Luka 23:1-56
23 Hikwalaho a citshungu contlhe ci no suka ci famba naye ka Pilatu.
2 Va no sangula ku mu lumbeta vaku: “Hi kumile wanuna loyi na a hambukisa tiko ga hina, a betela vanhu ku hakhela mikhupo ka Khezari, a tlhela aku hi yena Kristu a hosi.”
3 Makunu Pilatu i no mu wutisa aku: “Hi wena Hosi ya vaJudha ke?” Jesu a hlamula aku: “U wula zvona.”
4 Pilatu i no byela vapristi lava va tihosana ni citshungu aku: “A ndzi kumi nandzu ka wanuna loyi.”
5 Kanilezvi va no phikiza vaku: “I vhuxa vhilinganya cikari ka vanhu hi ku gondzisa tikweni gontlhe ga Judhiya; i sangulile hi le Galileya aza a chikela ni laha.”
6 A cikhati leci Pilatu a ngazwa lezvo i no wutisa lezvaku a wanuna loyi i wa hi wa le Galileya ke.
7 Loku a tivile lezvaku Jesu i wa hi wa cipandze leci ci nga fumelwa hi Herodhi, i no mu rumela ka Herodhi, loyi a nga hi Jerusalema ka lawo masiku.
8 A cikhati leci Herodhi a nga wona Jesu i no tsaka nguvhu. Ku wa hundza cikhati co leha na a lava ku mu wona hakuva i wa zwile zvotala hi yena, niku i wa xuva ku mu wona na a maha ciwoniso.
9 Hikwalaho i no mu wutisela timhaka to tala, kanilezvi a nga mu hlamulangi nchumu.
10 Kanilezvi a vapristi lava va tihosana ni vatsali va no simama va yimile va mu lumbeta na va zangarile nguvhu.
11 Makunu Herodhi zvin’we ni masochwa yakwe i no mu chepeta, a mu poyila, a mu bohisa nguwo yo saseka a gumesa a mu tlhelisa ka Pilatu.
12 Ka siku lego, Herodhi na Pilatu, lava a kale va nga vengana, va no maha vanghana.
13 Pilatu i no tlhanganisa vapristi lava va tihosana ni tihosi ni vafumeli ni vanhu,
14 aku kabye: “Mu ndzi tisele wanuna loyi na mu ku i kucetela vanhu ku vhukela mufumo. Ndzi mu hlolile mahlweni ka n’wina kanilezvi a ndzi kumangi nandzu ka lezvi mu mu lumbetako.
15 Kunene, hambu Herodhi a nga kumangi nandzu ka yena, hakuva i mu wuyisile ka hina. A munhu loyi a nga mahangi nchumu wu ringanako ku a dawa.
16 Hikwalaho ndzi ta mu tsayisa ndzi gumesa ndzi mu tlhatlha.”
17 *——
18 Kanilezvi a citshungu contlhe ci no banguleka ciku: “Daya wanuna loyi,* u hi tlhatlhela Bharabhasi!”
19 (Bharabhasi i wa vhalelwe paxweni hi lezvi a nga hlengele ka pfilupfilu yo vhukela mufumo yi nga mahekile lomu dhoropeni ni hi kota ya kudaya.)
20 Pilatu i no wulawula navo kambe hakuva i wa lava ku tlhatlha Jesu.
21 Kanilezvi va no banguleka nguvhu vaku: “I waye mhandzeni! I waye mhandzeni!”*
22 I no va wutisa hi khati ga wunharu aku: “Hikuyini? Cini a nga goha a wanuna loyi? A ndzi kumangi nchumu kakwe wu ringanako ku a dawa. Hikwalaho ndzi ta mu tsayisa ndzi gumesa ndzi mu tlhatlha.”
23 Kanilezvi va no kurumeta va banguleka nguvhu va ku i wa dawe.* A magezu yabye ma no mu hlula.
24 Hikwalaho Pilatu i no tsema mhaka, a va mahela lezvi va nga zvi lava.
25 I no va tlhatlhela a wanuna loyi va nga mu lava, a nga vhalelwe paxweni hi ku hlengela ka pfilupfilu yo vhukela mufumo ni ku daya, a gumesa a va nyika Jesu va maha kurandza kabye.
26 Laha va nga kari va huma naye, va no khoma wanuna wo kari a vitaniwako ku hi Simoni wa le Kirene, a ngata hi le handle ka dhoropa, va mu rwexa a mhandze ya hlomulo,* a landza Jesu.
27 Ku wa hi ni citshungu ca hombe ca vanhu ci nga mu landzela, a ku patsa ni vavasati lava va nga tiba zvifuva hi kubayiseka, va mu rilela.
28 Jesu i no hundzuluka a cuwuka vavasati lavo aku: “Vanhanyana va Jerusalema, tsikani ku ndzi rilela. Kanilezvi ti rileleni ga n’wina ni vana va n’wina;
29 hakuva mata masiku lawa a vanhu va to wula vaku: ‘Va katekile a vavasati lava va nga tingon’wa, ni marumbu lawa ma nga kala ku pswala, ni mavele lawa ma nga kala ku an’wisa!’
