Mahebheru 5:1-14
5 Hakuva ni wihi mupristi wa hombe a langilweko cikari ka vanhu, i yimisiwa kasi ku yimela vanhu zvilweni zva Nungungulu a fela ku nyikela a minyikelo ni miphahlo ya zviwonho.
2 Wa zvi kota ku va zwela wusiwana lava va nga tiviko ni lava va hambunyetako nayo, hakuva yenawu i na ni gome gakwe wutsumbu.
3 Hikwalaho, i fanele ku nyikela miphahlo ya zviwonho zvakwe wutsumbu a ku fana ni lezvi a nyikelako ya zviwonho zva vanhu.
4 A munhu a nga kumi a cikhundla leci co dzundzeka hi kurandza kakwe, kanilezvi i ci kuma ntsena loku a vitanilwe hi Nungungulu, a ku fana na Aroni.
5 Hikwalaho, Kristu yenawu a nga ti tlakusangi a ti maha mupristi wa hombe ha yece, kanilezvi i tlakusilwe hi Loyi a nga mu byela, aku: “Wena u n’wana wa mina ndzi ku pswalileko nyamutlha.”
6 I wulile kambe ka wun’wani mutsalo, aku: “Wena u mupristi kala kupindzuka hi tshamela ga Melkizedheki.”
7 A cikhati leci a nga hanya laha misaveni,* Kristu i no khongela, a khongotela ni ku kombela hi kurila ka hombe ni mihloti ka Loyi a nga hi ni ntamu wa ku mu tlhatlhisa kufeni, niku i no zwiwa hi kota ya lezvi a nga chava Nungungulu.
8 Hambu lezvi a nga hi n’wana, i gondzile ku ingisa ka zvilo lezvi a nga xaniseka hi zvona.
9 Andzhako ka loku a mbhelelisilwe, i no nyikwa ntiro wa ku neha kuhanyiswa ka pindzukelwa ka vontlhe lava va mu ingisako,
10 hakuva hi yena a nga yimisiwa hi Nungungulu lezvaku ava mupristi wa hombe hi tshamela ga Melkizedheki.
11 Hi na ni zvotala zvo zvi wula ha yena, kanilezvi zva karata a ku zvi tlhamusela hakuva ma nonoka ku ingisa.
12 Hakuva hambu lezvi ka cikhati leci* mu nga fanele kuva vagondzisi, ma ha lava munhu wa ku mu gondzisa a tigondzo to sangula ta timhaka ta Nungungulu kusukela kusanguleni; hakuva ma ha lava mafi* na ku nga hi zvakuga zvo tiya.
13 Hakuva ni wihi loyi a simamako ku wundliwa hi mafi* a nga yi tivi a mhaka ya kululama hakuva wa ha hi n’wanana.
14 Kanilezvi, a zvakuga zvi tiyileko zvi giwa hi vanhu va kulileko, lava va toloveleko ku tirisa a kupima kabye kala va zvi kota ku hambanisa a zva zvi nene ni zvakubiha.
Mitlhamuselo ya lahasi
^ Hi kukongoma: “Masikwini ya kuhanya kakwe nyameni”.
^ Hi kukongoma: “hambu lezvi hi kota ya cikhati leci ci hundzileko”.
^ Kutani: “leti”.
^ Kutani: “leti”.
