Luka 20:1-47
20 Ka gin’we ga masiku lawa Jesu a nga kari a gondzisa vanhu lomu tempeleni ni ku kanela mahungu ya ma nene, ku nota kakwe a vapristi lava va tihosana ni vatsali ni madhota
2 va taku: “Hi nga hi byela, i ntamu muni u mahako hi wona zvilo lezvi? Kona himani a nga ku nyika a ntamu lowu?”
3 I no va hlamula aku: “Minawu ndzi ta mu wutisa ciwutiso, ndzi hlamuleni:
4 A kubhabhatisa ka Johani ku wata hi le tilweni kutani hi ka vanhu?”
5 Va no bhulisana vaku: “Loku hiku: ‘Ku wata hi le tilweni’, i taku: ‘Hikuyini mu nga kala ku kholwa kakwe ke?’
6 Kanilezvi, loku hiku: ‘Ku wata hi ka vanhu’, a vanhu vontlhe va ta hi gandla hi maribye, hakuva va kholwa lezvaku Johani i wa hi muphrofeti.”
7 Hikwalaho va no hlamula vaku a va zvi tivi lezvaku ku wata hi kwihi.
8 Jesu aku kabye: “Minawu ndzi nga ta mu byela a ku i ntamu muni ndzi mahako hi wona a zvilo lezvi.”
9 Makunu i no hlawutela mufananiso lowu ka vanhu aku: “A wanuna wo kari i no byala simu ga mauvha, a gi nyikela ka varimi, yena a endza aya tikweni gin’wani a ya mbheta cikhati co leha.
10 Hi nguva ya mihandzu, i no ruma citiri ciya ka varimi lezvaku va ya ci nyika a mihandzu yo kari ya simu. Kanilezvi a varimi va no ci khoma vaba, va ci tlhelisa na ci nga hi na nchumu.
11 I no tlhela a rumela cin’wani citiri. Leci conawu va no ciba, va ci wisa tingana va gumesa va ci tlhelisa na ci nga hi na nchumu.
12 I no tlhela a rumela citiri ca wunharu; va no ci bayisa va ci hoxa lahandle.
13 Hi kota ya lezvo, a n’winyi wa simu i te ngalo: ‘Ndzi ta kuyini? Ndzi ta rumela n’wana wa mina, loyi ndzi mu randzako. Kuzvilava yena va ta mu chava.’
14 A cikhati leci a varimi va nga mu wona va no byelana vaku: ‘Loyi hi yena mugi wa tshomba. A hi mu dayeni hi fela ku sala ni tshomba.’
15 Hikwalaho, va no mu hoxa lahandle ka simu, va mu daya. Makunu a n’winyi wa simu i ta va maha yini a varimi lavo ke?
16 I tata a ta daya varimi lavo a gumesa a nyikela simu ka van’wani varimi.”
Laha va ngazwa lezvo va te ngalo: “Zvi nga tshuki zvi maheka!”
17 Kanilezvi i no va cuwuka, aku: “Kasi zvi wula yini lezvi zvi tsalilweko zva ku ngalo: ‘A ribye legi gi nga aliwa hi vaaki give gona ribye ga laha khoneni ga lisima ka wontlhe’?*
18 Ni wihi a to wela ribye legi, i ta pswhandleka. Ni loyi gi to mu wela, gi ta mu sila a ku bhi.”
19 A vatsali ni vapristi lava va tihosana va no lava ndlela ya ku mu khoma hi cikhati caleco, kanilezvi va wa chava vanhu, hakuva va wa zvi tiva lezvaku i hlawutele mufananiso lowu na a wula vona.
20 Andzhako ka loku va mu cuwukele khwatsi, va no rumela vavanuna lava va nga va xavile cihundleni va ya ti maha ku khwatsi vanhu vo lulama, kasi va mu phasa kuwulawuleni kakwe lezvaku va mu nyikela wuhosini ni mandleni ya govhernadhori.
21 Va no mu wutisa vaku: “Mugondzisi, ha zvi tiva lezvaku u wulawula khwatsi niku wa gondzisa khwatsi, ni lezvaku a wu na cihlawulela, kanilezvi u gondzisa a ndlela ya Nungungulu hi lisine:
22 Zva fanela* ku hi humesa khupo ka Khezari kutani a zvi faneli?”
23 Kanilezvi i no pola a mano yabye, aku kabye:
24 “Ndzi kombeni a dhenaryo.* A mufananiso lowu ni mutsalo wa kona zva mani?” Vaku: “Zva Khezari.”