30 Ka cikhati leco, va ta sangula ku byela zvitsunga vaku: ‘Hi weleni!’, ni ka zvitsungana vaku: ‘Hi khubhunyeteni!’
31 Loku va maha lezvi a sinya na ya ha nyukile, ku ta humelela yini a cikhati leci yi to woma?”
32 Ku wa hi ni vavanuna vambiri, va zvigevenga, lava vonawu va ngaya va ya dawa zvin’we na Jesu.
33 A cikhati va nga chikela ka wutshamu gi vitaniwako ku Cirwarwa,* va no mu belela laha mhandzeni ni zvigevenga matlhelweni yakwe, a cin’we reveni gakwe ga cinene ni cin’wani reveni gakwe ga cibhabha.
34 Kanilezvi Jesu aku ngalo: “Papayi, va tsetselele, hakuva a va zvi tivi lezvi va mahako.” Ahandle ka lezvo, va noba tihlolo kasi va avelana tinguwo takwe.
35 A vanhu va no yima va cuwukela. Kanilezvi a vafumeli va wo mu poyila vaku: “I hanyisile van’wani; makunu i wa ti hanyise loku a hi yena Kristu wa Nungungulu, Loyi a Hlawulilweko.”
36 Hambu a masochwa ma no mu poyila, mata kakwe ma ta mu nyika vhinyo yo dzunga
37 maku: “Loku u hi Hosi ya vaJudha, ti ponise.”
38 Ku wa hi ni mutsalo hehla kakwe waku: “Leyi i Hosi ya vaJudha.”
39 A cin’we ca zvigevenga ci nga hayekilwe laho ci no sangula ku mu ruka ciku: “A hi wena Kristu ke? Ti ponise u tlhela u ponisa na hinawu!”
40 Leci cin’wani ci no mu kawuka ciku: “A wu chavi Nungungulu hambu lezvi u tsayisilweko ku fana na yena ke?
41 Hina zva hi ringana, hakuva ho amukela a nchachazelo wa lezvi hi nga maha; kanilezvi a wanuna loyi a nga gohangi nchumu.”
42 Ci no engeta ciku: “Jesu, ndzi alakanye a cikhati leci u to nghena Mufun’weni wa wena.”
43 Jesu i no mu hlamula aku: “Ndza tiyisa ka wena nyamutlha ndziku: U tava na mina Paradhiseni.”
44 Makunu kwalomu ka ma 12 hora,* ku nova ni munyama misaveni yontlhe kala 15 hora,*
45 hakuva a gambo gi no timeka; ni kortina ga wutshamu go basa gi handzuka hi laha cikari.
46 Jesu i no vitana hi gezu ga hombe aku: “Papayi, ndza nyikela a moya wa mina mandleni ya wena.” Andzhako ka ku wula timhaka leti, i nofa.*
47 Laha a hosana ya masochwa yi nga wona lezvi zvi nga maheka, yi no dhumisa Nungungulu yiku: “Hakunene, a wanuna loyi i wa lulamile.”
48 A cikhati leci a citshungu contlhe ci nga hi laho kasi ku wona kudawa kakwe ci nga wona lezvi zvi nga maheka, ci no tlhela kaya na ci tiba zvifuva.
49 Vontlhe lava va nga tolovelene naye, zvin’we ni vavasati lava va nga tile naye hi Galileya, va no yima hi le kule va wona zvilo lezvi.
50 Ku wa hi ni wanuna a vitaniwako ku hi Josefa, a ciro ca Tribhunali ya Hombe ya vaJudha, a nga hi munhu wa mu nene ni wo lulama.
51 (A wanuna loye i wa nga seketelangi a cikungo cabye ni zvimaho zvabye.) I wata hi le Arimateya, a dhoropa ga Judhiya, niku i wa rindzela a Mufumo wa Nungungulu.
52 I noya ka Pilatu a ya kombela cirumbi ca Jesu.
53 I no chisa cirumbi, a ci phutsela ka nguwo ya yi nene ya wukene,* a gumesa a ci lata ka cilahla ci nga kehlilwe* laha ribyeni, lomu ku nga kala ku nga se lahliwa munhu.
54 Makunu ku wa hi siku ga Kulongisela; a sabhadho gi wa lava ku sangula.
55 Kanilezvi a vavasati lava va nga tile naye hi le Galileya va no mu landza va ya wona cilahla ni lezvi a cirumbi cakwe ci nga latisilwe zvona.
56 Va no tlhela va ya longisela a powa yo nuhela ni mafura yo nuhela. Kanilezvi hi sabhadho va no humula kota kulaya ka nayo.
Mitlhamuselo ya lahasi
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
^ Hi kukongoma: “Susa munhu loyi”.
^ Kutani: “Mu daye mhandzeni! Mu daye mhandzeni!”
^ Kutani: “mu daye mhandzeni”.
^ Wona Tlhamuselo wa magezu ya Bhibhiliya.
^ Kutani: “Cikodo; Cikuwa”.
^ Hi kukongoma: “kwalomu ka hora ya wu 6”.
^ Hi kukongoma: “ka hora ya wu 9”.
^ Kutani: “i no hefemula khati go gumesa”.
^ Kutani: “linyo”.
^ Kutani: “bhoxilwe”.
