Mahebheru 9:1-28
9 Hakuva a civhumelwano ca kale ci wa hi ni zvileletelo zva mamahela ya ntiro wo basa, ni wutshamu go basa laha misaveni.
2 Hakuva ku wa akilwe a tabhernakeli;* lomu ka sala yo sangula ku wa hi ni nenge wo veka tikandiya, ni meza, ni tipawa ta munyikelo. A wutshamu legi gi wa vitaniwa ku Wutshamu go Basa.
3 Kanilezvi le ndzhako ka kortina ga wumbiri ku wa hi ni sala yin’wani yi nga vitaniwa ku Wutshamu go Basabasa.
4 Ka wutshamu lego ku wa hi ni cibya ca ouro co hisela kona libani ni nghaxa* ya civhumelwano yi nga nameketelwe ouro matlhelweni wontlhe. Lomu ndzeni ka nghaxa ku wa hi ni jaro ya ouro yi nga hi ni mana, ni nhonga ya Aroni leyi yi nga hlukile, ni maribye ya civhumelwano.
5 Laha hehla ka yona ku wa hi ni makerubhima yo ngangamela ma nga sirela a tapa* ya nghaxa.* Kanilezvi leci a hi cikhati ca ku wulawula hi zvilo lezvi hi cin’we cin’we.
6 Loku a zvilo lezvi zvi akisilwe lezvi, a vapristi va nghena ka sala yo sangula siku ni siku va maha mitiro yo basa;
7 kanilezvi lomu ka sala ya wumbiri ku nghena mupristi wa hombe yece khati gin’we hi lembe; a nga ngheni na a nga hi na nkhata, lowu a wu nyikelako hi kota ya zviwonho zvakwe ni hi kota ya zviwonho lezvi a vanhu va zvi mahileko na va nga zvi tivi.
8 Hikwalaho, a moya wo basa wu komba zviku dlunya lezvaku a ndlela yi yako wutshan’wini go basa yi wa nga se kombisiwa a cikhati leci ku nga ha hi ni tabhernakeli* go sangula.
9 A tabhernakeli* legi mufananiso wa zvilo zva cikhati leci, niku kala nyamutlha ka ha nyikelwa minyikelo ni miphahlo, hambulezvo a yi zvi koti ku basisa hi kumbhelela a livhalo la loyi a mahako mitiro yo basa.
10 A minyikelo leyi ni miphahlo ya kona zvi yelana ntsena ni zvakuga ni zva kunwa ni kubasisa ko tsalangana hi kuya hi nayo. Zvi wa hi zvileletelo zvi nga yimisilwe hi nayo xungetano hi miri, lezvi zvi tirileko kala cikhatini ci yimisilweko ca ku lulameta zvilo.
11 Kanilezvi a cikhati leci Kristu a ngata kota mupristi wa hombe wa zvilo zva zvi nene lezvi zvi nga sina zvi mahekile, i no nghena ka tabhernakeli* ga hombe ni go mbhelela ku hundza wontlhe, go kala gi nga mahiwangi hi mandla ya munhu, lezvi zvi wulako ku a hi ga laha misaveni.
12 A nga nghenangi wutshan’wini go basa na a hi ni nkhata wa timbuti ni wa zvidhunana zva tihomu, kanilezvi i no nghena ni nkhata wakwe wutsumbu khati gin’we zvi enela, a hi kumela a kutlhatlhiswa ka pindzukelwa.
13 Hakuva loku a nkhata wa timbuti ni wa tihomu, ni khuma ga hon’wana ya kati, zvi n’watsekelwako ka lava va nyenyezileko zvi va hlazva kasi va basa hi ka nyama,
14 a ha ha wuli hi nkhata wa Kristu, loyi hi moya wa pindzukelwa a ti nyikeleko ka Nungungulu na a nga hi na cisolo, hakunene wu ta basisa a tivhalo ta hina ka mitiro yi fileko kasi hi tirela Nungungulu a hanyako!
