Luka 7:1-50
7 Laha Jesu a nga mbhetile lezvi a nga lava ku byela vanhu, i noya Kapernawume.
2 A hosana ya masochwa yi wa hi ni nandza yi nga gi randza, kanilezvi gi wa babya nguvhu niku gi wa hi kusuhani ni kufa.
3 A cikhati leci a hosana leyi yi ngazwa ha Jesu, yi no ruma madhota yo kari ya vaJudha maya kakwe ma ya mu kombela lezvaku a ta gi hanyisa.
4 Ma noya ka Jesu ma ya mu khongotela nguvhu maku: “Zva ringana ku u mu mahela lezvo,
5 hakuva wa gi randza a tiko ga hina niku hi yena a nga hi akela sinagoga.”
6 Hikwalaho Jesu i no famba navo. Kanilezvi na a hi kusuhani ni ku chikela mutini, a hosana ya masochwa yi no rumela vanghana va yona va yaku kakwe: “Hosi, u nga ti karati, hakuva a ndzi munhu wo kala ndzi ku amukela ndlwini ya mina.
7 Hi zvalezvi zvi ndzi mahileko ndzi ti wona na ndzi nga ringanelwi hi kuta ka wena. Kanilezvi, wula gezu basi, a nandza ga mina gi ta hanya.
8 Hakuva minawu ndzi munhu a fumiwako, na ndzi hi ni masochwa ndzi ma rangelako; ndzi wula ka gin’we ndziku: ‘Famba!’ gi famba; ndziku ka gin’wani: ‘Tana!’ gita; ni ka citiri ca mina ndziku: ‘Maha lezvi!’ ci maha.”
9 Laha Jesu a ngazwa lezvo i no hlamala nguvhu, a hundzuluka a cuwuka citshungu leci ci nga kari ci mu landzela aku: “Ndza mu byela ndziku, hambu lomu Izrayeli a ndzi se kuma munhu a nga ni kukholwa ka hombe ko kota loku.”
10 A cikhati leci lava va nga rumelwe ka Jesu va nga tlhela mutini, va no ya kuma nandza na gi hanyile.
11 Andzhakunyana ka lezvo, Jesu i no suka aya dhoropeni gi vitaniwako ku i Nayine. A vapizani vakwe zvin’we ni citshungu ca hombe va no famba naye.
12 Laha a nga chikela kusuhani ni nyangwa ya dhoropa, i no kumana ni vanhu va nga rwele mufi, a nga hi yena n’wana wa mun’we ka mamani wakwe. A ku tsika lezvo, a mamani loyi i wa felwe hi nuna, ni citshungu ca hombe ca lomu dhoropeni ci wa hi zvin’we naye.
13 A cikhati leci a Hosi yi nga mu wona, yi no mu zwela wusiwana yiku kakwe: “U nga rili.”
14 Jesu i no tshinela a henya lihlaka,* makunu lava va nga rwele lihlaka va no nyima. Aku ngalo: “Jaha, ndziku ka wena, vhuka!”
15 Loyi a nga file i no vhuka a tshama a sangula ku wulawula, Jesu a mu nyikela ka mamani wakwe.
16 Vontlhe va no chava nguvhu, va sangula ku dhumisa Nungungulu vaku: “Ku humelele a muphrofeti wa hombe cikari ka hina” niku “Nungungulu i alakanyile vanhu vakwe.”
17 A mahungu lawa xungetano hi yena ma no hangalaka tikweni gontlhe ga Judhiya ni ka matshamu wontlhe ya laha kusuhani.
18 Makunu a vapizani va Johani va no ya mu hlawutela a zvilo lezvi zvontlhe.
19 Hikwalaho Johani i no vitanisa vambiri cikari ka vapizani vakwe a va rumela ka Hosi kasi va ya yi wutisa vaku: “Hi wena Loyi a Tako kutani ha ha rindzela mun’wani ke?”
20 Loku va chikele ka yena va te ngalo: “Johani Mubhabhatisi i hi rumele ka wena kasi ku ta ku wutisa ku: ‘Hi wena Loyi a Tako kutani ha ha rindzela mun’wani ke?’”
21 Ka cikhati leco, Jesu i no hanyisa vanhu vo tala ka mababyi yabye ni tinghumbe, a hlongola madhimoni, ni ku tlhelisela kuwona ka zvikhumu zvo tala.
22 I no va hlamula aku: “Fambani mu ya byela Johani lezvi mu zvi wonileko ni ku zvizwa, muku: A zvikhumu makunu zva wona ni zvilima zva famba, a vahlokonho va hanyiswa* ni lava vofa tindleve va ingisa, a vafileko va vhuxiwa ni zvisiwana zva byeliwa a mahungu ya ma nene.
23 I katekile loyi a nga khunguvanyekiko* hi kota ya mina.”
24 A cikhati leci a vapizani va Johani va nga famba, Jesu i no sangula ku wulawula ni citshungu hi Johani aku: “Mu waya mu ya wona yini le ciwuleni? Mu wa yela ku ya wona a lihlanga li ninginisiwako hi moya?
25 Makunu mu waya mu ya wona yini? A ku ya wona wanuna a bohileko tinguwo to saseka?* Phela lava va bohako tinguwo to saseka ni ku hanya mafureni va lomu tindlwini ta tihosi.
26 Mu waya mu ya wona yini? A muphrofeti ke? Ina, niku ndza mu byela ndziku: I hundza nguvhu a muphrofeti.
27 Loyi hi yena ku tsalilweko ha yena ku ngalo: ‘Ndza rumela a nandza ga mina mahlweni ka wena,* legi gi to ranga mahlweni ka wena gi ku longiselela ndlela.’
