Luka 8:1-56
-
A vavasati va landzela Jesu (1-3)
-
Mufananiso wa murimi (4-8)
-
Lezvi zvi nga maha Jesu a tirisa mifananiso (9, 10)
-
A tlhamusela mufananiso wa murimi (11-15)
-
A va lumeki kandiya va yi khubhunyeta (16-18)
-
A mamani ni vamakabye va Jesu (19-21)
-
Jesu a miyeta moya wa hombe (22-25)
-
Jesu a hlongola madhimoni ma ya nghena ka makhumba (26-39)
-
Nhanyana wa Jayiro; a wasati a henya nguwo ya Jesu (40-56)
8 Cikhatanyana ndzhako ka lezvo, i no fambafamba madhoropeni ni zvidhoropaneni a chumayela ni ku kanela mahungu ya ma nene ya Mufumo wa Nungungulu. Lava va 12 va wa hi zvin’we naye,
2 a ku patsa ni vavasati vo kari va nga hanyisilwe ka madhimoni ni ka mababyi yabye, va nga lava: Mariya wa le Magdhala, loyi a nga humesiwa a 7 wa madhimoni;
3 na Johana a sati wa Kuza a muwoneleli wa zva muti wa Herodhi; na Suzana; ni van’wani vavasati vo tala va nga va tirela hi zvilo zvabye.
4 Makunu laha a citshungu ca hombe ci nga tlhangene ni lava va nga tile kakwe hi ka man’wani madhoropa, i no wulawula navo hi mufananiso aku:
5 “A murimi i no huma a ya xwanya timbewu takwe. A cikhati leci a nga kari a xwanya, a timbewu to kari ti no wela laha ndleleni ti kandzihetelwa hi vanhu, ti gumesa ti giwa hi zvinyanyani zva tilo.
6 A tin’wani ti no wela maribyeni, kanilezvi loku ti milile ti no woma hakuva ku wa nga hi na ndzhongo.
7 A tin’wani ti no wela cikari ka mimizwa, ni mimizwa yi no kula zvin’we nato yi ti tlimba.
8 Kanilezvi a tin’wani ti no wela ka misava yo nona, makunu loku ti milile ti no pswala mihandzu hi ka 100, a ku hundza lezvi zvi nga byalilwe.” Loku a wulile zvilo lezvi, i no tlakusa gezu aku: “Loyi a nga ni tindleve ta kuzwa, i wa ingise.”
9 Kanilezvi a vapizani vakwe va no mu wutisa ku wu wula yini a mufananiso lowu.
10 Yena aku: “N’wina mu nyikilwe ku zwisisa a zvihundla* zva Mufumo wa Nungungulu, kanilezvi ka van’wani a zvilo zvontlhe ndzi va gondzisa hi mifananiso, kasi hambu loku va cuwuka, va cuwuka mahala, hambu loku vazwa va nga zvi zwisisi.
11 A mufananiso lowu wu wula lezvi: A mbewu i mhaka ya Nungungulu.
12 Leti ti nga ndleleni hi lava va zwileko mhaka, kanilezvi Sathani* ita a ta susa a mhaka timbilwini tabye kasi va nga kholwi va hanyiswa.
13 Leti ti nga maribyeni, hi lava va ku loku vazwa mhaka va yi amukela na va tsakile, kanilezvi a va na mitsu. Va kholwa zva cikhatana, kanilezvi loku ku chikela nguva ya zviringo vowa.
14 Kasi leti ti nga wela cikari ka mimizwa, hi lava va zwako mhaka, kanilezvi a zvikarato zva loku kuhanya, ni ku kokiwa hi titshomba ni kutitsakisa ka loku kuhanya zvi va tlimba hi kumbhelela va nga pswali mihandzu yi kala yi buvha.
15 Makunu leti ti nga ka misava yo nona hi lava va ku loku va zwile mhaka hi mbilu yi nene ni yi longileko vo yi hlayisa va pswala mihandzu hi kutimisela.
16 “A ku na munhu a lumekako kandiya a yi khubhunyeta hi cindzala* kutani ku yi veka lahasi ka mubhedhi, kanilezvi i yi hayeka le hehla kasi lava va nghenako va wona kuwonekela.
17 Hakuva a ku na nchumu wu fihlilweko wu to kala ku wonekeliswa, ne hambu cilo ci tumbetilweko ci to kala ku tiviwa ci huma kubaseni.
