Luka 21:1-38
21 Jesu i no tlakusa matihlo a wona lava vo ganya na va chela zvinyikiwo zvabye makaxeni ya minyikelo.*
2 I no wona a wasati wa cisiwana wo felwa hi nuna na a chela zvingerengere zvimbiri zva ntsengo wa wutsongwani nguvhu,*
3 aku: “Ndza tiyisa ka n’wina ndziku: A wasati loyi wa cisiwana wo felwa hi nuna i chelile zvotala a ku hundza vontlhe.
4 Hakuva vontlhe va no chela lezvi zvi nga va salela, kanilezvi a wasati loyi, ka wusiwana gakwe, i chelile zvontlhe a nga hi nazvo lezvi a nga wa ta hanya hi zvona.”
5 Andzhako ka cikhati laha a vokari va nga kari va wulawula hi tempeli, hi lezvi yi nga sasekisisilwe zvona hi maribye ya ma nene ni zvilo zvi nga nyikelwe ka Nungungulu,
6 Jesu i te ngalo: “Xungetano hi zvilo lezvi mu zvi wonako, mata masiku lawa ku to kala ku nga siyiwi ribye laha hehla ka gin’wani, wontlhe ma ta khungumulwa.”
7 Va no mu wutisa vaku: “Mugondzisi, kasi a zvilo lezvi zvi ta maheka rini? Kona ci tava cihi a cikombiso ca lezvaku a zvilo lezvi zvi lava ku maheka?”
8 Jesu aku ngalo: “Ti woneleni kasi mu nga hambukisiwi, hakuva a votala va tata hi vito ga mina va taku: ‘Hi mina yena’, va tlhela vaku: ‘A cikhati ca kona ci tshinele.’ Mu nga va landzeli.
9 Ahandle ka lezvo, loku muzwa guwa ga tiyimpi ni gujeguje,* mu nga chavi. Hakuva a zvilo lezvi zvi fanele ku ranga zvi maheka, kanilezvi a kugumesa ku nga ta tekela ku chikela.”
10 I no engeta aku kabye: “A tiko gi ta vhukela tiko, ni mufumo wu vhukela mufumo.
11 Ku tava ni kutsekatseka ka hombe ka misava, ni tindlala ni mitungu ka matshamu yo hambanahambana; ku tava ni zviwoniso zvo chavisa ni zviwoniso zva hombe le tilweni.
12 “Kanilezvi, na zvi nga se maheka zvontlhe zvilo lezvi, a vanhu va ta mu khoma ni ku mu xanisa, va mu nyikela masinagogeni ni ku mu vhalela mapaxweni. Va ta mu yisa ka tihosi ni ka vafumeli hi kota ya vito ga mina.
13 Zvi ta mu vhululela ndlela ya ku nyika wukustumunyu.
14 Hikwalaho, mu ngazi mu ti karata hi ku ranga mu alakanyela lezvi mu to wula kasi ku ti yimela,
15 hakuva ndzi ta mu nyika magezu ni wutlhari legi vontlhe a valala va n’wina va to tsandzeka ku gi kaneta kutani ku gi phikiza.
16 Ahandle ka lezvo, mu ta nyikelwa* hi vapswali va n’wina, ni vamakabye va n’wina, ni maxaka ya n’wina, ni vanghana va n’wina; va ta dayisa vokari cikari ka n’wina.
17 Mu ta vengiwa hi vanhu vontlhe hi kota ya vito ga mina.
18 Kanilezvi hambu ni sisi wun’we wa tihloko ta n’wina wu nga ta lova.
19 Hi kutimisela ka n’wina mu ta ponisa wutomi ga n’wina.*
20 “Kanilezvi, loku mu wona Jerusalema na a randzelwe hi masochwa, zvi tiveni lezvaku a kuhahlulwa kakwe ku tshinele.
21 Makunu lava va nga Judhiya a va tsutsumele zvitsungeni, lava va nga cikari ka Jerusalema a va hume, ni lava va nga le handle kakwe va nga ngheni ka yena,
22 hakuva lawo masiku ya kuphota, kasi zvontlhe lezvi zvi tsalilweko zvi fela ku tatiseka.
23 Va xanisekile a vavasati lava va to kumiwa hi masiku lawo na va hi ni tinyimba ni lava va to kumiwa na va an’wisa! Hakuva ku tava ni kukarateka ka hombe misaveni ni zanga hehla ka vanhu lava.
24 A vanhu va ta dawa hi cipadha va khomiwa va yiswa matikweni wontlhe. Jerusalema i ta kandzihelwa hi matiko* kala ku mbhela a cikhati ci yimisilweko ca matiko.*
25 “A cin’wani kambe, ku tava ni zviwoniso ka gambo ni ka hweti ni ka tinyeleti; laha misaveni a matiko ma ta karateka nguvhu ma nga tivi ni co maha hi kota ya kudzindza ni kuvhindluka ka bimbi.
26 A vanhu va ta titivala hi kuchava ni hi kota ya lezvi zvi tako tikweni, hakuva a mintamu ya le tilweni yi ta tsekatsekiswa.
27 Hi kulandzela, va ta wona N’wana wa munhu na ata hi refu na a hi ni ntamu ni kungangamela ka hombe.
28 Kanilezvi loku a zvilo lezvi zvi sangula ku maheka, ololokani mu tlakusa tihloko ta n’wina hakuva a kutlhatlhiswa ka n’wina ka tshinela.”
29 Hikwalaho i no va hlawutela mufananiso aku: “Cuwukani nkuwu ni tisinya tontlhe.
30 Loku ti sangula ku hluka ma zvi wona mu tlhela mu zvi tiva ha n’wece lezvaku a cimumu ci chikele.
31 Makunu n’winawu, loku mu wona zvilo lezvi na zvi maheka zvi tiveni lezvaku a Mufumo wa Nungungulu wu tshinele.
32 Ndza tiyisa ka n’wina ndziku: A cizukulwana leci ci nga ta hundza na zvi nga se maheka zvontlhe a zvilo lezvi.
33 A tilo ni misava zvi ta hundza kanilezvi a timhaka ta mina ti nga ta hundza.
34 “Kanilezvi ti woneleni kasi a timbilu ta n’wina ti nga tshuki ti bindziwa hi limito* ni kupopiwa ni ku karateka hi wutomi, a siku lego gi mu chikelela hi citshuketi
35 a ku khwatsi i ntlhamu. Hakuva gi tata ka vontlhe lava va hanyako misaveni yontlhe.
36 Hikwalaho, tshamani na mu khindlimukile, mu khongela contlhe cikhati kasi mu pona ka zvontlhe lezvi zvi to maheka ni ku yima mahlweni ka N’wana wa munhu.”
37 Ni mumu i wa gondzisa tempeleni kanilezvi loku gi phuma i wa huma a ya etlela citsungeni ci vitaniwako ku Citsunga ca maOlivha.
38 A vanhu vontlhe va wa vindzuka ni mixo vata ka yena tempeleni, kasi ku ta muzwa.
Mitlhamuselo ya lahasi
^ A makaxa lawo ya minyikelo ma wa hi ya matshamela yo hambanahambana. A yokari ma wa fana ni mimpundzu.
^ Hi kukongoma: “tileptoni timbiri”.
^ Kutani: “nyenganyenga; vhilinganya”.
^ Kutani: “tokometwa”.
^ Kutani: “kuma mihefemulo ya n’wina”.
^ Kutani: “vamatiko”.
^ Kutani: “vamatiko”.
^ Kutani: “kuga u hundzeleta”.