28 Ndza mu byela ndziku: Cikari ka lava va pswalilweko hi vavasati a nga kona a nga wa hombe ku hundza Johani, kanilezvi loyi a nga mutsongwani Mufun’weni wa Nungungulu, wa hombe ku hundza yena.”
29 (A cikhati leci a vanhu vontlhe ni vakhupisi va ngazwa lezvo, va no vhumela lezvaku Nungungulu i lulamile, hakuva va wa bhabhatisilwe hi kubhabhatisa ka Johani.
30 Kanilezvi a vaFarisi ni vagondzisi va Nayo a va chelangi kota hi kungo* ga Nungungulu kabye, hakuva va wa nga bhabhatiswangi hi Johani.)
31 “Ndzi ta va fananisa na mani a vanhu va cizukulwana leci? Va fana na mani ke?
32 Va fana ni vanana va tshamileko merkadho lava va vitananako vaku: ‘Hi mu chayele muzka* kanilezvi a mu kinangi; hi bile huwa kanilezvi a mu rilangi.’
33 Hizvalezvo, Johani Mubhabhatisi i tile a ta tshama a ngagi ne kunwa, kanilezvi n’wina mu ngalo: ‘I na ni dhimoni.’
34 A N’wana wa munhu i tile a taga ni kunwa kanilezvi n’wina mu ngalo: ‘I khobomu* niku cidhakwa; munghana wa vakhupisi ni vawonhi!’
35 Kanilezvi, a wutlhari gi kombisa kululama* hi vanana* va gona vontlhe.”
36 A mun’we wa vaFarisi i no mu kombela lezvaku a yaga naye. Hikwalaho, i no nghena ndlwini ya muFarisi a tshama mezeni.
37 Laha a wasati loyi a nga tiveka lomu dhoropeni lezvaku muwonhi a nga tiva lezvaku Jesu i wa hi kugeni* ndlwini ya muFarisi, i nota ni botori ga alabhasteri ga mafura yo nuhela.
38 I noya le ndzhako mikondzweni ya Jesu a ya rila a mu tsakamisa mikondzo hi mihloti a gumesa a yi sula hi misisi yakwe. Ahandle ka lezvo, i no pswopswa mikondzo ya Jesu a chulula mafura yo nuhela hehla ka yona.
39 A cikhati leci a muFarisi loyi a nga mu rambile a nga wona lezvo, i no wulawula mbilwini yakwe, aku: “Loku hakunene a wanuna loyi i wa hi muphrofeti, na a zvi tivile lezvaku himani a mu henyako niku wasati wa tshamela muni, hakuva muwonhi.”
40 Kanilezvi Jesu i no mu hlamula aku: “Simoni, ku na ni zvokari ndzi lavako ku ku byela.” Simoni aku: “Wula Mugondzisi!”
41 “Ku wa hi ni vavanuna vambiri va nga dhevha mupembisi wo kari; a mun’we i wa dhevha a 500 wa tidhenaryo,* loyi mun’wani i wa dhevha a 50.
42 Laha va nga vhumala a zva ku mu hakhela hi zvona, i no va tsetselela hi wumbiri gabye. Makunu himani cikari kabye a to mu randza nguvhu a mupembisi?”
43 Simoni i no hlamula aku: “Ndzi alakanya ku hi loyi a nga tsetselelwa nguvhu.” Jesu aku kakwe: “U hlamulile khwatsi.”
44 Andzhako ka lezvo, i no hundzuluka a cuwuka wasati, aku ka Simoni: “Wa mu wona a wasati loyi? Ndzi nghenile ndlwini ya wena; a wu ndzi nyikangi mati ya ku hlamba mikondzo. Kanilezvi a wasati loyi i tsakamisile mikondzo ya mina hi mihloti yakwe a tlhela a yi sula hi misisi yakwe.
45 Wena a wu ndzi pswopswangi, kanilezvi a wasati loyi, cima ndzi nghena a nga tsikangi ku pswopswa mikondzo ya mina.
46 Wena a wu ndzi chelangi mafura hlokweni ya mina, kanilezvi a wasati loyi i chululile mafura yo nuhela mikondzweni ya mina.
47 Hikwalaho, ndza ku byela ndziku: A zviwonho zvakwe, hambu lezvi zvi teleko,* zvi tsetselelwe, hakuva i randzile nguvhu. Kanilezvi loyi a tsetselelwako zvitsongwani i randza kutsongwani.”
48 I no gumesa aku ka wasati: “A zviwonho zva wena zvi tsetselelwe.”
49 Lava va nga tshamile naye laha mezeni va no sangula ku byelana vaku: “Himani wanuna loyi wo kala a tsetselela zviwonho?”
50 Kanilezvi Jesu i no byela a wasati aku: “A kukholwa ka wena ku ku hanyisile, famba hi kurula.”
Mitlhamuselo ya lahasi
^ Kutani: “maka; citatara”.
^ Kutani: “basiswa”.
^ Hi kukongoma: “wiko”.
^ Kutani: “tinguwo ta ti nene?”
^ Hi kukongoma: “ka nghohe ya wena”.
^ Kutani: “kurandza”.
^ Hi kukongoma: “Hi mu bele citoliya”.
^ Kutani: “Munhu wa makolo”.
^ Kutani: “gi lweliwa”.
^ Kutani: “mihandzu ya gona yontlhe”.
^ Kutani: “mezeni”.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “nga zva hombe”.
