Luka 4:1-44
4 Jesu na a tele hi moya wo basa, i no suka Jordhani. Na a rangelwa hi moya lomu ciwuleni,
2 i no mbheta 40 wa masiku na a ringiwa hi Sathani.* A nga gangi nchumu ka masiku lawo, hikwalaho a cikhati leci ma nga mbhela i nozwa ndlala.
3 Laha Sathani* a nga wona lezvo i te ngalo kakwe: “Loku u hi n’wana wa Nungungulu, byela a ribye legi gi cica gi maha pawa.”
4 Kanilezvi Jesu i no mu hlamula aku: “Ku tsalilwe ku ngalo: ‘A munhu a nga hanyi hi zvakuga* basi.’”
5 Sathani* i no mu yisa hehla ka citsunga a ya mu komba mifumo yontlhe ya misava hi cikhatanyana,
6 aku kakwe: “Ndzi ta ku nyika mifumo yontlhe leyi ni zviphatiphati zva yona, hakuva yi nyikilwe mina niku ndzi yi nyika ni wihi ndzi mu lavako.
7 Hikwalaho loku u ndzi khozela,* yontlhe yi tava ya wena.”
8 Jesu i no mu hlamula aku: “Ku tsalilwe ku ngalo: ‘Khozela Jehovha Nungungulu wa wena, hi yena yece u faneleko ku mu tirela.’”
9 I no mu yisa Jerusalema a ya mu yimisa le cixungweni ca* tempeli aku kakwe: “Loku u hi n’wana wa Nungungulu, ti tsikelete uwa lahasi,
10 hakuva ku tsalilwe ku ngalo: ‘I ta ruma tingilozi takwe lezvaku ti ku hlayisa’,
11 niku: ‘Ti ta ku khamukela mandleni ya tona kasi a nkondzo wa wena wu nga gumuli ribye.’”
12 Jesu i no mu hlamula aku: “Ku wulilwe ku ngalo: ‘U nga ringi Jehovha Nungungulu wa wena.’”
13 Makunu laha Sathani* a nga mbhetile ku mu ringa, i no suka kakwe a ya rindzela cikhati cin’wani ca ci nene.
14 Jesu i no tlhela Galileya hi ntamu wa moya wo basa. A mahungu ya ma nene xungetano hi yena ma no hangalaka matlhelweni wontlhe ya laha kusuhani.
15 I no sangula ku gondzisa masinagogeni* yabye, a dzundziwa hi vontlhe.
16 Andzhako ka lezvo, i noya Nazareta lomu a nga kulela kona. Kota lezvi a nga tolovela ku maha hi siku ga sabhadho, i no nghena sinagogeni a yima kasi ku lera.
17 I no nyikiwa a bhuku ga muphrofeti Isaya a vhulula, a kuma laha ku nga tsalilwe lezvi:
18 “A moya wa Jehovha wu hehla ka mina, hakuva i ndzi totile kasi ku kanela mahungu ya ma nene ka zvisiwana. I ndzi rumele ku ta huwelela kutlhatlhiswa ka lava va bohilweko ni ku tlhelisela kuwona ka zvikhumu ni ku tlhatlhisa lava va nga hlomulweni,
19 ni ku chumayela a cikhati ca Jehovha ca ku mahela vanhu wuxinji.”
20 Andzhako ka lezvo, i no vhala bhuku a gi tlhelisa ka nandza, a tshama hasi. Vontlhe lava va nga hi lomu sinagogeni va no mu cuwuka.
21 I no gumesa a va byela lezvi: “A mutsalo lowu ma ha mbhetako ku wuzwa wu tatisekile nyamutlha.”
22 Vontlhe va no sangula ku mu dzundza ni ku hlamaliswa hi timhaka to saseka ti nga huma non’wini wakwe, vaku: “Loyi a hi yena n’wana wa Josefa ke?”
23 Hikwalaho, Jesu i te ngalo kabye: “Hakunene mu ta wula ka mina a vingu legi gaku: ‘Dhokodhela, ti hanyise hi wece. Lezvi hi ngazwa ku u mahile le Kapernawume, zvi mahe ni lomu tikweni ga wena.’”
24 Aku kabye: “Ndza tiyisa ka n’wina ndziku: A ku na muphrofeti a amukelwako tikweni gakwe ga mabeleko.
25 Ndza mu byela lisine ndziku: Ku wa hi ni vavasati vo tala va nga felwe hi vanuna tikweni ga Izrayeli masikwini ya Elija, a cikhati leci a vhula yi nga mbheta malembe manharu ni khihlanya na yi ngani, kuva ni ndlala ya hombe tikweni gontlhe.
