Luka 3:1-38
3 Hi lembe ga wu 15 ga kufuma ka Tibheriyusi Khezari, a cikhati leci Pontiyu Pilatu a nga hi govhernadhori wa Judhiya, Herodhi* na a hi adhimistradhori wa Galileya, na Filipu a makabye wakwe a hi adhimistradhori wa tiko ga Itureya ni Trakoniti, Lisaniya na a hi adhimistradhori wa Abhileni,
2 masikwini ya Anasi, a hosana ya vapristi, na Kayafasi, a mhaka ya Nungungulu yi nota ka Johani a n’wana wa Zakariya le ciwuleni.
3 Hikwalaho i no fambafamba tikweni gontlhe matlhelweni ya Jordhani, a chumayela hi kubhabhatisa kota cikombiso ca kutisola kasi ku tsetselelwa zviwonho,
4 khwatsi hi lezvi zvi tsalilweko ka bhuku ga timhaka ta muphrofeti Isaya, zvaku: “Ku zwala gezu ga loyi a huwelelako ciwuleni, aku: ‘Longiselani ndlela ya Jehovha! Lulametani maruwa yakwe.
5 Seletelani mindzhelelo yontlhe, mu khungumula a zvitsunga ni zvitsungana zvontlhe; lulametani a tindlela to jikajika, mu bambatela a tindlela ta zvikhele;
6 ni vanhu vontlhe va* ta wona a kuhanyisa ka Nungungulu.’”*
7 Hikwalaho i no byela a citshungu leci ci nga kari cita kakwe ci ta bhabhatiswa aku: “N’wina vana va tinyoka, mu byelilwe hi mani lezvaku mu nga tsutsuma a zanga yi tako?
8 Pswalani mihandzu yi kombako ku ma ti sola. Mu nga ti byeli muku: ‘Hina hi vana va Abrahama.’ Hakuva ndza mu byela lezvaku Nungungulu wa zvi kota ku mu humesela vana Abrahama hi ka maribye lawa.
9 A bhewula* gi longile ku tsema tisinya hi le mitswini. Hikwalaho, a tisinya tontlhe ti nga pswaliko mihandzu ya yi nene ti ta tsemiwa ti hoxiwa ndzilweni.”
10 A citshungu ci no mu wutisa ciku: “Makunu zvini hi faneleko ku maha?”
11 I no va hlamula aku: “Loyi a nga ni tinguwo timbiri* i wa avele loyi a nga hava, ni loyi a nga ni zvakuga i wa mahewo zvalezvo.”
12 Hambu a vakhupisi va waya kakwe kasi va ya bhabhatiswa, vaku kakwe: “Mugondzisi, zvini hi faneleko ku maha?”
13 Aku kabye: “Mu nga londzi* khupo wo hundza lowu wu yimisilweko hi nayo.”
14 A masochwa wonawu ma wa mu wutisa maku: “Zvini hi faneleko ku maha?” Aku kabye: “Mu nga maheli munhu xapi* hambu ku lumbeta munhu mawunwa, kanilezvi eneliswani hi lezvi mu nyikiwako.”*
15 A vanhu va wa kari va rindzela Kristu, niku vontlhe va wa ti wutisa timbilwini tabye xungetano hi Johani vaku: “A kova yena Kristu yaloyi ke?”
16 Johani i no va hlamula vontlhe aku: “Mina ndzi mu bhabhatisa hi mati, kanilezvi wata loyi a nga ni ntamu wa ku hundza mina, wa ku a ndzi ringanelwi hi ku tlhatlha tingoti ta zvilato* zvakwe. Yena i ta mu bhabhatisa hi moya wo basa ni ndzilo.
17 I khomile foxola go hehera hi gona kasi ku swiyela wutshamu gakwe go hulela kona gi basa khwatsi, a hlengeletela trigo tshaleni gakwe, kanilezvi a mungu* i ta wu hisa hi ndzilo wu nga timekiko.”
