Mahebheru 6:1-20
6 Hikwalaho, kota lezvi makunu hi hundzileko ka zvigondzo zvo sangula xungetano hi Kristu, a hi ti karateleni kuya phambeni hi kongoma kubuvheni, hi nga ha tlheli hi zima ciseketelo, ku nga ku ti sola mitirweni leyi yi fileko, ni ku kholwa ka Nungungulu,
2 ni gondzo ya kubhabhatisa, ni ku tlhateka mandla, ni kuvhuka ka vafileko ni kulamula ka pindzukelwa.
3 Lezvo hi ta zvi maha loku Nungungulu a vhumela.
4 Makunu, xungetano hi lava a kale va nga woningelwe, va ringa a cinyikiwo ca le tilweni va tlhela va amukela a moya wo basa,
5 lava va nga ringa a mhaka yo nandziha ya Nungungulu ni mintamu ya cikhati ca ha tako,*
6 kanilezvi va gumesa vawa, a zvi koteki ku va tlhelisela kambe kuhundzulukeni hakuva va tlhelile va belela a N’wana wa Nungungulu, va mu maha cihlekiso ka vanhu.
7 Hakuva a misava yi kuma makatekwa ya Nungungulu a cikhati leci yi pswongako a vhula leyi yi tshamelako kuna hehla ka yona yi gumesa yi milisa zvibyalo zvi vhunako lava va rimako misava.
8 Kanilezvi loku a misava yi milisa mimizwa ni mahlehlo, yi ta tsikiwa yi tlhela yi rukatelwa, hi kugumesa yi hisiwa.
9 Kanilezvi, n’wina varandzekako, hambu lezvi hi wulawulisako lezvi, a hi kanakani ne ni kutsongwani lezvaku mu ka ciyimo ci nene; mu maha zvilo lezvi zvi mu yisako kuhanyisweni.
10 Hakuva Nungungulu a hi munhu a nga lulamangiko wo kala a rivala a mitiro ya n’wina, ni lirandzo leli mu nga li kombisa vitweni gakwe hi lezvi mu tireleko* vobasa, ni lezvi ma ha simamako ku va tirela.*
11 Kanilezvi hi xuva ku a mun’we ni mun’wani wa n’wina a ti tsitsiritisa lezvo, lezvaku ava ni kutsumba ko tiya kala magumo,
12 kasi mu nga lolohi, kanilezvi muva vapimanyisi va lava va gako a tshomba ya zvitsumbiso hi kota ya kukholwa ni lihlazva-mbilu.
13 Hakuva a cikhati leci Nungungulu a nga maha citsumbiso cakwe ka Abrahama, i no hlambanya hi wutsumbu gakwe, kota lezvi ku nga hi hava wahombe ku hundza yena wa ku hlambanya hi yena.
14 I te ngalo: “Hakunene ndzi ta ku katekisa nguvhu, ndzi andzisa nguvhu a pswalo wa wena.”
15 Hikwalaho, andzhako ka loku Abrahama a kombisile lihlazva-mbilu i no nyikiwa a citsumbiso.
16 Hakuva a vanhu va hlambanya hi munhu wa hombe ku hundza vona, niku a kuhlambanya kabye ku mbheta a kukanetisana kontlhe, hakuva hi kona ku tiyisako a mhaka.
17 Nungungulu yenawu, a cikhati leci a nga lava ku komba zviku dlunya ka vagi va tshomba lezvaku a kungo gakwe a gi cici, i no zvi tiyisa hi kuhlambanya,
18 kasi hi ka zvilo zvimbiri zvi nga ciciko, lezvi Nungungulu a nga zvi kotiko ku hemba ka zvona, hina lava hi tsutsumeleko wuponelweni hi fela kuva ni kutiyiswa ka hombe kasi hi khoma zvi tiya kutsumbeni loku ku vekilweko mahlweni ka hina.
19 A kutsumba loku hi nga nako ku fana ni fero* ka muhefemulo;* kutsumba ka lisine ni ko tiya loku ku nghenako kala lomu ndzeni hi le ndzhako ka kortina,
20 lomu Jesu a nga ranga hi yena a nghena hi kota ya hina, yena loyi a ngava mupristi wa hombe hi tshamela ga Melkizedheki kala kupindzuka.
Mitlhamuselo ya lahasi
^ Kutani: “nguva ya ha tako”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “vhuneteleko”.
^ Kutani: “vhunetela”.
^ Kutani: “nanga”.
^ Kutani: “ka wutomi ga hina”.
