Mahebheru 10:1-39
-
A miphahlo ya zvihari a yi zvi koti ku susa zviwonho (1-4)
-
A Nayo i ndzhuti (1)
-
-
Kristu i nyikele muphahlo khati gin’we zvi enela (5-18)
-
A ndlela yiswa ni yo hanya (19-25)
-
Hi nga tsiki ku tlhangana (24, 25)
-
-
Khombo ga ku wonha ha womu (26-31)
-
Hi fanele kuva ni kutsumba ni kukholwa kasi hi timisela (32-39)
10 Kota lezvi a Nayo wu nga ndzhuti wa zvilo zva zvi nene lezvi zva ha tako, na wu nga hi wona wu nga zvilo zva kona, a wu nge tshuki wu* zvi kota ku mbhelelisa lava va tshinelako ka Nungungulu hi miphahlo yaleyi ya yin’we yi nyikelwako lembe ni lembe.
2 Loku zvi wa hi lezvo, na va nyimile ku nyikela miphahlo, hakuva loku lava va mahako a ntiro wo basa va basisilwe kan’we, a tivhalo tabye na ti nga ha va alakanyisi kambe lezvaku vawonhi.
3 Kanilezvi a miphahlo leyi va yi nyikelako lembe ni lembe yi va alakanyisa lezvaku vawonhi,
4 hakuva a nkhata wa tihomu ni wa timbuti a wu zvi koti ku susa zviwonho.
5 Hikwalaho, a cikhati leci a ngata tikweni, i te ngalo: “‘A wu lavangi miphahlo ni minyikelo, kanilezvi u ndzi longiselele a miri.
6 A wu tsakisiwangi hi minyikelo ya kuhiswa ni minyikelo ya ciwonho.’
7 Makunu ndzi te ngalo: ‘Nungungulu, hi mina loyi! Ndzi tile kasi ku ta maha a kurandza ka wena. (Lomu bhukwini ku tsalilwe lezvo ha mina.)’”
8 Andzhako ka loku a rangile hiku: “A wu zvi lavangi ku amukela miphahlo ni minyikelo, hambu minyikelo ya kuhiswa ni minyikelo ya ciwonho, ne a wu tsakisiwangi hi zvona” — yi nga miphahlo yi nyikelwako hi kuya hi Nayo —
9 i no gumesa aku: “Hi mina loyi! Ndzi tile kasi ku ta maha a kurandza ka wena.” I fuvisa lezvi zvo sangula kasi ku yimisa lezvi zva wumbiri.
10 Hi “kurandza” loku, hi basisilwe hi Jesu Kristu, loyi a nyikeleko miri wakwe khati gin’we zvi enela.
11 Ahandle ka lezvo, a mupristi mun’we ni mun’wani i yima wutshan’wini gakwe siku ni siku kasi ku maha ntiro wo basa ni ku nyikela miphahlo yaleyi ya yin’we hi kuphindaphinda, leyi yi nga zvi kotiko ku susa zviwonho hi kumbhelela.
12 Kanilezvi a wanuna loyi i no nyikela muphahlo wun’we wa zviwonho khati gin’we zvi enela a tlhela a tshama reveni ga cinene ga Nungungulu,
13 a rindzela kala a valala vakwe va vekiwa kota cikhegetelo ca mikondzo yakwe.
14 Hakuva hi kota ya muphahlo wun’we a wu nyikeleko, i mbhelelisile kala kupindzuka lava va basisiwako.
15 Ahandle ka lezvo, a moya wo basa wonawu wa hi kustumunyela loku wuku:
16 “‘Andzhako ka masiku lawo, ndzi ta maha civhumelwano leci navo’, ku wula Jehovha. ‘Ndzi ta veka milayo ya mina timbilwini tabye, ndzi yi tsala maalakanyweni yabye.’”