18 Hikwalaho, ingiselani khwatsi lezvi mu zvi zwako, hakuva ni wihi loyi a nga nazvo i ta nyikiwa zvin’wani, kanilezvi loyi a nga hava nchumu, hambu lezvi a alakanyako ku i nazvo i ta tekelwa.”
19 A mamani wakwe ni vamakabye vakwe va nota kakwe, kanilezvi a va zvi kotangi ku chikela laha a nga hi kona hi kota ya citshungu.
20 Hikwalaho ku no rumelwa gezu kakwe gaku: “A mamani wa wena ni vamakabye va wena va nyimile le handle, va lava ku ku wona.”
21 I no va hlamula aku: “A mamani wa mina ni vamakabye va mina hi lava va zwako a mhaka ya Nungungulu va yi maha.”
22 Ka siku go kari Jesu i no nghena ngalaveni ni vapizani vakwe, aku kabye: “A hi tlhatukeni hiya ka mbhiri leyi yin’wani ya tiva.” Hikwalaho va no famba.
23 Kanilezvi, laha va nga kari va famba, Jesu i no etlela. Ku no sangula kuba moya wa hombe lomu tiveni a ngalava yabye yi sangula ku tala hi mati, vava mhangweni.
24 Hikwalaho, va no ya mu vhuxa vaku: “Mugondzisi, Mugondzisi, hafa!” Laha a ngazwa lezvo i no vhuka a kawuka a moya ni mavingo,* a moya wu nyima, kuva ni kurula.
25 Jesu aku kabye: “Ku kwihi a kukholwa ka n’wina?” Kanilezvi va no chava nguvhu va hlamala va byelana vaku: “Kasi himani yaloyi, wa ku laya moya ni mati zvi mu ingisa?”
26 Va no chikela mbhirini leyi yin’wani tikweni ga vaGerasa legi gi cuwukeneko ni Galileya.
27 Zvalezvi Jesu a nga huma ngalaveni, i no telwa hi wanuna a nga hi ni madhimoni, a nga hi wa dhoropa lego. I wa hi ni cikhati co leha na a nga bohi tinguwo, niku i wa nga tshami laha kaya, kanilezvi i wa tshama lomu zvilahleni.
28 Laha a nga wona Jesu, i noba huwa, awa mahlweni kakwe a banguleka aku: “Cini ndzi nga ku gohela wena Jesu, N’wana wa Nungungulu a Tlakukileko ku Hundza Vontlhe? Ndza ku khongotela lezvaku u nga ndzi xanisi.”
29 (Hakuva Jesu i wa layile a dhimoni lego lezvaku gi huma kakwe. Gi wa mu xanisa makhati yo tala,* niku i wa tshamela ku bohiwa hi machini* ni tinghomondo* a tlhela a gadhiwa, kanilezvi i wo phewula, a yisiwa ciwuleni hi dhimoni.)
30 Jesu i no mu wutisa aku: “Hi wena mani?” Aku: “Hi mina Cikwata”, hakuva i wa nghenilwe hi madhimoni yo tala.
31 A madhimoni ma no mu khongotela nguvhu lezvaku a nga ma hoxi nkeleni wo eta wo kala magumo.
32 Ku wa hi ni ntlhambi wa hombe wa makhumba ma nga kari maga laha citsungeni, hikwalaho ma no mu khongotela lezvaku a ma tsika ma nghena ka makhumba. Jesu i no ma vhumelela.
33 Hikwalaho, a madhimoni ma no huma ka wanuna loye ma ya nghena ka makhumba. Makunu a ntlhambi wu no tsutsuma wu ya wela tiveni wu mbemba.
34 Kanilezvi laha a varisi va makhumba va nga wona lezvi zvi nga maheka, va no tsutsuma va ya hlawutela mahungu lawo dhoropeni ni ka matshamu ya laha kusuhani.
35 Hikwalaho a vanhu va nota va ta wona lezvi zvi nga mahekile. Va nota ka Jesu va ta kuma wanuna loyi a nga humesilwe madhimoni na a bohile tinguwo, lezvo na a tiva. I wa tshamile mikondzweni ya Jesu, hikwalaho va no chava.
36 Lava va nga zvi wona, va no va hlawutela lezvi a wanuna loyi a nga hi ni madhimoni a nga hanyisiswa zvona.
37 A vanhu vo tala va lomu kusuhani ni Gerasa va no mu kombela lezvaku a suka tikweni gabye; hakuva va wa khomilwe hi kuchava ka hombe. Makunu Jesu i no nghena ngalaveni, a tlhela.
