Marku 10:1-52
-
A kuchadha ni kutsikana (1-12)
-
Jesu a katekisa vanana (13-16)
-
Ciwutiso ca wanuna wo ganya (17-25)
-
Siya zvontlhe u landzela Jesu (26-31)
-
Jesu a phrofeta kambe hi kufa kakwe (32-34)
-
Cikombelo ca Jakobe na Johani (35-45)
-
Jesu i hakhelo ya ku tlhatlhisa votala (45)
-
-
Jesu a hanyisa Bhartimewusi loyi wa cikhumu (46-52)
10 I no suka hi laho a tlhatuka Jordhani aya matlhelweni* ya Judhiya. A citshungu ci no hlengeletana kakwe kambe. I no sangula ku va gondzisa kambe kota lezvi a nga tolovela ku maha.
2 A vaFarisi va no tshinela kakwe na va lava ku mu ringa, va mu wutisa ku zvi lulamile ku a wanuna a tsika sati ke.
3 I no va hlamula aku: “Zvini lezvi Mosi a nga mu laya?”
4 Vaku: “Mosi i hi vhumelele ku tsala papilo ga ku mu tsika, hi tlhela hi mu hlongola.”
5 Kanilezvi Jesu aku kabye: “I mu tsalele a cileletelo leci hi kota ya kunonoha ka timbilu ta n’wina.
6 Kanilezvi kusanguleni, ‘Nungungulu i no maha wanuna ni wasati.
7 Hikwalaho, a wanuna i ta siya papayi wakwe ni mamani wakwe,
8 lava vambiri va tava nyama yin’we’, makunu a va ha hi vambiri, kanilezvi i nyama yin’we.
9 Hikwalaho, lezvi Nungungulu a zvi tlhanganisileko, zvi nga hambanisiwi hi munhu.”
10 A cikhati leci va nga nghena kambe lomu ndlwini, a vapizani va no mu wutisa hi mhaka leyi.
11 Aku kabye: “Ni wihi loyi a tsikako sati wakwe a chadha ni mun’wani wa maha wubhayi, hi ku maha lezvo a mu wonhela,
12 ni loku a wasati loyi a tsikileko nuna wakwe a tshuka a chadha ni mun’wani, wa maha wubhayi.”
13 A vanhu va no mu tela ni vanana kasi a ta va henya, kanilezvi a vapizani va no va bhongela.
14 Loku Jesu a wonile lezvo i no swireka, aku kabye: “Tsikani vanana vata ka mina, mu nga va beteli, hakuva a Mufumo wa Nungungulu wu lumba vanhu vo kota vona.
15 Ndza tiyisa ka n’wina ndziku: Ni wihi loyi a nga amukeliko a Mufumo wa Nungungulu a ku khwatsi i n’wanana, a nga ta tshuka a nghena ka wona.”
16 I no teka vanana a va angarela ni ku va katekisa, a va tlhateka mandla.
17 Laha a nga huma a goxometa ndlela, a wanuna wo kari i no tsutsuma ata kakwe a ta mu khizamela, a mu wutisa aku: “Mugondzisi wa mu Nene, zvini ndzi faneleko ku maha kasi ndziga tshomba ya wutomi ga pindzukelwa?”
18 Jesu aku kakwe: “Hikuyini u ndzi vitanako wa mu nene? A ku na munhu wa mu nene saseka mun’we basi, ku nga Nungungulu.
19 Wa yi tiva a milayo leyi ya ku: ‘U nga dayi, u nga mahi wubhayi, u nga yivi, u nga yimeli zvilo zva mawunwa, u nga kalaveli, kombisa cichavo ka papayi wa wena ni ka mamani wa wena.’”
20 I no mu hlamula aku: “Mugondzisi, ndza maha zvontlhe lezvo kusukela wun’wananeni ga mina.”
21 Jesu i no mu cuwuka a mu randza, aku kakwe: “Wa ha kiyelelwa hi nchumu wun’we: Famba u ya xavisa lezvi u nga nazvo u teka mali ya kona u nyika zvisiwana, u tava ni tshomba tilweni. Andzhako ka lezvo, tana u ta ndzi landzela.”
22 A cikhati leci a ngazwa lezvo i no swireka, a suka a famba na a bayisekile hakuva i wa ganyile nguvhu.
23 Loku Jesu a cuwukile matlhelweni, i te ngalo ka vapizani vakwe: “Zvi ta karata nguvhu ka lava va nga ni mali a ku nghena Mufun’weni wa Nungungulu!”
24 Kanilezvi a vapizani va no hlamaliswa hi magezu yakwe. Makunu Jesu a hlamula aku: “Vana vanga, a zvo ku karata ku nghena Mufun’weni wa Nungungulu!
25 Zva olova ku a kameli gi nghena non’wini wa chingani ku hundza ku a munhu wo ganya a nghena Mufun’weni wa Nungungulu.”
26 Va no engetela ku hlamala, vaku kakwe:* “Himani wa ku a nga pona?”
27 Jesu i no va cuwuka tinghoheni tabye aku: “Ka vanhu a zvi koteki, kanilezvi a zvi tsandzi ka Nungungulu, hakuva ka Nungungulu a zvilo zvontlhe zva koteka.”
