leyi yin’wani. A mu nge zvi koti kuva zvitiri zva Nungungulu ni zva Titshomba.”
14 A vaFarisi, va nga hi varandzi va mali, va wa ingisela zvontlhe lezvi, hikwalaho va no sangula ku mu monya.*
15 Jesu aku kabye: “Mu ti maha vo lulama mahlweni ka vanhu, kanilezvi Nungungulu wa ti tiva a timbilu ta n’wina. Hakuva lezvi a vanhu va nge hi zvona zva lisima manyala ka Nungungulu.
16 “A Nayo ni Vaphrofeti zvi no kanelwa kala ka Johani. Kusukela masikwini lawo, a Mufumo wa Nungungulu wu kanelwa kota mahungu ya ma nene, niku a vanhu va tixaka tontlhe va kulula va n’watseka na va lava Mufumo lowu.
17 Kunene, zva olova ku a tilo ni misava zvi nyamalala, a ku hundza ku a ndzhatana kutani cidokho ca Nayo ci nga tatiseki.
18 “Ni wihi loyi a tsikako sati wakwe a chadha ni mun’wani wa maha wubhayi, ni loyi a chadhako ni wasati a tsikeneko ni nuna wakwe yenawu wa maha wubhayi.
19 “Ku wa hi ni wanuna wo kari wo ganya a nga boha tinguwo to dhura na a hanya mafureni siku ni siku.
20 Kanilezvi ku wa hi ni wanuna wa cisiwana* a vitaniwako ku hi Lazaru a nga hi ni zvilondza mirini wontlhe loyi a nga vekiwa nyangweni ya loyi wo ganya.
21 I wa navela kuga matlhatlha ma ngawa hi mezeni ya wanuna loye wo ganya. Hambu ni timbyana ti wata ti ta lazvela zvilondza zvakwe.
22 Hi kufamba ka cikhati, a wanuna loyi wa cisiwana* i nofa, a tekiwa hi tingilozi aya reveni ga Abrahama.* “A wanuna loyi wo ganya yenawu i nofa a lahliwa.
23 Na a hi Cilahleni,* le kuxanisekeni, i no tlakusa matihlo yakwe a wona Abrahama hi le kule na a hi na Lazaru reveni gakwe.*
24 I no mu vitana aku: ‘Papayi Abrahama, ndzi mahele wuxinji u ruma Lazaru a peta litiho lakwe lomu matini a ta titimeta lirimi la mina hakuva ndza xaniseka nguvhu ndzilweni lowu wo hisa nguvhu.’
25 Kanilezvi Abrahama i te ngalo: ‘N’wananga, alakanya lezvaku u ti buzile hi zvilo zvo tala zva zvi nene na wa ha hanya kanilezvi Lazaru i amukele makhombo. Hambulezvo zvalezvi i kari a chavelelwa kanilezvi wena wo xaniseka.
26 A ku tsika lezvo, ku na ni nkele* wa hombe cikari ka hina na n’wina kasi lava va lavako ku suka hi seno vata seyo ka n’wina va nga zvi koti, ne hambu ku a vanhu va suka hi seyo vata seno ka hina.’
27 A wanuna loye aku: ‘Loku zvi tshamisile lezvo ndza ku kombela papayi lezvaku u mu ruma aya kaya ka papayi wa mina,
28 hakuva ndzi na ni ntlhanu wa vamakabye, a fela ku ya va kustumunyela khwatsi kasi vonawu va ngati ka wutshamu legi va ta xaniseka.’
29 Kanilezvi Abrahama i te ngalo: ‘Va na na Mosi ni Vaphrofeti; a va ingise vona.’
30 A wanuna loye aku: ‘Ahihi papayi Abrahama, loku a wokari a humako hi ka vafileko aya ka vona va ta ti sola.’
31 Kanilezvi Abrahama aku kakwe: ‘Loku va nga ingisi Mosi ni Vaphrofeti, va nga ta kholwa hambu loku ku hi munhu a humako hi ka vafileko.’”
Mitlhamuselo ya lahasi
^ Kutani: “muwoneleli wa zva muti”.
^ Hi kukongoma: “100 wa mabarera”. A barera gin’we gi waya cipimo ca 22 wa tilitro.
^ A sakwa yin’we yi wa peza 170 wa tikilo.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “chepeta”.
^ A cisiwana leci ci wa hi leci co kombela zomola.
^ A cisiwana leci ci wa hi leci co kombela zomola.
^ Hi kukongoma: “cifuveni ca Abrahama”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Hi kukongoma: “cifuveni cakwe”.
^ Kutani: “geva”. A geva i nkele wo eta nguvhu wo tshamisa ku khwatsi musele.
