Luka 18:1-43
18 I no engeta a va hlawutela mufananiso xungetano hi lezvaku va fanele ku khongela contlhe cikhati va nga karali,
2 aku: “Ka dhoropa go kari ku wa hi ni mulamuli a nga chaviko Nungungulu ne ku khatala hi munhu.
3 Ku wa hi ni wasati kambe wo felwa hi nuna dhoropeni lego a nga tshamela kuya kakwe a yaku: ‘Ndzi lulamisele a mhaka ya mina ni loyi a ndzi wonheleko.’
4 Ku no hundza cikhati co kari na a nga vhumeli, kanilezvi hi kugumesa i no wula mbilwini yakwe aku: ‘Hambu lezvi ndzi nga chaviko Nungungulu ne ku khatala hi munhu,
5 lezvi a wasati loyi a tshamelako ku ndzi karata, ndzi ta mu xuxela a mhaka yakwe hi kululama, a ngaza a ndzi rera loku a simama kuta a ta ndzi karata.’”
6 A Hosi yiku: “Zwanani lezvi a mulamuli a nga wula, hambu lezvi a nga lulamangiko!
7 Makunu Nungungulu a nga ta va mahela kululama a vahlawulilweko vakwe, lava va rilako kakwe mumu ni wusiku, na a timisela hi vona ke?
8 Ndza mu byela ndziku: I ta hatlisa a va mahela kululama. Hambulezvo, a cikhati leci a N’wana wa munhu a to chikela, i ta ku kuma a kukholwa loku* misaveni ke?”
9 I no hlawutela mufananiso lowu ka vokari va ti tsumbako lezvaku va lulamile, va tlhela va chepeta van’wani, aku:
10 “A vavanuna vambiri va noya tempeleni va ya khongela; a mun’we i wa hi muFarisi, loyi mun’wani i wa hi mukhupisi.
11 A muFarisi i no yima a sangula ku khongela a wula lezvi mbilwini yakwe: ‘Nungungulu, ndza ku bonga hakuva a ndzi fani ni vanhu van’wani — va nga makhamba, vangalulamangiko, ni zvibhayi — ne hambu ku fana ni mukhupisi loyi.
12 Ndzi hlambanya ku tshama ndzi ngagi nchumu* kumbiri hi vhiki; ndzi nyikela zva wukhume ka zvontlhe ndzi zvi kumako.’
13 Kanilezvi a mukhupisi i no yima hi le kule na a nga zvi koti ne ku tlakusa matihlo yakwe ma cuwuka tilweni, na a tiba cifuva aku: ‘Nungungulu, ndzi mahele wuxinji mina ndzi nga muwonhi.’
14 Ndza mu byela ndziku: A wanuna loyi i tlhelile kaya na a wuliwa wo lulama nguvhu ku hundza a muFarisi. Hakuva ni wihi loyi a ti tlakusako i ta koramiswa, kanilezvi loyi a ti koramisako i ta tlakuswa.”
15 A vanhu va no mu tela ni vanana vabye kasi a ta va henya, kanilezvi laha a vapizani va nga wona lezvo, va no va bhongela.
16 Kanilezvi Jesu i no vitana vanana vata kakwe, aku: “Tsikani vanana vata ka mina, mu nga va beteli, hakuva a Mufumo wa Nungungulu wu lumba vanhu vo kota vona.
17 Ndza tiyisa ka n’wina ndziku: Ni wihi loyi a nga amukeliko a Mufumo wa Nungungulu a ku khwatsi i n’wanana, a nga ta tshuka a nghena ka wona.”
18 A mun’we wa vafumeli i no mu wutisa aku: “Mugondzisi wa mu Nene, zvini ndzi faneleko ku maha kasi ndziga tshomba ya wutomi ga pindzukelwa?”
19 Jesu aku kakwe: “Hikuyini u ndzi vitanako wa mu nene? A ku na munhu wa mu nene saseka mun’we basi, ku nga Nungungulu.
20 Wa yi tiva a milayo leyi yaku: ‘U nga mahi wubhayi, u nga dayi, u nga yivi, u nga yimeli zvilo zva mawunwa, kombisa cichavo ka papayi wa wena ni ka mamani wa wena.’”
