Mahebheru 3:1-19
3 Hikwalaho, vamakabye vo basa, n’wina vahlengeli va kuvitaniwa ka le tilweni, alakanyani Jesu, a mupostoli tlhelo mupristi wa hombe loyi hi mu vhumelako.
2 I no tsumbeka ka Loyi a mu yimisileko, a ku fana ni lezvi Mosi yenawu a nga tsumbeka lomu ndlwini yontlhe ya Nungungulu.
3 Hakuva Jesu wa ringanelwa hi wudzundzo ga hombe go hundza legi ga Mosi, hakuva loyi a akako yindlu hi yena a nga ni wudzundzo ga hombe a ku hundza yindlu ya kona.
4 Kunene, a yindlu yin’we ni yin’wani yi akilwe hi munhu, kanilezvi loyi a vangileko zvilo zvontlhe hi Nungungulu.
5 Mosi i wa tsumbekile lomu ndlwini yontlhe ya Nungungulu kota nandza, zviva wukustumunyu ga lezvi zvi nga wa ta wulawuliwa hi ndzhako ka cikhati.
6 Kanilezvi Kristu i wa tsumbekile kota n’wana hehla ka yindlu ya Nungungulu. Hina hi yindlu Yakwe loku hakunene hi simama ku wulawula hi kutiya hi tlhela hi khomisisa a kutsumba loku hi ti dzundzako hi kona kala magumo.
7 Hikwalaho, khwatsi hi lezvi a moya wo basa wu wulako wuku: “Nyamutlha loku muzwa a gezu gakwe,
8 mu nga nonohisi timbilu ta n’wina a ku fana ni cikhati leci a vakokwani va n’wina va nga ndzi vhuxela zanga, a ku khwatsi hi siku legi va nga ndzi ringa le ciwuleni,
9 lomu va nga ndzi ringa ni ku ndzi phikiza, hambu lezvi va nga wonile a mitiro ya mina hi 40 wa malembe.
10 Hi cigelo leco, ndzi no zangarela a cizukulwana leco, ndziku: ‘Va tshamela ku lahleka timbilwini tabye, a va ti tivi tindlela ta mina.’
11 Hikwalaho ndzi no hlambanya zangeni ya mina ndziku: ‘Va nga ta nghena kuhumuleni ka mina.’”
12 Makunu, vamakabye, ti woneleni kasi ku nga tshuki ku humelela ka mun’we wa n’wina a mbilu yo biha yi nga kholwiko hi ku fularela Nungungulu loyi a hanyako;
13 kanilezvi simamani ku tiyisana siku ni siku na ka ha wuliwa ku “nyamutlha”, kasi ne mun’we wa n’wina a nga nonohiswi hi ntamu wa kukanganyisa ka ciwonho.
14 Hakuva hi vahlengeli na Kristu ntsena loku hi khomisisa a kutsumba ka hina ko sangula kala magumo.
15 Hakuva a Mitsalo yi ngalo: “Nyamutlha loku muzwa a gezu gakwe, mu nga nonohisi timbilu ta n’wina a ku fana ni cikhati leci a vakokwani va n’wina va nga ndzi vhuxela zanga.”
16 Kasi hi vamani va ngazwa a gezu ga Nungungulu, hambulezvo va ala va mu vhuxela zanga ke? A hi vona vontlhe lava va humileko hi Gibhite na va rangelwa hi Mosi ke?
17 Ahandle ka lezvo, kasi hi vamani lava Nungungulu a nga va zangarela a 40 wa malembe? A hi vona lava va nga wonha, va fela ciwuleni ke?
18 Kona hi vamani lava a nga va hlambanyela lezvaku va nga ta nghena kuhumuleni kakwe ke? A hi vona lava va nga kala ku ingisa ke?
19 Hikwalaho, ha zvi wona lezvaku va tsandzekile ku nghena hi lezvi va nga kala va nga kholwi.
