Luka 6:1-49
-
Jesu i “Hosi ya sabhadho” (1-5)
-
Jesu a hanyisa wanuna wa canja go limala (6-11)
-
A 12 wa vapostoli (12-16)
-
Jesu a gondzisa ni ku hanyisa (17-19)
-
A makatekwa ni makhombo (20-26)
-
Randzani valala (27-36)
-
Tsikani ku lamula (37-42)
-
Mu ta yi tiva hi mihandzu ya yona (43-45)
-
Yindlu yi akilweko khwatsi; yindlu yo kala ciseketelo co tiya (46-49)
6 Hi sabhadho, na a kari a hundza hi lomu masin’wini ya trigo, a vapizani vakwe va no hulula trigo, va yi swoswa lomu mandleni vaga.
2 A cikhati leci a vaFarisi vo kari va nga wona lezvo, va te ngalo: “Hikuyini mu mahako zvilo zvi nga faneliko ku mahiwa hi sabhadho?”
3 Kanilezvi Jesu i no va hlamula aku: “A mu se gondza lezvi Dhavhidha a nga maha a cikhati leci yena ni vavanuna vakwe va ngazwa ndlala ke?
4 A mu zvi tivi ku i nghenile ndlwini ya Nungungulu a amukela tipawa ta munyikelo aga, a gumesa a teka to kari a nyika vavanuna lava a nga hi navo, kasi lezvo ne mun’we wabye i wa nga faneli kuga, ntsena vapristi ke?”
5 A gumesa aku: “A N’wana wa munhu i Hosi ya sabhadho.”
6 Ka sabhadho gin’wani, Jesu i no nghena sinagogeni a sangula ku gondzisa. Kwalomo ku wa hi ni wanuna a nga limalile canja ga cinene.
7 Hikwalaho a vatsali ni vaFarisi va wa mu cuwukela khwatsi kasi ku wona lezvaku i ta hanyisa hi sabhadho ke, kasi va fela ku mu nyika nandzu.
8 Kanilezvi Jesu, na a tiva maalakanyo yabye, i no byela wanuna loye wa canja gi limeleko aku: “Suka, u yima laha cikari.” I no suka a yima laho.
9 Hi kulandzela, Jesu aku kabye: “Vavanuna, ndza mu wutisa: Zva fanela ku maha zva zvi nene kutani zvobiha hi sabhadho; a ku ponisa wutomi kutani ku gi lovisa ke?”
10 Andzhako ka loku a cuwukile vontlhe lava va nga hi matlhelweni yakwe, i no byela wanuna loye aku: “Tshambuluta canja ga wena.” I no maha lezvo, a canja gakwe gi se hanya.
11 Kanilezvi va no vhindluka hi zanga, va sangula ku bhulisana hi ku va ta mu maha yini Jesu.
12 Ka siku go kari i noya citsungeni a ya khongela. I no mbheta wusiku gontlhe na a khongela ka Nungungulu.
13 Loku gi cile, i no vitana vapizani vakwe a ta hlawula 12 cikari kabye a va chula ku vapostoli.
14 Va nga lava: Simoni, loyi a nga mu chula ku hi Pedro, ni makabye wakwe Andrewu, na Jakobe, na Johani, na Filipu, na Bhartolomewu,
15 na Matewu, na Tomasi, na Jakobe n’wana wa Alfewu, na Simoni a vitaniwako ku hi “loyi wo pinyama”,
16 na Judhasi n’wana wa Jakobe, na Judhasi Iskariyoti loyi a nga gumesa a mu xavisa.
17 I no relela navo a ta yima ka wutshamu go lulama. Ku wa hi ni citshungu ca hombe ca vapizani vakwe ni citshungu cin’wani ca vanhu va ngata hi Judhiya gontlhe ni Jerusalema ni le matikweni ya Tire ni Sidhoni, lava va nga tela ku ta mu ingisela ni ku hanyiswa mababyi yabye.
18 Hambu lava va nga xanisiwa hi madhimoni va wa hanyiswa.
19 Contlhe citshungu ci wa lavetela tindlela to mu henya, hakuva ku wa huma ntamu ka yena wu va hanyisa vontlhe.
20 I no cuwuka vapizani vakwe, aku:
“Mu katekile n’wina zvisiwana, hakuva a Mufumo wa Nungungulu wa n’wina.
21 “Mu katekile n’wina mu zwako ndlala ka cikhati leci, hakuva mu ta xuriswa.
“Mu katekile n’wina mu rilako ka cikhati leci, hakuva mu ta tsaka.
22 “Mu katekile loku a vanhu va mu venga, va mu hlongola, va mu rukatela, va wulawula zva hava hi vito ga n’wina a ku khwatsi gi no biha, hi kota ya N’wana wa munhu.
23 Ka siku lego tsakani mu tlulatlula hi kutsaka, hakuva a nchachazelo wa n’wina wa hombe le tilweni, hakuva a zvilo lezvi hi zvalezvi a vakokwani vabye va nga kari va maha ka vaphrofeti.
24 “Kanilezvi khombo ka n’wina vo ganya, hakuva mu sina mu xalalisilwe.
25 “Khombo ka n’wina lava zvezvi mu xurileko, hakuva mu tazwa ndlala.
“Khombo ka n’wina lava mu hlekako zvezvi, hakuva mu ta bayiseka mu rila.
26 “Khombo ka n’wina loku a vanhu vontlhe va wulawula khwatsi hi n’wina, hakuva hi zvalezvi a vakokwani vabye va nga maha ka vaphrofeti va mawunwa.