18 I no va nyika zvin’wani zvitlharihiso zvo tala ni ku simama ku kanela mahungu ya ma nene ka vanhu.
19 Kanilezvi i no kawuka Herodhi, a mufumeli wa dhistrito, hi kota ya Herodhiya a sati wa makabye wakwe,* ni hi kota ya mitiro yontlhe ya kubiha leyi Herodhi a nga yi mahile.
20 Herodhi i no engetela a kubiha loko hi ku khoma Johani a mu vhalela paxweni.
21 Makunu laha a vanhu vontlhe va nga bhabhatisilwe, Jesu yenawu i no bhabhatiswa. Na a kari a khongela a tilo gi no vhululeka,
22 ku relela a moya wo basa hehla kakwe na wu ku khwatsi i tuva, ku tlhela ku zwala gezu hi le tilweni giku: “Wena u N’wana wa mina ndzi ku randzako, ndza xalala hi wena.”
23 A cikhati leci Jesu a nga sangula ntiro wakwe, i wa hi ni cipimo ca 30 wa malembe, na va alakanya lezvaku i n’wana
wa Josefa,Josefa wa Heli,
24 Heli wa Matate,Matate wa Levhi,Levhi wa Melki,Melki wa Janayi,Janayi wa Josefa,
25 Josefa wa Matatiyasi,Matatiyasi wa Amosi,Amosi wa Nahume,Nahume wa Esli,Esli wa Nagayi,
26 Nagayi wa Maati,Maati wa Matatiyasi,Matatiyasi wa Semeyi,Semeyi wa Joseke,Joseke wa Jodha,
27 Jodha wa Jowanani,Jowanani wa Resa,Resa wa Zerubhabheli,Zerubhabheli wa Salatiyeli,Salatiyeli wa Neri,
28 Neri wa Melki,Melki wa Adhi,Adhi wa Kosamu,Kosamu wa Elmadhamu,Elmadhamu wa Eri,
29 Eri wa Jesu,Jesu wa Eliyezeri,Eliyezeri wa Jorimu,Jorimu wa Matate,Matate wa Levhi,
30 Levhi wa Simeyoni,Simeyoni wa Judhasi,Judhasi wa Josefa,Josefa wa Jonamu,Jonamu wa Eliyakimu,
31 Eliyakimu wa Meleya,Meleya wa Mena,Mena wa Matata,Matata wa Natani,Natani wa Dhavhidha,
32 Dhavhidha wa Jese,Jese wa Obhedhi,Obhedhi wa Bhowazi,Bhowazi wa Salimoni,Salimoni wa Naxoni,
33 Naxoni wa Aminadhabha,Aminadhabha wa Arni,Arni wa Hezroni,Hezroni wa Perezi,Perezi wa Judha,
34 Judha wa Jakobe,Jakobe wa Isaka,Isaka wa Abrahama,Abrahama wa Tera,Tera wa Nahori,
35 Nahori wa Seruge,Seruge wa Rewu,Rewu wa Pelegi,Pelegi wa Ebheri,Ebheri wa Xela,
36 Xela wa Kayinani,Kayinani wa Arfaxadhe,Arfaxadhe wa Xemi,Xemi wa Nowa,Nowa wa Lameki,
37 Lameki wa Metusela, Metusela wa Enoki, Enoki wa Jeredhe,Jeredhe wa Mahalaleli,Mahalaleli wa Kayinani,
38 Kayinani wa Enosi,Enosi wa Sete,Sete wa Adhamu,Adhamu wa Nungungulu.
Mitlhamuselo ya lahasi
^ Ku nga Herodhi Antipasi. Wona Tlhamuselo wa magezu ya Bhibhiliya.
^ Kutani: “ni nyama yontlhe yi”.
^ Kutani: “leci Nungungulu a hanyisako hi cona”.
^ Kutani: “chapo”.
^ Kutani: “a nga ni yin’wani nguwo ahandle ka leyi a nga boha”.
^ Kutani: “teki”.
^ Kutani: “Mu nga wutleli munhu nchumu”.
^ Kutani: “hi muholo wa n’wina”.
^ Hi kukongoma: “masandalya”.
^ A mungu hi lezvi zvi humako a cikhati leci va tsutsutako timbewu.
^ Kutani: “a sati wa makabye wa Herodhi”.
