Marku 11:1-33
11 Makunu laha va nga tshinela Jerusalema, na va hi kusuhani ni Bhetfaje ni Bhetaniya, le Citsungeni ca maOlivha, Jesu i no ruma vapizani vambiri,
2 aku kabye: “Fambani cidhoropaneni leci ci nga mahlweni ka n’wina, zvalezvi mu to nghena, mu ta ya kuma a cimbongolana na ci bohilwe ca ku a ci se khilelwa hi munhu. Ci tlhatlheni muta naco.
3 Loku a wokari aku: ‘Zvini mu mahako?’ Muku: ‘A Hosi ya ci lava, yi ta ci tlhelisa zvalezvi.’”
4 Hikwalaho va no famba, va ya kuma cimbongolana na ci bohilwe laha nyangweni hi seno handle, mbhirini ya ndlela, va ci tlhatlha.
5 Kanilezvi a vokari va nga yimile laho va te ngalo kabye: “Mu ci tlhatlhela yini a cimbongolana leco?”
6 Va no va byela zvalezvi Jesu a nga va byelile; va se va tsika va famba.
7 Va no wuya ni cimbongolana ka Jesu, va ta tlhateka tinguwo tabye hehla ka cona, Jesu a khilela.
8 A vanhu vo tala va no andlalela tinguwo tabye laha ruweni, ni van’wani kambe va no nghena lomu mafusini va tshova mahlavhu.
9 Lava va nga rangile ni lava va ngata hi le ndzhako va wa huwelela vaku: “Nungungulu, ha ku kombela, mu hlayise! I katekile loyi a tako hi vito ga Jehovha!
10 Wu katekile a Mufumo lowu wu tako wa papayi wa hina Dhavhidha! Nungungulu, ha ku kombela, mu hlayise, wena Loyi u nga le hehla matilweni!”
11 Loku a chikele Jerusalema, i no nghena tempeleni, a cuwukisa zvontlhe, kanilezvi kota lezvi gi nga pelile, i no huma aya Bhetaniya zvin’we ni lava va 12.
12 Hi mandziko wa kona, na va suka hi Bhetaniya i nozwa ndlala.
13 Na a hi kulenyana i no wona nkuwu wu nga hi ni matluka a wu yela kasi ku ya wona ku a nga kuma nchumu ka wona ke. Kanilezvi loku a chikele, a nga kumangi nchumu saseka matluka basi, hakuva ku wa nga hi nguva ya makuwu.
14 Hikwalaho i te ngalo ka wona: “Kusukela lezvi ku nga havi na munhu a toga mihandzu ya wena kambe.” A vapizani vakwe va wa zvizwa.
15 Loku va chikele Jerusalema, i no nghena tempeleni a hlongola lava va nga kari va xavisa ni ku xava lomu tempeleni, a khubhunyeta timeza ta vacicisi va mali ni zvitulo zva vaxavisi va zvipomba;
16 i wa nga tsiki munhu a tsemakanya ni zvibya hi lomu tempeleni.
17 I no va gondzisa aku: “A mu zvi tivi lezvaku ku tsalilwe ku ngalo: ‘A yindlu ya mina yi ta vitaniwa ku i yindlu ya mikhongelo ya matiko wontlhe ke’? Kanilezvi n’wina mu yi maha yindlu ya vayivi.”
18 A vapristi lava va tihosana ni vatsali va no zvizwa; hikwalaho va no sangula ku hlota ndlela ya ku mu daya hakuva va wa mu chava hi lezvi a citshungu contlhe ci nga hlamaliswa hi magondzisela yakwe.
19 Loku gi pelile, va no huma lomu dhoropeni.
20 Kanilezvi laha va nga kari va hundza ni mixo nguvhu, va no wona lezvaku a nkuwu wu womile kusukela mitswini.
21 Pedro i no zvi alakanya aku kakwe: “Rabi, hi nga wona! A nkuwu lowu u nga wu ruka wu womile.”
22 Jesu i no hlamula aku kabye: “Kholwani ka Nungungulu.
23 Ndza tiyisa ka n’wina ndziku: Ni wihi a to byela citsunga leci aku: ‘Kunuka u ya ti hoxa bimbini’, na a nga kanakani mbilwini yakwe kanilezvi a kholwa lezvaku lezvi a zvi wulileko zvi ta maheka, hakunene zvi ta maheka.
24 Hikwalaho ndza mu byela ndziku: Zvontlhe lezvi mu zvi kombelako hi mukhongelo na mu kholwa lezvaku mu ta zvi kuma, mu ta zvi kuma futsi.
25 Ni loku mu yima mu khongela, tsetselelani ni cihi cisolo mu nga naco ka munhu kasi a Papayi wa n’wina loyi a nga matilweni a fela ku mu tsetselelawu a zvihoxo zva n’wina.”
26 *-
27 Va no wuya kambe Jerusalema. Laha a nga kari a fambafamba lomu tempeleni, a vapristi lava va tihosana ni vatsali ni madhota va nota kakwe
28 va taku: “I ntamu muni u mahako hi wona zvilo lezvi? Kona himani a nga ku nyika a ntamu wa ku maha zvilo lezvi?”
29 Jesu aku kabye: “Minawu ndzi ta mu wutisa ciwutiso cin’we. Loku mu ndzi hlamula, minawu ndzi ta mu byela a ku i ntamu muni ndzi mahako hi wona a zvilo lezvi.
30 A kubhabhatisa ka Johani ku wata hi le tilweni kutani hi ka vanhu? Ndzi hlamuleni.”
31 Va no sangula ku wulawulisana vaku: “Loku hiku: ‘Ku wata hi le tilweni’, i taku: ‘Hikuyini mu nga kala ku kholwa kakwe ke?’
32 Kanilezvi, ina hi xinyata hiku: ‘Ku wata hi ka vanhu’?” Va wa chava citshungu, hakuva vontlhe va wa kholwa lezvaku Johani muphrofeti.
33 Hikwalaho va no mu hlamula vaku: “A hi zvi tivi.” Jesu aku kabye: “Minawu ndzi nga ta mu byela a ku i ntamu muni ndzi mahako hi wona a zvilo lezvi.”
Mitlhamuselo ya lahasi
^ Zvi wulako ku: “Mugondzisi”.
