Marku 12:1-44
-
Mufananiso wa varimi va vadayi (1-12)
-
Nungungulu na Khezari (13-17)
-
Ciwutiso xungetano hi kuvhuka ka vafileko (18-27)
-
Milayo yimbiri ya hombe ka yontlhe (28-34)
-
Kristu i n’wana wa Dhavhidha ke? (35-37a)
-
Ti woneleni ka vatsali (37b-40)
-
Zvingerengere zvimbiri zva wasati wa cisiwana wo felwa hi nuna (41-44)
12 Makunu i no sangula ku wulawula navo hi mifananiso aku: “A wanuna wo kari i no byala simu ga mauvha, a gi bhiyela, a maha cigowolo co kamela vhinyo a tlhela a aka likhokhola;* a gumesa a gi nyikela ka varimi, yena a endza aya tikweni gin’wani.
2 Hi nguva ya mihandzu, i no ruma a citiri ciya ka varimi lezvaku ci ya teka mihandzu yo kari ya simu.
3 Kanilezvi a varimi va no ci khoma vaba; va ci tlhelisa na ci nga hi na nchumu.
4 I no va rumelela citiri cin’wani; leci conawu va no ciba laha ka hloko va ci rukatela.
5 I no rumela citiri cin’wani, va khoma va daya, ni zvin’wani zvo tala, lezvi a zvokari va ngaba, a zvin’wani va daya.
6 I wa ha hi ni cin’wani, ku nga n’wana wakwe loyi a nga mu randza. I no va rumelela yena hi kugumesa na aku: ‘Va ta chava n’wana wa mina.’
7 Kanilezvi a varimi lavo va no byelana vaku: ‘Loyi hi yena mugi wa tshomba. A hi mu dayeni hi fela ku sala ni tshomba.’
8 Hikwalaho, va no mu khoma va mu daya, va mu hoxa lahandle ka simu.
9 A n’winyi wa simu i ta kuyini ke? I tata a ta daya varimi lavo a gumesa a nyikela simu ka van’wani varimi.
10 A mu se tshuka mu gondza a mutsalo lowu wu nge: ‘A ribye legi gi nga aliwa hi vaaki give gona ribye ga laha khoneni ga lisima ka wontlhe.*
11 Zvita hi ka Jehovha, niku zva tsakisa nguvhu matihlweni ya hina’?”
12 Kota lezvi va nga zvi pola lezvaku i hlawutele a mufananiso lowu na a wula vona, va no lava ku mu khoma, kanilezvi va wa chava citshungu. Hikwalaho va no mu tsika va famba.
13 Andzhako ka lezvo, va no rumela kakwe a vaFarisi vo kari ni valandzeli va Herodhi lezvaku va ya mu phasa kuwulawuleni kakwe.
14 Loku va chikele, va te ngalo kakwe: “Mugondzisi, ha zvi tiva lezvaku u wulawula lisine, niku a wu lavi ku dzundziwa hi munhu hakuva a wuyi hi nghohe ya munhu, kanilezvi u gondzisa a ndlela ya Nungungulu hi lisine. Zva fanela* ku humesa khupo ka Khezari kutani a zvi faneli?
15 Hi humesa kutani hi nga humesi?” Na a tiva wukanganyisi gabye, i te ngalo kabye: “Mu ndzi ringela yini? Ndzi teleni ni dhenaryo* ndzi ta yi wona.”
16 Va no mu tela ni dhenaryo,* aku kabye: “A mufananiso lowu ni mutsalo wa kona zva mani?” Vaku: “Zva Khezari.”
17 Jesu aku: “Tlhelisani ka Khezari lezvi zvi nga zva Khezari, ni ka Nungungulu lezvi zvi nga zva Nungungulu.” Va no hlamala nguvhu.
18 Makunu a vaSadhusi, lava va nge a vafileko va nga ta vhuka, va nota va ta mu wutisa, vaku:
19 “Mugondzisi, Mosi i hi tsalele lezvaku loku a makabye wa wokari afa a siya sati kanilezvi a nga siyi n’wana, a makabye wakwe i wa hlambele* sati wa matsuva kasi a mu pswalela vana a makabye wakwe.
20 Ku wa hi ni 7 wa vavanuna va nga hi va ka makabye. Loyi wa nhondzo i no teka sati, kanilezvi i nofa na a nga siyangi n’wana.
21 Loyi wa wumbiri i no chadha ni wasati loye, kanilezvi yenawu i nofa na a nga siyangi n’wana; zvi mahisa lezvo ni ka wa wunharu.
22 Vontlhe va 7 va nofa na va nga siyangi vana. Hi magumo a wasati yenawu i nofa.
23 Kuvhukeni ka vafileko i tava sati wa mani? Hakuva i vile sati wa vontlhe va 7.”
24 Jesu aku kabye: “A mu no lahleka hi lezvi mu nga yi tiviko Mitsalo ne ntamu wa Nungungulu ke?
25 Hakuva a cikhati leci va to vhuka hi ka vafileko, ne vavanuna, ne vavasati va nga ta chadha, kanilezvi va ta fana ni tingilozi matilweni.
