Mahebheru 2:1-18
2 Hikwalaho, zvezvi hi fanele ku chela nguvhu kota hi zvilo lezvi hi zvi zwileko a ku hundza kale, kasi hi nga tshuki hi hambuka kukholweni.
2 Hakuva loku a mhaka leyi yi nga wuliwa hi tingilozi yi tiyile, ni loku a zvihambuko zvontlhe ni kungaingisi kontlhe ku lamulilwe hi kululama,
3 hina ke, hi ta ponisa kuyini loku hi kanyisa a kuhanyisa ka hombe ko kota loku? Hakuva a kusangula ku wulilwe hi Hosi ya hina ku tlhela ku tiyisiwa ka hina hi lava va nga yizwa.
4 Nungungulu yenawu i no nyika wukustumunyu hi zviwoniso ni zvihlamaliso ni mitiro yo tala ya ntamu, a avela a zvinyikiwo zva moya wo basa hi kuya hi kurandza kakwe.
5 Hakuva a misava leyi yi tako, leyi hi wulawulako hi yona, a nga yi vekangi lahasi ka tingilozi.
6 Kanilezvi a kustumunyu wo kari i wulile lezvi ka mutsalo wo kari, aku: “A munhu ova yini ko kala u mu alakanya, ahati a n’wana wa munhu ke, ova yini ko kala u mu hlayisa?
7 U mu mahile ava lahasi ka tingilozi zva cikhatana, u mu sasekisa hi kungangamela ni wudzundzo, u mu yimisa lezvaku a fumela mitiro ya mandla ya wena,
8 u tlhela u veka zvilo zvontlhe lahasi ka mikondzo yakwe.” Laha Nungungulu a nga veka zvilo zvontlhe lahasi kakwe, ci hava a nga ci siya na ci nga hi lahasi kakwe. Hambulezvo a hi se zvi wona lezvaku a zvilo zvontlhe zvi vekilwe lahasi kakwe.
9 Kanilezvi Jesu loyi a mahilweko ava lahasi ka tingilozi zva cikhatana, ha mu wona na a sasekiselwe hi kungangamela ni wudzundzo hi lezvi a nga xaniseka kala afa, kasi hi kota ya tipswalo ta Nungungulu, a fela vanhu vontlhe.
10 Hakuva zva mu ringana Nungungulu, loyi a zvilo zvontlhe zvi mahelweko yena, na zvi mahiwa hi yena, lezvaku a cikhati leci a nehako vana vo tala kungangameleni, a mbhelelisa a Hosi ya kuhanyiswa kabye hi ku yi tsika yi xaniseka.
11 Hakuva loyi a va basisako ni lava va basisiwako vata hi ka yaloyi wa mun’we, hikwalaho a nga na tingana ta ku va vitana ku vamakabye vakwe,
12 hikwalaho i ngalo: “Ndzi ta kanela a vito ga wena ka vamakabye va mina; ndzi ta yimbelela tisimu ndzi ku dhumisa lomu bandleni.”
13 A engeta aku: “Ndzi ta tsumba yena.” A tlhela aku: “Hi mina loyi, ni vanana lava Jehovha a nga ndzi nyika.”
14 Hikwalaho kota lezvi a “vanana” va nga vanhu va nyama ni nkhata, yenawu ive munhu wa nyama ni nkhata, kasi hi kufa kakwe a fela ku fuvisa loyi a nga ni ntamu wa ku daya, ku nga Sathani,*
15 ni ku tlhatlhisa vontlhe lava va nga hi tikhumbi kuhanyeni kabye kontlhe hi kota ya ku chava kufa.
16 Hakuva a nga vhuneteli a tingilozi, kanilezvi i vhunetela a pswalo* wa Abrahama.
17 Hikwalaho, zvi wa lava lezvaku a fana ni “vamakabye” vakwe hi matlhelo wontlhe, a fela kuva mupristi wa hombe wa wuxinji ni wo tsumbeka zvilweni zva Nungungulu, lezvaku a nyikela a muphahlo wa ku tlhatlhisa vanhu ka zviwonho kasi va tlhela va zwanana na Nungungulu.
18 Kota lezvi yena wutsumbu a nga xaniseka a cikhati leci a nga ringiwa, wa zvi kota a ku ta vhunetela lava va ringiwako.
Mitlhamuselo ya lahasi
^ Hi ciGreki: di·á·bo·los, zvi wulako ku “mulumbeti”.
^ Hi kukongoma: “mbewu”.