26 Hambulezvo, Elija a nga rumelwangi hambu ni ka mun’we wa vavasati lavo, ntsena ka loyi wo felwa hi nuna wa le Zarefate tikweni ga Sidhoni.
27 A cin’wani kambe, ku wa hi ni vanhu vo tala va nga hi ni hlokonho lomu Izrayeli masikwini ya muphrofeti Elixa; hambulezvo i hava ni mun’we cikari kabye a nga basiswa,* saseka Namani, a muSiriya.”
28 Laha va ngazwa zvilo lezvi, vontlhe lava va nga hi lomu sinagogeni va no zangara nguvhu,
29 va ku kakatsuko va mu humesa hi kuhatlisa lomu dhoropeni, va famba naye le hehla ka citsunga leci a dhoropa gabye gi nga akilwe ka cona, kasi va fela ku ya mu hoxa awa hi hloko.
30 Kanilezvi i no tsemakanya hi lomu cikari kabye a ti fambela.
31 I no relela aya dhoropeni ga Kapernawume, tikweni ga Galileya, a ya va gondzisa hi sabhadho.
32 A vanhu va no hlamala nguvhu hi magondzisela yakwe, hakuva i wa gondzisa timhaka ti ngata hi ka Nungungulu.*
33 Lomu sinagogeni ku wa hi ni wanuna a nga hi ni dhimoni. I no banguleka aku:
34 “Ha! Cini hi nga ku gohela wena Jesu wa le Nazareta? U tele ku ta hi lovisa ke? Ndza zvi tiva khwatsi ku hi wena mani. Hi wena Loyi wa Kubasa wa Nungungulu.”
35 Kanilezvi Jesu i no gi kawuka aku: “Miyela, u huma ka yena.” Hikwalaho, andzhako ka loku gi mu wisile lahasi cikari kabye, a dhimoni gi no huma na gi nga mu bayisangi.
36 Laha vontlhe va nga wona lezvo va no hlamala nguvhu va byelana, vaku: “Hi nga wonani ntamu wu nga ka magezu yakwe! I na ni ntamu wa ku laya ni madhimoni ma huma!”
37 Hikwalaho a mahungu xungetano hi yena ma no simama ku hangalaka matlhelweni wontlhe ya lomu kusuhani.
38 Loku a humile sinagogeni i noya kaya ka Simoni. A mukokati wa Simoni i wa babya hi feveri ya hombe, makunu va no mu kombela lezvaku a mu vhuna.
39 Hikwalaho i no ya korama kakwe a kawuka feveri, yi se hangalaka. Zvalezvo i no vhuka a sangula ku va tirela.
40 Kanilezvi laha gi nga ku phum, vontlhe lava va nga hi ni vanhu va nga hi ni mababyi ya tixakaxaka va nota navo kakwe. I no tlhateka mandla yakwe ka mun’we ni mun’wani wabye, a va hanyisa.
41 A madhimoni wonawu ma no huma hi ka votala na ma banguleka maku: “Wena u N’wana wa Nungungulu.” Kanilezvi i no ma kawuka a nga ma tsiki ma wulawula hakuva ma wa mu tiva lezvaku hi yena Kristu.
42 Laha gi ngaca, Jesu i no suka aya ka wutshamu gin’wani na a hi yece. Kanilezvi a citshungu ci no famba ci mu lavetela* kala ci chikela laha a nga hi kona. Ci no mu betela ku suka kabye.
43 Kanilezvi Jesu i te ngalo kabye: “Ndzi fanele ku kanela mahungu ya ma nene ya Mufumo wa Nungungulu ni ka man’wani madhoropa, hakuva ndzi rumelwe lezvo.”
44 Hikwalaho i no simama ku chumayela masinagogeni ya Judhiya.
Mitlhamuselo ya lahasi
^ Hi ciGreki: di·á·bo·los, zvi wulako ku “mulumbeti”.
^ Hi ciGreki: di·á·bo·los, zvi wulako ku “mulumbeti”.
^ Hi kukongoma: “pawa”.
^ Hi ciGreki: di·á·bo·los, zvi wulako ku “mulumbeti”.
^ Kutani: “u ndzi khozela khati gin’we”.
^ Kutani: “le madembeleni ya”.
^ Hi ciGreki: di·á·bo·los, zvi wulako ku “mulumbeti”.
^ Wona laha ka ku: “Sinagoga” ka Tlhamuselo wa magezu ya Bhibhiliya.
^ Kutani: “hanyiswa”.
^ Hi kukongoma: “i wa va gondzisa kota loyi a nga ni ntamu”.
^ Kutani: “hlota”.
