Mahebheru 7:1-28
7 Hakuva Melkizedheki loyi a nga hi hosi ya le Salema tlhelo mupristi wa Nungungulu a Tlakukileko ku Hundza Vontlhe, i no tlhangana na Abrahama na a wuya hi le ko daya tihosi, a mu katekisa.
2 Abrahama i no mu nyika* zva wukhume zva muphango wakwe wontlhe. Loku ku tlhamuselwa a vito gakwe, a co sangula, gi wula ku i “hosi ya kululama”, a ca wumbiri i hosi ya le Salema, zvi wulako ku “hosi ya kurula”.
3 Lezvi a kalako a nga hi na papayi ni mamani ne lixaka, ni lezvi a nga hava kusangula ka masiku, ne hambu ni kugumelwa ka kuhanya, kanilezvi na a fana ni N’wana wa Nungungulu, i simama kuva mupristi kala kupindzuka.
4 Hi nga wonani a kukula ka Melkizedheki, loyi Abrahama, a kokwani* wa hina, a nga mu nyika a zva wukhume zva muphango wakwe wa wu nene!
5 Kunene, a vana va Levhi, lava va amukelako a cikhundla ca wupristi, va layiwa hi Nayo lezvaku va teka zva wukhume ka vanhu, va nga vamakabye vabye, hambu lezvi a vanhu lavo va nga pswalo wa* Abrahama.
6 Kanilezvi a wanuna loyi, wo kala a nga humi hi ka lixaka labye, i no teka zva wukhume ka Abrahama a tlhela a katekisa loyi a nga hi ni zvitsumbiso.
7 Makunu a zvi na ku kanetiwa lezvaku loyi wa mutsongwani i katekisiwa hi loyi wa hombe.
8 Ka mhaka yo sangula, lava va amukelako zva wukhume vanhu lava va fako, kanilezvi ka mhaka leyi yin’wani, loyi a amukelako zva wukhume hi loyi a Mitsalo yi mu kustumunyelako lezvaku wa hanya.
9 Hikwalaho, ku nga wuliwa lezvaku hambu Levhi, loyi a amukelako zva wukhume, i humesile zva wukhume hi canja ga Abrahama,
10 hakuva Levhi i wa hata hi ka pswalo wa* kokwani wakwe a cikhati leci a nga tlhangana na Melkizedheki.
11 Makunu loku a kumbhelela ku wa no kumeka hi wupristi ga ka Levhi (kota lezvi gi nga hi nchumu wa lisima Nayweni lowu wu nga nyikilwe vanhu), hikuyini ku nga ha laveka lezvaku kuta mun’wani mupristi hi tshamela ga Melkizedheki na ku nga hi hi tshamela ga Aroni ke?
12 Hakuva loku a wupristi gi ciciwa, a Nayo wonawu wu fanele ku ciciwa.
13 Hakuva loyi a timhaka leti ti wulawulako hi yena i tile hi ka lixaka lin’wani, la ku a ku se huma hi ka lona a munhu a nga tshuka a tira alatini.
14 Hakuva zva tiveka khwatsi lezvaku a Hosi ya hina yita hi ka lixaka la ka Judha, hambulezvo Mosi a nga zangi a wula lezvaku a vapristi va ta huma hi ka lixaka leli.
15 A mhaka leyi yi tlhela yi dlunyateka nguvhu a cikhati leci ku chikelako mun’wani mupristi wo fana na Melkizedheki,
16 loyi a nga mupristi hi ntamu wa wutomi gi nga lovisiwiko, na ku nga hi hi kota ya lixaka leli a humako ka lona kota kulaya ka Nayo.
17 Hakuva ku kustumunyiwa lezvi xungetano hi yena: “Wena u mupristi kala kupindzuka hi tshamela ga Melkizedheki.”
18 Hikwalaho a nayo wa kale wu fuvisilwe hakuva a wu na ntamu niku a wu vhuni nchumu.
19 Hakuva a Nayo a wu zvi kotangi ku mbhelelisa nchumu, kanilezvi a kutsumba ka ku nene loku ku nga nghenisiwa ku zvi kotile. Hi tshinela ka Nungungulu hi kota ya kutsumba loku.
20 A ku tsika lezvo, a mupristi loyi a nga yimisiwangi na ku nga hlambanyiwangi
21 (kunene, ku na ni vavanuna va nga maha vapristi Nungungulu na a nga hlambanyangi, kanilezvi loyi i mahile mupristi hi kuhlambanya ka Nungungulu, hakuva xungetano hi yena, Nungungulu i te ngalo: “Jehovha i hlambanyile, a nga ta cica lezvi a zvi wulileko, aku: ‘Wena u mupristi kala kupindzuka’”).
22 Hizvalezvo, Jesu i nova citiyisekiso ca civhumelwano ca ci nene.
23 Ahandle ka lezvo, a votala va mahile vapristi na va vhaleta vapristi van’wani hakuva a kufa ku wa va tsandzekisa a ku simama va tira kota vapristi,
24 kanilezvi, kota lezvi yena a simamako ku hanya kala kupindzuka, a wupristi gakwe a gi lavi muvhaleti.
25 Hikwalaho, wa zvi kota ku hanyisa hi kumbhelela lava va tshinelako ka Nungungulu ha yena, hakuva yena wa hanya contlhe cikhati kasi ku va kombelela.
26 Hakuva zva fanela a kuva hi hi ni mupristi wa hombe wo tshamisa lezvo, wo tsumbeka, a nga hiko na nandzu, a basileko, a hambanisilweko ni vawonhi, loyi a tlakusilweko hehla ka matilo.
27 Yena a nga fani ni vapristi va hombe lava van’wani, hakuva a zvi lavi ku a nyikela miphahlo siku ni siku, a sangula hi leyi ya zviwonho zvakwe a gumesa hi leyi ya zviwonho zva vanhu, hakuva lezvo i zvi mahile khati gin’we zvi enela, a cikhati leci a nga ti nyikela wutsumbu gakwe.
28 Hakuva a Nayo wu yimisa vanhu lava va nga ni gome lezvaku vava vapristi va hombe, kanilezvi a mhaka ya kuhlambanya leyi yi ngata hi ndzhako ka Nayo, yi yimisa a N’wana loyi a nga mbheleliswa kala kupindzuka.
Mitlhamuselo ya lahasi
^ Hi kukongoma: “pambulela”.
^ Kutani: “a nyapandze”.
^ Hi kukongoma: “va humako ciwunwini ca”.
^ Hi kukongoma: “i wa ha hi ciwunwini ca”.
