Mahebheru 8:1-13
8 A tshinya ga timhaka leti hi wulako hi legi: Hi na ni mupristi wa hombe wo tshamisa lezvi, a tshamileko reveni ga cinene ga citshamu ca wuhosi ca Loyi a Tlakukileko ku Hundza Vontlhe le tilweni,
2 a nga nandza ga wutshamu go basa ni ga tabhernakeli* ga lisine, gi yimisilweko hi Jehovha, na ku nga hi hi munhu.
3 Hakuva vontlhe a vapristi va hombe va yimisiwa kasi ku nyikela a minyikelo ni miphahlo; hikwalaho, zvi wa laveka ku yenawu loyi ava ni co nyikela.
4 Loku i wa hi laha misaveni na a nga mahangi mupristi, hakuva ku sina ku hi ni vanhu va nyikelako minyikelo kota kulaya ka Nayo.
5 A vanhu lava va maha a ntiro wo basa lowu wu nga mufananiso ni ndzhuti wa zvilo zva le tilweni; khwatsi hi cikhati leci Mosi a nga lava ku aka tabhernakeli,* Nungungulu i no mu laya aku: “Maha zvontlhe na u landzela cikombiso leci u kombilweko le citsungeni.”
6 Kanilezvi Jesu i nyikilwe a ntiro wa wu nene nguvhu ku hundza lowu wa vona hakuva hi yena kambe a nga mutlhanganyisi wa civhumelwano leci ca ci nene a ku hundza leci ca kale, ci tiyisiwako hi zvitsumbiso zva zvi nene nguvhu.
7 Loku a civhumelwano co sangula ci wa nga solekangi, na ku nga ha lavekangi ca wumbiri.
8 Kanilezvi kota lezvi Nungungulu a kumako cisolo ka vanhu, i ngalo: “‘A masiku mata’, ku wula Jehovha, ‘lawa ndzi to maha a civhumelwano ciswa ni yindlu ya ka Izrayeli ni yindlu ya ka Judha.
9 A civhumelwano leci ci nga ta fana ni leci ndzi nga ci maha ni vakokwani vabye, ka siku legi ndzi nga va khoma hi canja gabye ndzi va humesa tikweni ga Gibhite, hakuva a va hlayisangi a civhumelwano ca mina, hikwalaho ndzi no va tsika’, ku wula Jehovha.”
10 “‘Hakuva andzhako ka masiku lawo, ndzi ta maha civhumelwano leci ni yindlu ya ka Izrayeli’, ku wula Jehovha. ‘Ndzi ta veka milayo ya mina maalakanyweni yabye, ndzi yi tsala timbilwini tabye. Ndzi tava Nungungulu wabye, vona va tava vanhu va mina.
11 “‘A ku na munhu cikari kabye a to gondzisa a muakelani wakwe ne ku gondzisa a makabye wakwe, aku: “Tiva Jehovha!” Hakuva vontlhe va ta ndzi tiva, kusukela ka loyi wa mutsongwani kala ka loyi wahombe.
12 Hakuva ndzi ta va mahela wuxinji ndzi va tsetselela a mitiro yabye yo kala kululama, ni zviwonho zvabye ndzi nga ta ha zvi alakanya kambe.’”
13 Lezvi a nge “civhumelwano ciswa”, i komba lezvaku i chipisile leci ca kale. Makunu leci ci chipileko ni ku hundzelwa ci laha kusuhani ni ku n’walala.