38 Kanilezvi, a wanuna loyi a nga humesilwe madhimoni i no mu khongotela, a mu kombela lezvaku va nga hambani, kanilezvi Jesu i no mu tlhelisa, aku:
39 “Tlhela kaya u ya hlawutela lezvi Nungungulu a nga ku mahela.” Hikwalaho i no tlhela na a huwelela dhoropeni gontlhe lezvi Jesu a nga mu mahele.
40 A cikhati leci Jesu a nga wuya, a citshungu ci no mu amukela hi kutsaka hakuva vontlhe va wa mu rindzele.
41 Ku nota wanuna a vitaniwako ku hi Jayiro. A wanuna loye i wa hi murangeli wa sinagoga. I nota a tawa mikondzweni ya Jesu a sangula ku mu khongotela lezvaku aya mutini wakwe,
42 hakuva a nhanyana wakwe wa mun’we wa 12 wa malembe i wofa.
Laha Jesu a nga kari a famba, a citshungu ci wo mu manya.
43 Ku wa hi ni wasati a nga hi ni mababyi yo huma nkhata a 12 wa malembe, niku i hava a nga zvi kotile ku mu hanyisa.
44 I no xiyelela hi lendzhako ka Jesu a ya henya machakafula ya nguwo yakwe. Zvalezvo a nkhata wakwe wu no nyima ku huma.
45 Hikwalaho Jesu i te ngalo: “Himani a nga ndzi henya?” Laha vontlhe va nga kaneta, Pedro i te ngalo: “Mugondzisi, a wu ci woni citshungu leci ci gunyanako laha ka wena ni ku ku manya?”
46 Kanilezvi Jesu i te ngalo: “I kona a nga ndzi henya, hakuva ndza zvi tiva lezvaku ku humele ntamu ka mina.”
47 Laha a wasati loye a nga wona lezvaku i polekile, i nota na a rurumela a tawa mahlweni kakwe, a wula mahlweni ka vanhu vontlhe leci ci nga mu maha a mu henya ni lezvi a nga hanyisiswa zvona hi cikhati caleco.
48 Kanilezvi Jesu i te ngalo kakwe: “N’wananga, a kukholwa ka wena ku ku hanyisile, famba hi kurula.”
49 Na a ha wulawula, ku no chikela a cirun’wa ci ngata hi mutini wa murangeli wa sinagoga, ci taku: “A nhanyana wa wena i file; u nga ha mu karati Mugondzisi.”
50 Laha Jesu a ngazwa lezvo, i no mu hlamula aku: “U nga chavi, wena kholwa basi, a nhanyana wa wena i ta hanya.”
51 Loku a chikele mutini a nga tsikangi munhu a nghena naye lomu ndlwini. I no nghena na Pedro, na Johani, na Jakobe, ni papayi ni mamani wa nhanyana basi.
52 A vanhu vontlhe va wa kari va rila ni ku tiba zvifuva hi kota ya ku felwa. Hikwalaho Jesu i te ngalo: “Mu nga rili, hakuva a nhanyana loyi a nga fangi, i no etlela.”
53 Loku va zwile lezvo va no mu hleka hakuva va wa zvi tiva lezvaku i file.
54 Kanilezvi i no khoma woko ga nhanyana aku kakwe: “Nhanyana, vhuka!”
55 A moya* wakwe wu no wuya a tekela ku vhuka. Jesu i no va laya lezvaku va mu nyika zvakuga.
56 A vapswali vakwe a va ti kotangi hi kutsaka, kanilezvi Jesu i no va laya lezvaku va nga byeli munhu lezvi zvi nga mahekile.
Mitlhamuselo ya lahasi
^ Kutani: “zvihundla zvo basa”.
^ Hi ciGreki: di·á·bo·los, zvi wulako ku “mulumbeti”.
^ Kutani: “cirundzu”.
^ Kutani: “mabyandlati; mavimbi”.
^ Zvi nga ha wula ku: “Gi wa mu xanisile hi cikhati co leha”.
^ Kutani: “makorente”.
^ Kutani: “tinjema”.
^ Kutani: “ntamu wa wutomi”. Wona laha ka ku: “Moya” ka Tlhamuselo wa magezu ya Bhibhiliya.