17 Wu gumesa wuku: “A zviwonho zvabye ni zvihambuko zvabye ndzi nga ta ha zvi alakanya kambe.”
18 Makunu loku lezvi zvi tsetselelwe, a ka ha laveki a munyikelo wa ciwonho.
19 Hikwalaho, vamakabye, kota lezvi hi tiyako ku famba hi ndlela yi yako wutshan’wini go basa hi kota ya nkhata wa Jesu,
20 yi nga ndlela yiswa ni yo hanya leyi a nga hi vhululela* hi ku tsemakanya a kortina, ku nga nyama yakwe,
21 ni lezvi hi nga ni mupristi wa hombe hehla ka yindlu ya Nungungulu,
22 a hi tshineleni mahlweni ka Nungungulu hi timbilu ti basileko ni kukholwa ku mbheleleko, a timbilu ta hina na ti basisilwe* ka livhalo la kubiha, ni mimiri ya hina na yi hlazvilwe hi mati yo basa.
23 A hi khomeni zvi tiya ka kutsumba ka hina hi wulawula hi kona na hi nga tsekatseki, hakuva loyi a nga hi tsumbisa i tsumbekile.
24 A hi khatalelaneni* kasi hi susumetana* lirandzweni ni mitirweni yo saseka,
25 na hi nga tsiki ku tlhangana, a ku khwatsi hi lezvi a van’wani va tolovelako ku maha, kanilezvi hi tiyisana, nguvhunguvhu kota lezvi mu wonako lezvaku a siku ga tshinela kusuhani.
26 Hakuva loku hi wonha ha womu na hi li tivile khwatsi lisine, a ka ha hi na wun’wani muphahlo wa zviwonho,
27 sine ku rindzela hi kuchava a kulamulwa ni zanga yi vhurako leyi yi to lovisa valala.
28 Ni wihi loyi a hambunyetako a Nayo wa Mosi, wa dawa na a nga tsetsiwi, loku ku kumeka wukustumunyu ga vanhu vambiri kutani vanharu.
29 Makunu mu zvi wonisa kuyini? A nga ta kuma tsayiselelo wa hombe nguvhu a munhu loyi a kandzihetelako a N’wana wa Nungungulu, a chepeta a lisima la nkhata wa civhumelwano leci a basisilweko hi cona, a tlhela a rukatela ni ku kanyisa a moya wa tipswalo ke?
30 Hakuva ha mu tiva loyi a wulileko aku: “A kuphota ka mina; hi mina ndzi to tlhelisela.” A tlhela aku: “Jehovha i ta lamula a vanhu vakwe.”
31 Zva chavisa a ku wela mandleni ya Nungungulu a hanyako.
32 Kanilezvi, simamani ku alakanya a masiku ma hundzileko, lawa andzhako ka loku mu woningelwe mu nga timisela a kulwa ka hombe ni kuxaniseka.
33 Ka zvikhati zvin’wani mu wa rukatelwa hi vanhu ni kuva kuxanisekeni; ka zvikhati zvin’wani mu wa hi tlhelweni ga lava va nga kumana ni zvilo lezvo.
34 Hakuva mu va zwele wusiwana lava va nga hi paxweni mu tlhela mu vhumela a ku phangelwa zvilo zva n’wina na mu tsakile, na mu tiva lezvaku mu na ni tshomba ya chukwana ya kala kupindzuka.
35 Hikwalaho, mu nga tsiki a kutiya-hlana ka n’wina, loku ku to chachazelwa nguvhu.
36 Hakuva zva laveka ku mu timisela, kasi loku mu mahile a kurandza ka Nungungulu, mu amukela lezvi zvi tsumbisilweko.
37 Hakuva “ku kiyela kutsongwani”, “loyi a tako i ta chikela, a nga ta hlwela”.
38 “A wakululama wa mina i ta hanya hi kota ya kukholwa”, kanilezvi “loku a tlhelela ndzhako ndzi* nga ta tsaka hi yena”.
39 Kanilezvi hina a hi lava va tlhelelako ndzhako vaya kulovisweni; kanilezvi hi hina lava va nga ni kukholwa kasi ku ponisa a wutomi ga hina.
Mitlhamuselo ya lahasi
^ Zvi nga ha wula ku: “a vanhu a va nge tshuki va”.
^ Hi kukongoma: “khangulela”.
^ Hi kukongoma: “n’watsekelwe”, zvi wulako ku n’watsekelwa nkhata wa Jesu.
^ Kutani: “A hi cheleni kota hi mun’we ni mun’wani wa hina”.
^ Kutani: “hlanganyetelana”.
^ Kutani: “a muhefemulo wa mina wu”.
