Luka 5:1-39
5 Ka khati go kari, Jesu na a yimile mbhirini ya tiva ga Genezareta* a citshungu ci no manyana kakwe kasi kuzwa a mhaka ya Nungungulu.
2 Kwalaho i no wona tingalava timbiri na ti vekilwe mbhirini ya tiva, kanilezvi a vakukuti* va wa humele ka tona va ya hlazva tikoka* tabye.
3 I no nghena ka yin’we ya tingalava, leyi yi nga hi ya Simoni, a mu kombela lezvaku a yi chovha yi nghenanyana matini. Makunu i no tshama lomu ngalaveni a sangula ku gondzisa citshungu.
4 Loku a mbhetile ku wulawula ni citshungu, i te ngalo ka Simoni: “Chovha ngalava yiya laha ku etileko mu ya peta tikoka* ta n’wina mu kukuta.”
5 Kanilezvi Simoni i no mu hlamula aku: “Mugondzisi, hi tirile wusiku gontlhe, a hi kumangi nchumu, kanilezvi kota lezvi u wulako ndzi ta peta tikoka.”*
6 Kunene, loku va mahile lezvo va no phasa tinjhanjhi to tala nguvhu laha ka kuza a tikoka* tabye ti sangula ku handzuka.
7 Hikwalaho, va no khweneta vanghana vabye va nga hi ka yin’wani ngalava lezvaku vata va ta va vhuna. Va nota va ta tata a tingalava tontlhe ta timbiri laha ka kuza ti sangula ku rikha.*
8 Laha Simoni Pedro a nga wona lezvo, i nowa madzolweni ya Jesu aku: “Hosi, suka ka mina hakuva ndzi muwonhi.”
9 Hakuva yena ni lava a nga hi navo va no hlamala nguvhu hi kota ya kutala ka tinjhanjhi leti va nga ti kumile.
10 Zvive tano ka Jakobe na Johani, a vana va Zabhedhi, lava va nga tira zvin’we na Simoni. Kanilezvi Jesu i te ngalo ka Simoni: “U nga chavi. Kusukela lezvi u ta kukuta vanhu.”*
11 Hikwalaho va no humesa tingalava matini, va tsika zvontlhe va mu landzela.
12 Ka khati gin’wani na a hi ka gin’wani dhoropa, ku nota wanuna a nga tele hi hlokonho. A cikhati leci a nga wona Jesu i nowa hi nghohe a mu khongotela aku: “Hosi, loku u zvi lava ndzi hanyise.”*
13 Jesu i no nawuluta woko gakwe a mu henya, aku: “Ndza zvi lava! Hanyiswa.”* Zvalezvo a hlokonho yakwe yi no hangalaka.
14 Andzhako ka lezvo, i no mu laya lezvaku a nga byeli munhu, a gumesa aku: “Famba u ya ti kombekisa ka mupristi, u nyikela cinyikiwo leci ci wuliwako hi Nayo wa Mosi kota cikombiso ca lezvaku u hanyisilwe.”*
15 Kanilezvi a mahungu xungetano hi Jesu ma no simama ku hangalaka, ni citshungu ca hombe ci wa hlengeletana kasi ci mu ingisela ni ku hanyisiwa ka mababyi ya cona.
16 Hambulezvo, i wa tala kuya ka wutshamu gi nga hiko na vanhu a ya khongela.
17 Ka siku gin’wani na a kari a gondzisa, ku nota vaFarisi ni vagondzisi va Nayo hi ka zvidhoropana zvontlhe zva Galileya ni Judhiya ni le Jerusalema va ta tshama laho; ni ntamu wa Jehovha wu wa hi zvin’we naye kasi a hanyisa vanhu.
18 Ku nota vavanuna na va rwele a wanuna hi lihlaka,* a nga kala a nga zvi koti ku famba, va ta zama ku nghena naye kasi va mu veka mahlweni ka Jesu.
19 Lezvi va nga tsandzeka ku nghena naye hi kota ya citshungu, va no noma* le hehla ka yindlu va gwawula mathayela* va mu releta hi lihlaka* hi laha ka lava va nga hi phambeni ka Jesu.
20 Laha a nga wona a kukholwa kabye i te ngalo: “Munghana, a zviwonho zva wena zvi tsetselelwe.”
21 Makunu, a vatsali ni vaFarisi va no sangula ku wulawulisana cikari kabye, vaku: “Himani loyi a wulawulako tihlamba? Himani a nga tsetselelako zviwonho ahandle ka Nungungulu ke?”