26 Kanilezvi hi kuwulawula hi kuvhuka ka vafileko, a mu gondzangi bhukwini ga Mosi, ka matimu ma wulawulako hi khuhu ga mimizwa, a ku Nungungulu i te ngalo kakwe: ‘Ndzi Nungungulu wa Abrahama, ni Nungungulu wa Isaka, ni Nungungulu wa Jakobe’?
27 A hi Nungungulu wa vafileko, kanilezvi wa vahanyako. Mu lahlekile nguvhu.”
28 A mun’we wa vatsali, a nga tshinele kusuhani a vazwa na va wutisana, laha a nga wona lezvaku Jesu i va hlamulile khwatsi, i no mu wutisa aku: “Hi wihi a nayo wo ranga* ka yontlhe?”
29 Jesu i no hlamula aku: “A wo ranga hi lowu wu nge ngalo: ‘Ingisa Izrayeli: Jehovha a Nungungulu wa hina i Jehovha mun’we.
30 Randza Jehovha Nungungulu wa wena hi mbilu ya wena yontlhe ni muhefemulo* wa wena wontlhe ni kupima ka wena kontlhe ni ntamu wa wena wontlhe.’
31 A wa wumbiri hi lowu: ‘Randza muakelani wa wena a ku fana ni lezvi u ti randzisako zvona.’ A wu kona nayo wun’wani wa hombe ku hundza leyi.”
32 A mutsali aku kakwe: “Mugondzisi, u wulile lisine. ‘Nungungulu Mun’we, a ku na mun’wani ahandle ka yena’.
33 A ku mu randza hi mbilu yontlhe ni kupima kontlhe ni ntamu wontlhe ni ku randza muakelani a ku fana ni lezvi u ti randzisako zvona, zva hundza nguvhu a minyikelo yontlhe ya kuhiswa ni miphahlo.”
34 Laha Jesu a nga wona lezvaku i hlamulile khwatsi, i te ngalo kakwe: “Wena a wu kule ni Mufumo wa Nungungulu.” Kanilezvi a ka ha vangi ni munhu a nga tiya ku mu wutisa nchumu.
35 Kanilezvi, na a ha simama ku gondzisa lomu tempeleni, Jesu i te: “Hikuyini a vatsali va nge Kristu i n’wana wa Dhavhidha?
36 Na a pimiselwa hi moya wo basa, Dhavhidha i te: ‘Jehovha i te ngalo ka Hosi ya mina: “Tshama reveni ga mina ga cinene kala ndzi veka valala va wena lahasi ka mikondzo ya wena.”’
37 Dhavhidha i mu vitana ku i Hosi, makunu zvi mahisa kuyini ku tlhela ava n’wana wakwe ke?”
A citshungu ca hombe ci wa kari ci mu ingisela na ci tsakile.
38 I no simama ku va gondzisa aku: “Ti woneleni ka vatsali lava va randzako ku fambafamba na va bohile tinguwo to leha ni ku losiwa lomu ko tala vanhu*
39 ni zvitulo zva le phambeni* lomu masinagogeni ni zvitshamu zva le phambeni lomu tifesteni.
40 Va phanga tiyindlu* ta lava vo felwa hi vanuna ni ku maha mikhongelo yo leha kasi ku woniwa* hi vanhu. A vanhu lava va ta tsayisiwa hi tsayiselelo wa hombe.”*
41 I no tshama kusuhani ni makaxa ya minyikelo* a wona lezvi a citshungu ci nga chelisa zvona mali makaxeni ya minyikelo. A vanhu vo tala vo ganya va wa chela mali yo tala.
42 Makunu ku nota wasati wa cisiwana wo felwa hi nuna a ta chela zvingerengere zvimbiri zva ntsengo wa wutsongwani nguvhu.*
43 Hikwalaho i no vitana vapizani vakwe aku kabye: “Ndza tiyisa ka n’wina ndziku: A wasati loyi wa cisiwana wo felwa hi nuna i chelile zvotala a ku hundza vontlhe lava van’wani va chelako mali makaxeni ya minyikelo.
44 Hakuva vontlhe va no chela lezvi zvi nga va salela, kanilezvi a wasati loyi, ka wusiwana gakwe, i chelile zvontlhe a nga hi nazvo, zvontlhe a nga wa ta hanya hi zvona.”
Mitlhamuselo ya lahasi
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
^ Kutani: “torre”.
^ A ribye legi gi wa vekiwa laha khoneni ku tlhanganako makhurisi mambiri kasi ku ma tiyisa.
^ Kutani: “Zvi lulamile”.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “teke”.
^ Kutani: “wa lisima nguvhu”.
^ Wona Tlhamuselo wa magezu ya Bhibhiliya.
^ Kutani: “mamerkadho”.
^ Kutani: “zva zvi nene nguvhu”.
^ Kutani: “titshomba”.
^ Kutani: “hlamaliwa”.
^ Kutani: “zva xapi”.
^ A makaxa lawo ya minyikelo ma wa hi ya matshamela yo hambanahambana. A yokari ma wa fana ni mimpundzu.