25 Jesu aku kabye: “Hi zvalezvo, tlhelisani ka Khezari lezvi zvi nga zva Khezari, ni ka Nungungulu lezvi zvi nga zva Nungungulu.”
26 Hikwalaho a va zvi kotangi ku mu phasa kuwulawuleni kakwe mahlweni ka vanhu, kanilezvi va no hlamala hi hlamulo wakwe, va miyela.
27 Hambulezvo a vaSadhusi vo kari, lava va nge a vafileko va nga ta vhuka, va nota va ta mu wutisa, vaku:
28 “Mugondzisi, Mosi i hi tsalele, aku: ‘Loku a makabye wa wokari afa a siya sati, na a nga hi na n’wana, a makabye wakwe i wa hlambele* sati wa matsuva kasi a mu pswalela vana a makabye wakwe.’
29 Makunu ku wa hi ni 7 wa vavanuna va nga hi va ka makabye. Loyi wa nhondzo i no teka sati, kanilezvi i nofa na a nga hi na n’wana.
30 Zvi no mahisa lezvo ni ka wa wumbiri
31 a sala a chadha ni loyi wa wunharu. Zvi mahisa zvezvo ka vontlhe va 7; va nofa na va nga siyangi vana.
32 Hi magumo a wasati yenawu i nofa.
33 Makunu, kuvhukeni ka vafileko i tava sati wa mani? Hakuva i vile sati wa vontlhe va 7.”
34 Jesu aku kabye: “A vanana va nguva* leyi va chadha,
35 kanilezvi lava va ringanelwako hi ku hanya ka nguva yi tako ni ku vhuka hi ka vafileko a va chadhi.
36 A va hafi kambe hakuva va fana ni tingilozi; i vanana va Nungungulu hi lezvi va nga vanana va kuvhuka hi ka vafileko.
37 Kanilezvi xungetano hi kuvhuka ka vafileko, hambu Mosi i zvi kombisile ka matimu ma wulawulako hi khuhu ga mimizwa, laha a ngaku Jehovha ‘i Nungungulu wa Abrahama, ni Nungungulu wa Isaka, ni Nungungulu wa Jakobe’.
38 A hi Nungungulu wa vafileko, kanilezvi wa vahanyako, hakuva ka yena* vontlhe va hanya.”
39 A vatsali vo kari va no mu hlamula vaku: “Mugondzisi, u wulile zvona.”
40 Hakuva va wa nga ha tiyi ku mu wutisa nchumu.
41 Andzhako ka lezvo i no va wutisa aku: “Hikuyini va wulako lezvaku Kristu i n’wana wa Dhavhidha?
42 Hakuva Dhavhidha wa wula ka bhuku ga Tisimu aku: ‘Jehovha i te ngalo ka Hosi ya mina: “Tshama reveni ga mina ga cinene
43 kala ndzi veka valala va wena kota cikhegetelo ca mikondzo ya wena.”’
44 Hikwalaho Dhavhidha i mu vitana ku i Hosi, makunu zvi mahisa kuyini ku tlhela ava n’wana wakwe ke?”
45 Na vanhu vontlhe va kari va mu ingisela i no byela vapizani vakwe aku:
46 “Ti woneleni ka vatsali lava va randzako ku fambafamba na va bohile tinguwo to leha, ni ku losiwa lomu ko tala vanhu* ni ku randza zvitulo zva le phambeni* lomu masinagogeni ni zvitshamu zva le phambeni lomu tifesteni,
47 kanilezvi na va phanga a tiyindlu ta* lava vo felwa hi vanuna ni ku maha mikhongelo yo leha kasi ku woniwa* hi vanhu. A vanhu lava va ta tsayisiwa hi tsayiselelo wa hombe.”*
Mitlhamuselo ya lahasi
^ A ribye legi gi wa vekiwa laha khoneni ku tlhanganako makhurisi mambiri kasi ku ma tiyisa.
^ Kutani: “Zvi lulamile”.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “teke”.
^ Wona Tlhamuselo wa magezu ya Bhibhiliya.
^ Kutani: “kuwoneni kakwe”.
^ Kutani: “lomu mamerkadho”.
^ Kutani: “zva zvi nene nguvhu”.
^ Kutani: “zvilo zva”.
^ Kutani: “hlamaliwa”.
^ Kutani: “zva xapi”.
