Mahebheru 11:1-40
11 A kukholwa kutsumba ko tiya ka lezvaku lezvi zvi rindzelwako zvi ta maheka, ku nga citiyisekiso ca lezvaku lezvi zvi nga wonekiko hakunene zvi kona.
2 Hakuva hi kota ya kukholwa, a vanhu va cikhati ci hundzileko* va mahelwe wukustumunyu ga lezvaku va amukeleka ka Nungungulu.
3 Hi kukholwa, ha zvi zwisisa lezvaku a tinguva* ti xaxametilwe hi gezu ga Nungungulu, hikwalaho lezvi zvi woniwako zvi tile hi ka lezvi zvi nga woniwiko.
4 Hi kukholwa, Abheli i no nyikela muphahlo wa wu nene nguvhu ka Nungungulu a ku hundza lowu wa Kana, niku hi kota ya kukholwa loko i no mahelwa wukustumunyu ga lezvaku munhu wo lulama, hakuva Nungungulu i amukele a munyikelo wakwe. Hambu lezvi Abheli a fileko, a kukholwa kakwe ka ha wulawula.
5 Hi kukholwa, Enoki i no rurisiwa kasi a nga woni kufa; a nga zangi a kumiwa, hakuva Nungungulu i wa mu rurisile. Hakuva na a nga se rurisiwa i no mahelwa wukustumunyu ga lezvaku i tsakisile Nungungulu.
6 Ahandle ka kukholwa, a zvi koteki ku mu tsakisa Nungungulu, hakuva loyi a tshinelako ka Nungungulu i fanele ku kholwa lezvaku Nungungulu i kona ni lezvaku wa chachazela lava va mu hlotako hi mbilu yontlhe.
7 Hi kukholwa, loku Nowa a amukele citlharihiso ca Nungungulu ca zvilo zvo kala zvi nga se woniwa, i no ingisa* Nungungulu a aka taru* kasi ku ponisa a ngango wakwe; hi kota ya kukholwa loko i no kona tiko, ava mugi wa tshomba ya kululama leyi yi kumiwako hi kukholwa.
8 Hi kukholwa, a cikhati leci Abrahama a nga vitaniwa, i no ingisa a suka aya ka wutshamu legi a nga wa ta nyikiwa lezvaku giva tshomba yakwe; i no suka a famba hambu lezvi a nga kala a nga ku tivi lomu a ngaya kona.
9 Hi kukholwa i no maha muluveli tikweni ga citsumbiso, a ku khwatsi i hanya ka tiko ga vambe, a hanya lomu matendeni zvin’we na Isaka na Jakobe, a vagi-kulobye va tshomba ya citsumbiso leco.
10 Hakuva i wa rindzela a dhoropa legi gi nga ni zviseketelo zva lisine, legi gi mahilweko* ni ku akiwa hi Nungungulu.
11 Hi kukholwa, Sara i no kuma ntamu wa ku xura nyimba ya pswalo,* hambu lezvi a nga hundzile tangeni ya ku pswala, hakuva i wa kholwa lezvaku i tsumbekile Loyi a nga mu tsumbisa.
12 Hikwalaho, hi ka wanuna mun’we loyi a nga wonekisa ku khwatsi i file, ku no pswaliwa vana vo talisa ku khwatsi tinyeleti ta tilo, va tsandza-vahlayi a ku khwatsi misava ya bimbi.
13 Vontlhe lava va nofa kukholweni, hambu lezvi va nga kala ku amukela lezvi zvi tsumbisilweko; kanilezvi va zvi wonile hi le kule, va zvi vhumela hi kutsaka, va tlhela va wula mahlweni ka vanhu lezvaku vona valuveli ni vahlavha laha tikweni.
14 Hakuva lava va wulako lezvo, va komba zviku dlunya lezvaku va hlota a wutshamu ga vona wutsumbu.
15 Hambulezvo, loku va wa no tshama hi ku alakanya lomu va nga suka hi kona, na va tlhelile.
16 Kanilezvi zvezvi va lavetela a wutshamu ga gi nene legi gi lumbako matilo. Hikwalaho, Nungungulu a nga na tingana ta ku wuliwa ku i Nungungulu wabye hakuva i va longiselele dhoropa.
17 Hi kukholwa, a cikhati leci Abrahama a nga ringiwa, kutsongwani i wa lava ku nyikela muphahlo hi Isaka. A wanuna loyi a nga amukela a zvitsumbiso na a tsakile, i wa lava ku nyikela a n’wana wakwe a pswalilweko yece,
18 hambu lezvi a nga byelilwe ku ngalo: “A pswalo* wa wena wu ta huma hi ka Isaka.”
19 I no alakanya lezvaku Nungungulu i na ni ntamu wa ku mu vhuxa hambu hi ka vafileko, makunu i no mu amukela hi ndlela yo fananisa.
