Luka 19:1-48
19 Andzhako ka lezvo i no nghena Jeriko a sangula ku tsemakanya dhoropa.
2 Laho ku wa hi ni wanuna a vitaniwako ku hi Zakewu a nga hi hosana ya vakhupisi niku i wa ganyile.
3 I wa zametela ku wona Jesu, kanilezvi i wa nga zvi koti hi kota ya citshungu hakuva i wa komile.
4 Hikwalaho i no tsutsuma a ranga phambeni a ya noma ka nkuwu wa khwati kasi a mu wona hakuva Jesu i wa lava ku hundza hi ndlela leyo.
5 A cikhati leci Jesu a nga chikela ka wutshamu lego, i no cuwuka hehla aku kakwe: “Zakewu, hatlisa u chika hakuva nyamutlha ndziya mutini wa wena.”
6 Laha a ngazwa lezvo, i no hatlisa a chika a mu amukela hi kutsaka kota mupfhumba wakwe.
7 A cikhati leci va nga wona lezvo, vontlhe va no sangula ku ngurangura vaku: “I yile a ya tshama mutini wa munhu a nga muwonhi.”
8 Kanilezvi Zakewu i no suka a yima aku ka Hosi: “Hosi, ndzi ta nyika zvisiwana a khihlanya ga lezvi ndzi nga nazvo; ni loku ndzi kalavele* munhu ndzi ta mu tlhelisela na zvi phindilwe mune wa makhati.”
9 Laha Jesu a ngazwa lezvo i te ngalo: “Nyamutlha a kuhanyiswa ku tile mutini lowu, kota lezvi yenawu a nga n’wana wa Abrahama.
10 Hakuva a N’wana wa munhu i tele ku ta lavetela ni ku hanyisa lezvi zvi lahlekileko.”
11 Na va ha ingisela timhaka leti, i no va hlawutela wun’wani mufananiso hakuva lezvi a nga tshinela Jerusalema va wa alakanya lezvaku a Mufumo wa Nungungulu wu wa ta wonekeliswa zvalezvo.
12 Hikwalaho i te ngalo: “A wanuna wo kari a pswalelweko ngangweni wa wuhosi i no endza aya tikweni ga le kule, kasi ku ya amukela wuhosi a gumesa a wuya.
13 I no vitana a 10 wa malandza a ta ma nyika a 10 wa tipondo* aku ka wona: ‘Salani mu bhindzulisa a mali leyi kala ndzi wuya.’
14 Kanilezvi a vanhu va tiko gakwe va wa mu venga, hikwalaho va no ruma vaembaxadhori* va mu landza va yaku: ‘A hi zvi lavi ku fumelwa hi wanuna loyi.’
15 “Hi kugumesa, loku a wuyile na a amukele wuhosi,* i no vitana a malandza lawa a nga ma nyikile mali* kasi ku ta tiva lezvi ma nga sala ma bhindzula.
16 Loyi wo ranga i nota a taku: ‘Hosi, a pondo ya wena yi bhindzulile a 10 wa tipondo.’
17 Aku kakwe: ‘U tirile, nandza ga gi nene! Kota lezvi u nga tsumbeka ka zvilo zva zvitsongwani nguvhu, fumela a 10 wa madhoropa.’
18 Loyi wa wumbiri i nota a taku: ‘A pondo ya wena Hosi yi bhindzulile a ntlhanu wa tipondo.’
19 I no byela loyi kambe aku: ‘Wenawu fumela a ntlhanu wa madhoropa.’
20 Kanilezvi ku nota loyi mun’wani a taku: ‘Hosi, hi leyi a pondo ya wena ndzi nga fihlile lomu ka nguwo.
21 Ndzi no chava hakuva u munhu wo karata; u teka lezvi u nga vekangiko ni ku tshovela lezvi u nga byalangiko.’
22 Aku kakwe: ‘Nandza go biha! Ndza ku lamula hi magezu ya wena n’winyi. U ngalo u wa zvi tiva ku ndzi munhu wo karata, a tekako lezvi a nga vekangiko ni ku tshovela lezvi a nga byalangiko?
23 Makunu hikuyini u nga kala ku veka mali* ya mina bhanko? Kuwuyeni ka mina ndzi wa ta yi teka ni majuro.’
24 “Hikwalaho, i no byela lava va nga yimile laho aku: ‘Tekani pondo leyi a nga nayo mu nyika loyi a nga ni 10 wa tipondo.’