22 Kanilezvi Jesu, na a tiva maalakanyo yabye, i no va hlamula aku: “Zvini mu alakanyelako timbilwini ta n’wina?
23 Hi cihi ci olovako? Ku wula ku: ‘A zviwonho zva wena zvi tsetselelwe’, kutani ku: ‘Suka u famba’?
24 Kanilezvi kasi mu tiva lezvaku a N’wana wa munhu i na ni ntamu laha misaveni wa ku tsetselela zviwonho . . .”, i no byela loyi a nga kala a nga zvi koti ku famba, aku: “Ndza wula ka wena ndziku: Suka u yima, u teka lihlaka* la wena u famba kaya.”
25 I no suka a yima mahlweni kabye, a teka leci a nga latilwe ka cona a khoma ndlela aya kaya na a dhumisa Nungungulu.
26 Vontlhe va no tala hi kuhlamala va dhumisa Nungungulu, na va chava nguvhu vaku: “Nyamutlha hi wonile zvilo zvo hlamalisa!”
27 Andzhako ka lezvo i no suka laho; laha a nga kari a famba i no wona mukhupisi a vitaniwako ku hi Levhi na a tshamile laha ku hakhelwako mikhupo, aku kakwe: “Ndzi landzele.”
28 I no tsika zvontlhe, a suka a mu landzela.
29 Makunu Levhi i no mu mahela festa ya hombe le kaya kakwe. Ku wa hi ni citshungu ca hombe ca vakhupisi ni van’wani va ngaga* zvin’we navo.
30 Laha a vaFarisi ni vatsali vabye va nga wona lezvo va no sangula ku ngurangurela a vapizani vakwe, vaku: “Hikuyini mu gako ni kunwa ni vakhupisi ni vawonhi ke?”
31 Jesu i no va hlamula aku: “Lava va kalako va nga babyi a va lavi dhokodhela, kanilezvi lava va babyako va mu lava.
32 A ndzi telangi ku ta vitana valulamileko lezvaku va ti sola, kanilezvi ndzi tele vawonhi.”
33 Vaku kakwe: “A vapizani va Johani va tala ku hlambanya ku tshama va ngagi nchumu* va tlhela va khongela; lava va vaFarisi vonawu va maha lezvo, kanilezvi lava va wena voga ni kunwa.”
34 Jesu aku kabye: “A mu nge mahi a vanghana va noivho va hlambanya ku tshama va ngagi nchumu* kuveni a noivho ya ha hi zvin’we navo, a hi zvona ke?
35 Kanilezvi cata cikhati leci hakunene va to tekelwa a noivho, hi kona va to hlambanya ku tshama va ngagi nchumu* ka masiku lawo.”
36 I no va mahela mufananiso wun’wani aku: “A nga kona a tsemako nguwo ya yiswa a yi rungela kota ciziva ka nguwo ya kale. Hakuva loku a maha lezvo, a ciziva leco ca ciswa ci ta dungurula nguwo leyo ya kale, niku a ciziva ci tsemilweko ka nguwo ya yiswa a ci saseki ka nguwo ya kale.
37 A nga kona kambe a chelako vhinyo ya yiswa ka mikwama* ya kale. Hakuva loku a maha lezvo, a vhinyo leyi ya yiswa yi ta phuxuta mikwama yi halaka, ni mikwama ya kona yi wonheka.
38 Kanilezvi a vhinyo ya yiswa yi cheliwa ka mikwama* ya yiswa.
39 A ku na munhu wa ku loku a nwile a vhinyo ya kale wa ha lava leyi ya yiswa, hakuva i ngalo: ‘Leyi ya kale ya nandziha.’”
Mitlhamuselo ya lahasi
^ A tiva ga Genezareta hi gona gin’we ni Bimbi ga Galileya.
^ Kutani: “vaphasi va tinjhanjhi; vatandi”.
^ Kutani: “majuya”.
^ Kutani: “majuya”.
^ Kutani: “majuya”.
^ Kutani: “majuya”.
^ Kutani: “mbombomela”.
^ Kutani: “vanhu vo hanya”.
^ Kutani: “basise”.
^ Kutani: “Basiswa”.
^ Kutani: “basisilwe”.
^ Kutani: “maka; citatara”.
^ Kutani: “kandziha”.
^ A mathayela lawa ma wa hi ya wumba.
^ Kutani: “maka; citatara”.
^ Kutani: “maka; citatara”.
^ Kutani: “va nga tshamile mezeni”.
^ Kutani: “va tala ku jejuwara; va tala ku pfhunga”.
^ Kutani: “va jejuwara; va pfhunga”.
^ Kutani: “va to jejuwara; va to pfhunga”.
^ Kutani: “tinghotso to mahiwa hi mabhebhe”.
^ Kutani: “tinghotso to mahiwa hi mabhebhe”.