20 Hi kukholwa, Isaka yenawu i no katekisa Esawu na Jakobe xungetano hi zvilo zvi nga hata.
21 Hi kukholwa, a cikhati leci Jakobe a nga lava kufa, i no katekisa vana va Josefa hi mun’we mun’we, a khozela Nungungulu na a khigele nhonga yakwe.
22 Hi kukholwa, a cikhati leci Josefa a nga hi kusuhani ni kufa, i no wulawula hi kuhuma ka vana va ka Izrayeli, a leletela lezvi va nga fanele ku maha hi marambu yakwe.*
23 Hi kukholwa, andzhako ka loku Mosi a pswalilwe, a vapswali vakwe va no mu fihla hi tihweti tinharu, hakuva va wonile lezvaku a n’wanana i wa sasekile; a va chavangi a nayo wa hosi.
24 Hi kukholwa, a cikhati leci Mosi a nga kula i no ala ku vitaniwa ku i n’wana wa n’waFaro,
25 a hlawula ku xanisiwa ni vanhu va Nungungulu a ku hundza ku ti buza zva cikhatana hi ciwonho,
26 hakuva i wa zvi wona lezvaku a ku rukatelwa ka Kristu ka lisima nguvhu a ku hundza a titshomba ta Gibhite, hakuva i wa rindzela a nchachazelo hi mbilu yontlhe.
27 Hi kukholwa, i no huma Gibhite na a nga chavi a zanga ya hosi, hakuva i no simama ku timisela zvikarato na a ku khwatsi o wona Loyi a nga woniwiko.
28 Hi kukholwa, i no maha Phasika, a n’watsekela nkhata kasi a ngilozi ya Nungungulu yi nga dayi* a vana vabye va matewula.
29 Hi kukholwa, va no tsemakanya a Bimbi go Pswhuka a ku khwatsi vo famba misaveni yo woma, kanilezvi a cikhati leci a vaGibhite va nga ringisa ku maha lezvo, va no mitiwa hi bimbi.
30 Hi kukholwa, a vanhu va no rendzelekela a makhurisi ya Jeriko a 7 wa masiku, ma gumesa mawa.
31 Hi kukholwa, Rahabi, loyi wa cibhayi, a nga lovangi ni lava va nga kala ku ingisa, hakuva i amukele zvipiyawu* hi kurula.
32 Ndza ha ta kuyini kambe? Hakuva ndzi ta biwa hi cikhati loku ndzi simama ku hlawutela xungetano hi Gidheyoni, na Bharaki, na Samsoni, na Jefta, na Dhavhidha, na Samuweli, ni vaphrofeti van’wani.
33 Hi kukholwa, va hlulile mifumo, va tisa kululama, va kuma zvitsumbiso, va vhala minomu ya tinghala,
34 va tima a ntamu wa ndzilo, va pona ku dawa hi cipadha; laha va nga hi ni gome va no nyikiwa ntamu, vava ni ntamu yimpini, va hlula a masochwa ya valala.
35 A vavasati va no vhuxelwa a vafileko vabye, kanilezvi a van’wani va no xanisiwa hi ku ala ku tlhatlhisiwa,* na va fela ku kuma a kuvhuxiwa ka chukwana hi ka vafileko.
36 A van’wani va ringilwe hi ku poyiliwa ni ku biwa; kunene, va zile va bohiwa hi machini,* ni ku vhalelwa mapaxweni.
37 Va no gandliwa hi maribye, va ringiwa, va sahiwa hi laha cikari, va dawa hi cipadha, va fambafamba na va bohile mabhebhe ya tiyivhu ni ya timbuti, vava kuvhumaleni, ni hlomulweni, ni kuxanisiweni;
38 a tiko gi wa nga va ringani. Va no pepetseka lomu zviwuleni, ni lomu zvitsungeni, ni lomu timhakweni, ni lomu mikeleni ya misava.
39 Kanilezvi hambu lezvi a vanhu lava vontlhe va nga mahelwa wukustumunyu gi nene hi kota ya kukholwa kabye, a va zvi amukelangi lezvi va tsumbisilweko,
40 hakuva Nungungulu i wa sina a wonile zva zvi nene lezvi zvi to kumiwa hi hina kasi va nga mbheleliswi voce hina na hi nga hi kona.
Mitlhamuselo ya lahasi
^ Kutani: “a vakokwani va hina”.
^ Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “i no kombisa cichavo ka”.
^ Hi kukongoma: “bhokisa”. A taru legi gi wa hi ngalava ya hombe yo fana ni bhokisa.
^ Kutani: “gi dhezenyarilweko”.
^ Hi kukongoma: “mbewu”.
^ Hi kukongoma: “mbewu”.
^ Kutani: “ku mu lahlisa zvona”.
^ Hi kukongoma: “yi nga henyi”.
^ Kutani: “tihloli”.
^ Kutani: “ku tlhatlhisiwa hi hakhelo ya kutlhatlhisa”.
^ Kutani: “makorente”.