25 Kanilezvi vona vaku ngalo kakwe: ‘Hosi, i sina a hi ni 10 wa tipondo!’
26 Aku: ‘Ndza mu byela ndziku ni wihi loyi a nga nazvo i ta nyikwa zvin’wani, kanilezvi loyi a nga hava nchumu, ni lezvi a nga nazvo i ta tekelwa.
27 Tanani ni valala va mina lava va nga kala va nga zvi lavi lezvaku ndzi va fumela mu ta va daya mahlweni ka mina.’”
28 Loku a mbhetile ku wulawula timhaka leti, i no simama ku famba aya Jerusalema.
29 A cikhati leci a nga hi kusuhani ni Bhetfaje ni Bhetaniya, citsungeni ci vitaniwako ku Citsunga ca maOlivha, i no ruma vapizani vambiri,
30 aku: “Fambani cidhoropaneni leci ci nga mahlweni ka n’wina, loku mu nghenile mu ta ya kuma a cimbongolana na ci bohilwe ca ku a ci se khilelwa hi munhu. Ci tlhatlheni muta naco.
31 Kanilezvi loku a wokari a mu wutisa aku: ‘Mu ci tlhatlhela yini?’ Hlamulani muku: ‘A Hosi ya ci lava.’”
32 Lava va nga rumilwe va no famba va ya ci kumisa zvalezvi a nga va byelisile zvona.
33 Kanilezvi laha va nga kari va tlhatlha cimbongolana, a venyi va cona va no va wutisa vaku: “Mu ci tlhatlhela yini a cimbongolana leco?”
34 Va no va hlamula vaku: “A Hosi ya ci lava.”
35 Va no famba naco ka Jesu, va andlalela a tinguwo tabye hehla ka cimbongolana, Jesu a khilela.
36 Laha a nga kari a famba, va no andlalela tinguwo tabye laha ruweni.
37 Zvalezvi a nga tshinela ka ruwa legi gi relelako hi le Citsungeni ca maOlivha, a citshungu contlhe ca vapizani ci no sangula ku tsaka ni ku dhumisa Nungungulu hi gezu ga hombe hi kota ya zvihlamaliso zvontlhe lezvi va zvi wonileko,
38 vaku: “I katekile loyi a tako kota Hosi vitweni ga Jehovha! A kurula a kuve tilweni, ni wudzundzo ka Nungungulu loyi a nga le hehla matilweni!”
39 Kanilezvi, a vaFarisi vo kari va nga hi lomu ka citshungu va te ngalo kakwe: “Mugondzisi, kawuka vapizani va wena.”
40 Jesu i no hlamula aku: “Ndza mu byela ndziku: Loku lava va miyela, a maribye ma ta huwelela.”
41 A cikhati leci a nga chikela kusuhani, i no cuwuka dhoropa a gi rilela,
42 aku: “Loku wena u wa zvi tivile nyamutlha a zvilo lezvi zvi nehako kurula . . . kanilezvi zvi fihlilwe matihlweni ya wena.
43 Hakuva mata a masiku lawa a valala va wena va to ku bhiyela hi tisinya ta mitlonga, va ku randzela ni ku ku dhumela hi matlhelo wontlhe.
44 Va ta ku wisa u ku bhu lahasi zvin’we ni vana va wena lava va nga cikari ka wena; va nga ta siya ka wena ne ribye gin’we hehla ka gin’wani, hakuva a wu ci tivangi cikhati ca kuhloliwa ka wena.”
45 Andzhako ka lezvo i no nghena tempeleni a hlongola lava va nga kari va xavisa,
46 aku kabye: “Ku tsalilwe ku ngalo: ‘A yindlu ya mina yi tava yindlu ya mikhongelo’, kanilezvi n’wina mu yi maha yindlu ya vayivi.”
47 I no simama ku gondzisa tempeleni siku ni siku. Kanilezvi a vapristi lava va tihosana ni vatsali ni vahombe va wa hlota ndlela ya ku mu daya;
48 hambulezvo a va yi kumangi, hakuva a vanhu vontlhe va wa tshama kakwe va mu ingisela, va nga suki.
Mitlhamuselo ya lahasi
^ Kutani: “yivele”.
^ A pondo ya ciGreki yi wa peza a 340 wa tigrama. Ku alakanyiwa lezvaku yi wa ringana a 100 wa tidrakma.
^ Kutani: “vayimeli”.
^ Kutani: “mufumo”.
^ Hi kukongoma: “prata”.
^ Hi kukongoma: “prata”.
