Mahebheru 4:1-16
4 Hikwalaho, kota lezvi a citsumbiso ca ku nghena kuhumuleni kakwe ca ha hiko kona, a hi ti woneleni kasi ku ngavi ni mun’we wa n’wina a salako ndzhako.
2 Hakuva hinawu hi chumayelwe a mahungu ya ma nene a ku fana na vona; kanilezvi a mhaka leyi va yi zwileko a yi va vhunangi nchumu, hakuva va wa nga hi na kukholwa ko fana ni loku ka lava va nga ingisa.
3 Hakuva hina lava hi kholwako ha nghena kuhumuleni kakwe. Kanilezvi xungetano hi vona, i te ngalo: “Hikwalaho ndzi no hlambanya zangeni ya mina ndziku: ‘Va nga ta nghena kuhumuleni ka mina’”, hambu lezvi yena wutsumbu a nga nghena kuhumuleni andzhako ka loku a mbhetile mitiro yakwe kusukela kuvangiweni ka tiko.
4 Hakuva ka mutsalo wo kari i wulile lezvi xungetano hi siku ga wu 7, aku: “Nungungulu i no humula mitirweni yakwe yontlhe hi siku ga wu 7”,
5 a tlhela aku: “Va nga ta nghena kuhumuleni ka mina.”
6 Hikwalaho, kota lezvi ka ha vhumelelwako vokari a ku nghena kuhumuleni loko, ni lezvi lava va nga ranga hi vona va kanelelwa a mahungu ya ma nene va nga tsandzeka ku nghena hi kota ya kungaingisi,
7 i tlhela a yimisa a siku gin’wani hi ku wula ku “nyamutlha” ka lisimu la Dhavhidha na ku hundzile cikhati co leha, khwatsi hi lezvi ku sinako ku wulilwe ku: “Nyamutlha loku muzwa a gezu gakwe, mu nga nonohisi timbilu ta n’wina.”
8 Hakuva loku Joxuwa i wa va yisile wutshan’wini ga kuhumula, Nungungulu na a nga ha engetangi a wulawula hi siku gin’wani.
9 Hikwalaho a vanhu va Nungungulu va ha salelwe hi sabhadho ga kuhumula.
10 Hakuva loyi a nga nghena kuhumuleni ka Nungungulu i humulile mitirweni yakwe kambe, a ku fana ni lezvi Nungungulu a nga humula ka leyi yakwe.
11 Hikwalaho, a hi ti tsitsiriteni kala hi nghena kuhumuleni loko, kasi ku ngavi na munhu a welako ka hanyela lego ga kungaingisi.
12 Hakuva a mhaka ya Nungungulu ya hanya, yi na ni ntamu, niku ya kariha a ku hundza cipadha ci tsemako seno ni seno, yi tlhava yi kala yi hambanisa a muhefemulo* ni moya,* ni mahlakala ni mongo; yi hlola a maalakanyo ni mixuvo ya mbilu.
13 A ku na civangwa ci fihleleko kuwoneni kakwe, kanilezvi a zvilo zvontlhe zvi funungulwe zviku dlunya matihlweni ya loyi hi to ti hlamulela kakwe.
14 Hikwalaho, kota lezvi hi nga ni mupristi wa hombe wo hundza vontlhe, loyi a nga nghena matilo, ku nga Jesu a N’wana wa Nungungulu, a hi simameni ku wulawula hi kukholwa loku hi nga nako ka yena.
15 Hakuva a mupristi wa hombe loyi hi nga naye a nga tsandzeki ku hi zwela wusiwana gomeni ga hina hakuva i ringilwe hi matlhelo wontlhe a ku fana na hina, kanilezvi a nga wonhangi.
16 Makunu a hi tshineleni hi kutiya citshan’wini ca wuhosi ca Nungungulu loyi a nyikako tipswalo,* hi khongela kakwe na hi nga chavi, kasi a hi mahela wuxinji ni ku hi nyika tipswalo ta ku hi vhuna hi cikhati ci faneleko.
Mitlhamuselo ya lahasi
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Hi kukongoma: “citshan’wini ca wuhosi ca tipswalo”.
