Luka 17:1-37
17 I no byela vapizani vakwe aku: “A zvi koteki lezvaku ku nga humeleli nchumu wa ku maha munhu a wonha. Hambulezvo khombo ka loyi wu tako ha yena!
2 Zvi wa tava chukwana ku a bohelelwa ribye ga hombe nhan’wini yakwe* a rikhiswa bimbini a ku hundza ku maha mun’we wa lava vatsongwani a wonha.
3 Ti woneleni wutsumbu ga n’wina. Loku a makabye wa wena a wonha, mu kawuke; loku a ti sola mu tsetselele.
4 Hambu loku a ku wonhela a 7 wa makhati hi siku, kanilezvi ata ka wena a 7 wa makhati a taku: ‘Ndza ti sola’, mu tsetselele.”
5 Makunu a vapostoli va no byela Hosi vaku: “Hi engetele kukholwa.”
6 A Hosi yiku: “Loku mu wa hi ni kukholwa ko ringana ni mbewu ya cinapi,* mu wa ta wula ka mora lowu muku: ‘Kunuka laha u ya ti byala bimbini!’ wu wa ta mu ingisa.
7 “Hi wihi cikari ka n’wina a nga ni nandza gi rimako kutani gi risako zvifuyo wa ku loku gi wuya hi masin’wini i ngalo ka gona: ‘Hatlisa u ta tshama mezeni uga’?
8 A nga ta wula aku: ‘Famba u ya cica tivhuthu u ndzi longiselela zvakuga u ndzi tirela kala ndzi mbheta kuga ni kunwa, andzhako ka lezvo hi kona u to tshama uga ni kunwa’ ke?
9 Mu alakanya ku i ta gi bonga hi lezvi gi mahileko lezvi gi rumilweko?
10 Makunu n’winawu, loku mu mahile zvontlhe lezvi mu rumilweko, wulani muku: ‘Hi malandza ma nga vhuniko nchumu. Hakuva hi mahile basi lezvi hi nga fanele ku maha.’”
11 Na a hi ndleleni ya kuya Jerusalema, i no hundza hi mbhinganweni wa Samariya ni Galileya.
12 Laha a nga kari a nghena cidhoropaneni, i no khingiwa hi 10 wa vavanuna va nga hi ni hlokonho, kanilezvi va no nyima hi le kule,
13 va tlakusa magezu yabye vaku: “Jesu, Mugondzisi, hi mahele wuxinji!”
14 A cikhati leci a nga va wona, i te ngalo kabye: “Fambani mu ya ti kombekisa ka vapristi.” Laha va nga kari va famba, va no basiswa.
15 Loku a mun’we wabye a wonile lezvaku i hanyisilwe, i no jika a wuya, na a dhumisa Nungungulu hi gezu ga hombe.
16 I nota a tawa hi nghohe mikondzweni ya Jesu, a mu bonga. A wanuna loye i wa hi muSamariya.
17 Jesu aku: “Kasi a hi 10 va nga basiswa? Makunu lava van’wani va 9 va kwihi?
18 A ku na mun’wani a wuyileko ku ta dhumisa Nungungulu, saseka wanuna loyi wa tiko gin’wani!”
19 I no byela wanuna loye aku: “Suka u ti fambela; a kukholwa ka wena ku ku hanyisile.”
20 Laha a vaFarisi va nga mu wutisa lezvaku a Mufumo wa Nungungulu wu tata rini, i no va hlamula aku: “A Mufumo wa Nungungulu a wu woneki ka vontlhe kuteni ka wona;
21 cima va nga ta wula vaku: ‘Hi lowu!’ kutani ku: ‘Hi lowuya!’ Hakuva a Mufumo wa Nungungulu wu cikari ka n’wina.”
22 Andzhako ka lezvo i no byela vapizani aku: “Cata cikhati leci mu to xuva ku wona a gin’we ga masiku ya N’wana wa munhu, kanilezvi mu nga ta gi wona.
23 A vanhu va ta mu byela ku: ‘Hi gayani!’ kutani ku: ‘Hi loyi!’ Mu nga fambi, ne mu nga va landzeli.
24 Hakuva khwatsi hi lezvi a kuhatima ku sukelako ka tlhelo gin’we ga tilo ku woninga kala ka gin’wani tlhelo ga tilo, a N’wana wa munhu i ta mahisa zvezvo sikwini gakwe.
25 Hambulezvo, a kuranga i ta xaniseka nguvhu, a aliwa hi cizukulwana leci.
26 A ku tsika lezvo, a ku fana ni lezvi zvi nga maheka masikwini ya Nowa, zvi ta mahisa zvezvo masikwini ya N’wana wa munhu:
27 Va waga, vanwa, va chadha, kala siku legi Nowa a nga nghena hi gona lomu tarwini,* a Ndambi yita yi ta va lovisa vontlhe.
28 Hi zvalezvo kambe zvi nga maheka masikwini ya Loti: Va waga, vanwa, va xava, va xavisa, va byala ni ku aka.
29 Kanilezvi, a siku legi Loti a nga huma Sodhoma ku nona ndzilo ni solufa* hi le tilweni zvi va lovisa vontlhe.
30 Zvi ta mahisa zvezvo ka siku legi a N’wana wa munhu a to wonekeliswa hi gona.
31 “Ka siku lego, loyi a nga hehla ka yindlu, kanilezvi a zvilo zvakwe na zvi hi lomu ndzeni, a nga chiki a ta zvi teka. Ni loyi a nga masin’wini a nga tlheleli zvilo lezvi a zvi siyileko.
32 Alakanyani a sati wa Loti.
33 Ni wihi loyi a ti karatelako ku hlayisa wutomi gakwe i ta lahlekelwa hi gona, kanilezvi loyi a lahlekelwako hi gona i ta gi hlayisa.
34 Ndza mu byela ndziku: Ka wusiku lego a vanhu vambiri va tava ka mubhedhi wun’we; a mun’we i ta tekiwa, loyi mun’wani a tsikiwa.
35 A vavasati vambiri va tava cigayweni; a mun’we i ta tekiwa, loyi mun’wani a tsikiwa.”
36 *——
37 Hikwalaho va no mu hlamula vaku: “Kwihi Hosi?” Aku kabye: “Laha ku nga ni cirumbi, a magama ma ta hlengeletana kwalaho.”
Mitlhamuselo ya lahasi
^ Kutani: “ribye ga cigayo nhan’wini yakwe legi gi rendzelekiswako hi mbongola”.
^ I mbewu ya yitsongwani nguvhu yi kumekako Palestina. Yi nga kula yiza yi chikela ka 4 wa timetro, lezvo na yi hi ni madhavi.
^ Hi kukongoma: “bhokiseni”. A taru legi gi wa hi ngalava ya hombe yo fana ni bhokisa.
^ Kutani: “enxofre”. Laha ka vhesi legi a gezu “solufa” gi wula lixaka lo kari la maribye ma vhurako.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