28 Pedro aku kakwe: “Hi siyile zvilo zvontlhe hi ku landzela.”
29 Jesu aku: “Ndza tiyisa ka n’wina ndziku: A ku na munhu a siyileko muti, kutani vamakabye, kutani mamani, kutani papayi, kutani vana, kutani mipetso hi kota ya mina ni mahungu ya ma nene
30 a to kala ku amukela zvilo lezvo hi ka 100 ni ku hundza ka cikhati leci — a mimiti, ni vamakabye, ni vamamani, ni vana, ni mipetso, na a kumana ni tixanisa — ni wutomi ga pindzukelwa cikhatini ci tako.*
31 Kanilezvi, a kutala ka lava va nga vo sangula va ta maha vo gumesa, ni lava vo gumesa va ta maha vo sangula.”
32 A cikhati leci va nga kari va kwela vaya Jerusalema, Jesu na a rangile phambeni kabye, a vapizani va no hlamala nguvhu, kanilezvi lava va nga va landzela va no sangula ku chava. Ka khati legi kambe, i no koka lava va 12 hi tlhelo a va byela zvilo lezvi zvi nga lava ku mu humelela, aku:
33 “Ma zvi wona, lezvi hiya Jerusalema, a N’wana wa munhu i ta nyikelwa mandleni ya vapristi lava va tihosana ni vatsali. Va ta mu konela ku dawa, va mu nyikela ka vamatiko,
34 va ta mu poyila, va mu phelela ni ku muba va gumesa va mu daya. Kanilezvi andzhako ka masiku manharu i ta vhuka.”
35 Jakobe na Johani, a vana va Zabhedhi, va no tshinela kakwe vaku: “Mugondzisi, hi lava ku u hi mahela ni cihi hi to ku kombela.”
36 Aku kabye: “Mu lava ku ndzi mu mahela yini?”
37 Vaku: “Hi tsike hi tshama a mun’we reveni ga wena ga cinene ni mun’wani reveni ga wena ga cibhabha Mufun’weni wa wena.”*
38 Kanilezvi Jesu i te ngalo kabye: “A mu ci tivi leci mu ci kombelako. Mu nganwa a kopo leyi ndzi nwako kutani ku bhabhatiswa hi kubhabhatiswa loku ndzi bhabhatiswako hi kona ke?”
39 Vaku kakwe: “Ina.” Jesu aku kabye: “A kopo leyi ndzi nwako n’winawu mu tanwa, ni kubhabhatiswa loku ndzi bhabhatiswako hi kona n’winawu mu ta bhabhatiswa hi kona.
40 Kanilezvi, a ku mu tshamisa reveni ga mina ga cinene kutani ga cibhabha a zvi ndzi lumbi, kanilezvi zvi lumba lava zvi longiselelweko vona.”
41 A cikhati leci lava van’wani va 10 va nga zvizwa, va no zangarela Jakobe na Johani.
42 Kanilezvi Jesu i no va vitana vata kakwe aku kabye: “Ma zvi tiva lezvaku lava va nge khwatsi* tihosi ta matiko va bindzisela lava va va fumelako, niku a vahombe vabye a va va nyenyeleti.
43 N’wina mu nga mahisi lezvo; kanilezvi ni wihi loyi a lavako kuva wahombe cikari ka n’wina i fanele kuva citiri ca n’wina*
44 ni loyi a lavako kuva wo sangula cikari ka n’wina i fanele kuva khumbi ya vontlhe.
45 Hakuva hambu a N’wana wa munhu a nga telangi ku ta tirelwa, kanilezvi a ku ta tirela ni ku nyikela wutomi gakwe kota hakhelo ya ku tlhatlhisa votala.”
46 Makunu va no chikela Jeriko. Kanilezvi a cikhati leci Jesu ni vapizani vakwe ni citshungu ca hombe va nga kari va huma lomu Jeriko, Bhartimewusi, (a n’wana wa Timewusi) a nga hi mukombeli wa zomola wa cikhumu, i wa tshamile mbhirini ya ruwa.
47 Laha a ngazwa lezvaku hi Jesu wa le Nazareta, i no sangula ku banguleka, aku: “Jesu, N’wana wa Dhavhidha, ndzi mahele wuxinji!”
48 Hikwalaho, a votala va no mu kawuka va ku i wa miyele, kanilezvi i no engeta a vitana hi gezu ga hombe nguvhu, aku: “N’wana Dhavhidha, ndzi mahele wuxinji!”
49 Hikwalaho, Jesu i no nyima, aku: “Mu vitaneni ata ka mina.” Va no vitana wanuna loyi wa cikhumu vaku kakwe: “Tiya hlana! Suka u yima, wa ku vitana.”
50 I no hoxa nguwo yakwe, a ku kakatsuko aya ka Jesu.
51 Jesu aku kakwe: “U lava ku ndzi ku mahela yini?” A wanuna loyi wa cikhumu aku kakwe: “Raboni,* ndzi tlhelisele a kuwona ka mina.”
52 Jesu aku kakwe: “Famba. A kukholwa ka wena ku ku hanyisile.” Zvalezvo i no tlhela a wona, a sangula ku mu landzela ndleleni.
Mitlhamuselo ya lahasi
^ Wona Tlhamuselo wa magezu ya Bhibhiliya.
^ Kutani: “mimbhinganweni”.
^ Zvi nga ha wula ku: “vaku ka mun’we ni mun’wani”.
^ Kutani: “ka nguva yi tako.” Wona laha ka ku: “Nguva” ka Tlhamuselo wa magezu ya Bhibhiliya.
^ Hi kukongoma: “kungangameleni ka wena”.
^ Kutani: “lava va tiviwako ku”.
^ Kutani: “nandza ga n’wina”.