21 I no mu hlamula aku: “Ndza maha zvontlhe lezvo kusukela wun’wananeni ga mina.”
22 Loku Jesu a zwile lezvo i te ngalo kakwe: “Wa ha kiyelelwa hi nchumu wun’we: Xavisa zvontlhe u nga nazvo u teka mali ya kona u nyika zvisiwana, u tava ni tshomba matilweni; andzhako ka lezvo, tana u ndzi landzela.”
23 A cikhati leci a mufumeli a ngazwa lezvo i no bayiseka nguvhu hakuva i wa ganyile nguvhu.
24 Jesu i no mu cuwuka aku: “Zvi ta karata nguvhu ka lava va nga ni mali a ku nghena Mufun’weni wa Nungungulu!
25 Kunene zva olova ku a kameli gi nghena non’wini wa chingani ku hundza ku a munhu wo ganya a nghena Mufun’weni wa Nungungulu.”
26 Lava va nga zvizwa va te ngalo: “Himani wa ku a nga pona?”
27 Jesu aku: “Lezvi zvi nga kotekiko ka vanhu zva koteka ka Nungungulu.”
28 Kanilezvi Pedro i te ngalo: “Hi siyile zvilo zva hina hi ku landzela.”
29 Jesu aku kabye: “Ndza tiyisa ka n’wina ndziku: A ku na munhu a siyileko muti, kutani sati, kutani vamakabye, kutani vapswali, kutani vana, hi kota ya Mufumo wa Nungungulu
30 a to kala ku kuma zvotala nguvhu ka cikhati leci, ni wutomi ga pindzukelwa cikhatini ci tako.”*
31 Andzhako ka lezvo i no koka lava va 12 hi tlhelo aku kabye: “Ma zvi wona, lezvi hiya Jerusalema. Zvontlhe lezvi zvi tsalilweko hi vaphrofeti xungetano hi N’wana wa munhu zvi ta tatiseka.*
32 Hakuva i ta nyikelwa mandleni ya vamatiko, a poyiliwa, a xaniswa ni ku phelelwa.
33 Andzhako ka ku muba va ta gumesa va mu daya, kanilezvi hi siku ga wunharu i ta vhuka.”
34 Hambulezvo, a va zwisisangi ne cin’we ka zvilo lezvi, hakuva a timhaka leti ti wa fihlilwe kabye, hikwalaho a va zvi zwisisangi lezvi a nga wula.
35 Laha Jesu a nga hi kusuhani ni ku chikela Jeriko, ku wa hi ni wanuna wa cikhumu a nga tshamile mbhirini ya ruwa a kombela zomola.
36 Kota lezvi a ngazwa citshungu na ci kari ci hundza, i no sangula ku wutisa ku zvini zvi mahekako.
37 Va no mu hlamula vaku: “Hi Jesu wa le Nazareta a hundzako!”
38 Laha a ngazwa lezvo, i no vitana hi gezu ga hombe aku: “Jesu, N’wana Dhavhidha, ndzi mahele wuxinji!”
39 Lava va nga hi phambeni va no mu kawuka va ku i wa miyele; kanilezvi yena i no engeta a vitana hi gezu ga hombe nguvhu, aku: “N’wana Dhavhidha, ndzi mahele wuxinji!”
40 Jesu i no nyima a laya lezvaku vata naye kakwe. Loku a chikele, Jesu i no mu wutisa aku:
41 “U lava ku ndzi ku mahela yini?” Aku: “Hosi, ndzi tlhelisele kuwona ka mina.”
42 Jesu aku kakwe: “Tlhela u wona; a kukholwa ka wena ku ku hanyisile.”
43 Zvalezvo a wanuna loye i no tlhela a wona, a sangula ku mu landzela, a dhumisa Nungungulu. Vontlhe lava va nga zvi wona vonawu va no dhumisa Nungungulu.
Mitlhamuselo ya lahasi
^ Kutani: “kukholwa ka lixaka leli”. Hi kukongoma: “a kukholwa”.
^ Kutani: “Ndzi jejuwara; Ndzi pfhunga”.
^ Kutani: “ka nguva yi tako”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “maheka zvontlhe”.