27 “Kanilezvi ndza mu byela n’wina mu ndzi ingiselako ndziku: Simamani ku randza valala va n’wina, mu va mahela zva zvi nene lava va mu vengako,
28 mu katekisa lava va mu xuvelako zva kubiha, mu khongelela ni lava va mu rukatelako.
29 Loyi a ku bako rama gin’we, mu nyike legi gin’wani; ni loyi a ku tekelako a bhaji ga wena, mu tsike a teka ni hembe kambe.
30 Nyika ni wihi a ku kombelako. Ni loyi a ku tekelako zvilo zva wena u nga ha zvi lavi kakwe.
31 “Lezvi mu lavako ku a vanhu va mu mahela, n’winawu va maheleni zvalezvo.
32 “Loku mu randza lava va mu randzako, wudzundzo muni mu gi kumako ke? Hakuva hambu vawonhi va randzana hi ca ka vona.
33 Loku mu maha zva zvi nene ka lava va mu mahelako zva zvi nene, wudzundzo muni mu gi kumako ke? Hambu vawonhi va maha zvalezvo.
34 Loku mu pembisa* ka lava mu tsumbako ku va ta mu tlhelisela, wudzundzo muni mu gi kumako ke? Hambu vawonhi va pembana hi ca ka vona kasi va fela ku tlheliselwa zvontlhe lezvi va pembisileko.
35 Kanilezvi simamani ku randza valala va n’wina, mu maha zva zvi nene, mu pembisa na mu nga rindzeli ku tlheliselwa nchumu; a nchachazelo wa n’wina wu tava wa hombe, na n’wina mu tava vana va Loyi a Tlakukileko ku Hundza Vontlhe, hakuva yena mu nene ka lava va nga bongiko ni ka lava vo biha.
36 Simamani kuva vanhu va wuxinji, khwatsi hi lezvi a Papayi wa n’wina a nga ni wuxinji.
37 “Tsikani ku lamula, n’winawu mu nga ta lamulwa; tsikani ku kona, n’winawu mu nga ta koniwa. Tsetselelani,* n’winawu mu ta tsetselelwa.*
38 Randzani ku nyika, a vanhu va ta mu nyikawo. Va ta mu chululela cifuveni* ca n’wina hi lipimo li nene li kanyilweko, li kuhlungiwa, li tlhela li halakela. Hakuva hi lipimo leli mu pimako van’wani hi lona vonawu va ta mu pima hi lona.”
39 Hi kulandzela, i no va hlawutela mufananiso aku: “A cikhumu ci nga zvi kota ku rangela cin’wani cikhumu ke? Zvi nga ta wela kheleni hi wumbiri ga zvona ke?
40 A cigondzani* a ci hundzi mugondzisi wa cona, kanilezvi ni wihi loyi a gondzisiwako khwatsi i ta fana ni mugondzisi wakwe.
41 Makunu hikuyini u cuwukisako a citoti ci nga ka tihlo ga makabye wa wena kanilezvi u nga woni a dzandza gi nga ka tihlo ga wena ke?
42 U ta zvi kotisa kuyini ku byela makabye wa wena uku: ‘Makabye, hi nga khwatsi ndzi ku susa citoti ci nga ka tihlo ga wena’, kuveni wena wutsumbu a wu gi woni a dzandza gi nga ka tihlo ga wena? Mukanganyisi ndziwena! Ranga hi ku susa dzandza legi gi nga lomu ka tihlo ga wena, hi kona u to wona khwatsi a ku susa citoti ci nga ka tihlo ga makabye wa wena.
43 “Hakuva a ku na sinya ya yi nene yi pswalako mihandzu yi nga hiko yi nene; a ku na sinya yi nga hiko yi nene yi pswalako mihandzu ya yi nene.
44 Hakuva a sinya yin’we ni yin’wani yi tiviwa hi mihandzu ya yona. A vanhu a va koli makuwu mimizweni ne hambu ku khaya mauvha lomu zvihaheni.
45 A munhu wa mu nene i humesa zvilo zva zvi nene tshombeni ya yi nene ya mbilu yakwe, kanilezvi a munhu wa kubiha i humesa zvilo zva kubiha tshombeni yakwe ya kubiha; hakuva a nomu wu wulawula lezvi zvi teleko mbilwini.
46 “Makunu hikuyini mu ndzi vitanako ku ‘Hosi! Hosi!’ kuveni a mu mahi lezvi ndzi wulako ke?
47 Ni wihi a tako ka mina a tazwa timhaka ta mina a tlhela a ti maha, ndzi ta mu komba ku i fana na mani:
48 I fana ni munhu loyi wa ku a cikhati leci a nga aka yindlu, i no kela a etisa a zima ciseketelo laha ribyeni. Hi kota ya lezvo, laha ku ngata ndambi, a congo wu no khulungela a yindlu leyo, kanilezvi a yi tsekatsekangi hakuva yi wa akilwe khwatsi.
49 Kanilezvi loyi a zwako a guma a nga mahi nchumu, i fana ni munhu loyi a nga aka yindlu misaveni na yi nga hi na ciseketelo. A congo wu no yi khulungela, yi se tekela kuwa. A kuwa ka yindlu leyo kuve ka hombe.”
Mitlhamuselo ya lahasi
^ Ku nga ku pembisa na u nga hakhelisi majuro.
^ Kutani: “Tlhatlhisani”.
^ Kutani: “tlhatlhiswa”.
^ A vanhu cikhatini leco va wa petsa nguwo yita laha cifuveni yi ta maha phaketi. Kwalomo va wa chelelwa zvilo va kumbarela.
^ Kutani: “mupizani”.