15 Hi zvalezvo zvi mu mahako ava mutlhanganyisi wa civhumelwano ciswa, hakuva i file kasi hi hakhelo yakwe ya kutlhatlhisa a tlhatlhisa vanhu ka zvihambuko lezvi va zvi mahileko na va ha hi ka civhumelwano leci ca kale, ni lezvaku lava va vitanilweko va fela ku amukela a citsumbiso ca tshomba ya pindzukelwa.
16 Hakuva laha ku nga ni civhumelwano, ku laveka lezvaku a munhu loyi a ci mahileko afa,
17 hakuva a civhumelwano ci tiyisiwa hi kufa. Hakuva loku a ha hanya a munhu loyi a ci mahileko, a civhumelwano leco a ci tiri.
18 Hikwalaho, a civhumelwano ca kale conawu a ci tirangi* na ku nga hi na nkhata.
19 Hakuva laha Mosi a nga mbhetile ku nyika zvileletelo zvontlhe ka vanhu vontlhe, i no teka a nkhata wa zvidhunana zva tihomu, ni wa timbuti, ni mati, ni woya go pswhuka ga tiyivhu, ni hisope,* a n’watsekela bhuku ni vanhu vontlhe,
20 aku: “Lowu i nkhata wa civhumelwano leci Nungungulu a mu layileko lezvaku mu ci hlayisa.”
21 I no n’watsekela nkhata kambe ka tabhernakeli* ni ka zvibya zvontlhe zvi tirisiwako ntirweni wo basa.
22 Kunene, hi kuya hi Nayo, a kutala ka zvilo zvi basiswa hi nkhata, niku a ku na kutsetselelwa ka zviwonho loku a nkhata wu nga halatiwi.
23 Hikwalaho, zvi wa laveka lezvaku a zvilo lezvi zvi fananisako a zvilo zva le tilweni zvi basiswa hi ndlela leyi, kanilezvi a zvilo zva le tilweni zvi lava miphahlo ya yi nene nguvhu yo hundza leyo.
24 Hakuva Kristu a nga nghenangi wutshan’wini go basa ga ku mahiwa hi mandla ya munhu, legi gi nga ndzhuti wa lezvi zva lisine, kanilezvi i no nghena tilweni ha koce kasi makunu a hi yimela mahlweni ka Nungungulu.
25 A nga mahangi lezvo kasi ku ti nyikela hi kuphindaphinda, a ku khwatsi mupristi wa hombe loyi a nghenako wutshan’wini go basa lembe ni lembe na a hi ni nkhata wu nga hiko wa yena n’winyi.
26 Loku zvi wa hi lezvo, na a xanisekile makhati yo tala kusukela kuvangiweni ka tiko. Kanilezvi i no ti wonekelisa khati gin’we zvi enela kugumeseni ka zvikhati,* kasi a fuvisa ciwonho hi muphahlo wa yena wutsumbu.
27 A ku fana ni lezvi a vanhu va yimelweko hi kufa khati gin’we zvi enela, kanilezvi va gumesa va lamuliwa,
28 hizvalezvo Kristu yenawu i no nyikelwa khati gin’we zvi enela, kasi a rwala zviwonho zva votala. Ka khati ga wumbiri legi a to woneka, i tava lahandle ka ciwonho;* i to woniwa hi lava va mu rindzelako hi kuxuva ka hombe lezvaku a va hanyisa.
Mitlhamuselo ya lahasi
^ Hi kukongoma: “tenda”.
^ Kutani: “arke”.
^ A gezu ga ciGreki gi hundzuluselweko ku “tapa” ka vhesi legi gi nga ha wula kambe a munyikelo wa ku kombela ku tsetselelwa zviwonho kasi ku simama ku amukeleka ka Nungungulu.
^ Kutani: “arke”.
^ Hi kukongoma: “tenda”.
^ Hi kukongoma: “tenda”.
^ Hi kukongoma: “tenda”.
^ Hi kukongoma: “a ci khanguliwangi”.
^ Wona Tlhamuselo wa magezu ya Bhibhiliya.
^ Hi kukongoma: “tenda”.
^ Kutani: “ka tinguva”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “a nga ta tela ciwonho”.
