Marku 13:1-37
13 Laha Jesu a nga kari a huma hi lomu tempeleni, a mun’we wa vapizani vakwe i te ngalo kakwe: “Mugondzisi, hi nga wona a kusaseka ka maribye lawa ni tiyindlu ta kona!”
2 Kanilezvi Jesu i te ngalo kakwe: “Wa ti wona a tiyindlu leti ta hombe ke? Laha a ku na ribye gi to siyiwa hehla ka gin’wani, wontlhe ma ta khungumulwa.”
3 Na a tshamile Citsungeni ca maOlivha a cuwukana ni tempeli, Pedro, na Jakobe, na Johani, na Andrewu, va no mu wutisa na va hi voce vaku:
4 “Hi nga hi byela: Kasi a zvilo lezvi zvi ta maheka rini? Kona ci tava cihi a cikombiso ca lezvaku ci chikele cikhati ca kutatiseka ka zvontlhe lezvi?”
5 Jesu i no sangula ku va byela aku: “Ti woneleni kasi mu nga hambukisiwi hi munhu.
6 A votala va tata hi vito ga mina va taku: ‘Hi mina yena’, va hambukisa votala.
7 Loku muzwa guwa ga tiyimpi ni mahungu ya tiyimpi, mu nga dzuki; a zvilo lezvi zvi fanele ku maheka, kanilezvi a hi kona kugumesa.
8 “Hakuva a tiko gi ta vhukela tiko, ni mufumo wu vhukela mufumo; ku tava ni kutsekatseka ka misava ka matshamu yo hambanahambana, ni tindlala. A zvilo lezvi masangulo basi ya kuxaniseka.
9 “Kanilezvi n’wina ti woneleni. A vanhu va ta mu nyikela madhoteni, mu biwa masinagogeni, va mu yisa ka vagovhernadhori ni ka tihosi hi kota ya mina kasi mu kustumunya ka vona.
10 Ahandle ka lezvo, a mahungu ya ma nene ma fanele ku ranga ma chumayelwa ka matiko wontlhe.
11 Loku va mu khoma va mu nyikela, mu nga karateki mu ku hi ta wula yini; kanilezvi ni cihi mu to nyikwa ku wula ka cikhati caleco ci wuleni, hakuva a hi n’wina mu wulawulako kanilezvi i moya wo basa.
12 A makabye i ta nyikela a makabye wakwe kasi a dawa, a papayi a nyikela n’wana, ni vana va vhukela vapswali vabye va va dayisa.
13 Mu ta vengiwa hi vanhu vontlhe hi kota ya vito ga mina. Kanilezvi loyi a timiselako kala magumo hi yena a to ponisiwa.
14 “Loku mu wona a cilo co nyenyeza leci ci hahlulako ni ku wonhetela na ci yimile laha ci nga faneliko (a mugondzi i wa zame ku zvi zwisisa), makunu lava va nga Judhiya a va tsutsumele zvitsungeni.
15 Loyi a nga hehla ka yindlu a nga chiki ne a nga ngheni kasi ku teka nchumu lomu ndlwini yakwe;
16 ni loyi a nga masin’wini a nga tlheli a ya teka nguwo yakwe.
17 Va xanisekile a vavasati lava va to kumiwa hi masiku lawo na va hi ni tinyimba ni lava va to kumiwa na va an’wisa!
18 Simamani ku khongelela lezvaku a zvilo lezvo zvi nga maheki hi nguva ya cirami;
19 hakuva a masiku lawo ma tava masiku ya kuxaniseka ka ku a ku se tshuka ku humelela kusukela loku Nungungulu a vangile tiko kala lezvi, niku ku nga ta ha tshuka ku humelela kambe.
20 Kunene, loku Jehovha i wa nga komisangi a masiku lawo, na ku nga poni munhu. Kanilezvi hi kota ya vahlawulilweko lava a va hlawulileko, i komisile masiku lawo.
21 “Makunu loku a wokari aku ka n’wina: ‘Hi loyi Kristu!’ kutani ku: ‘Hi gaya!’ mu nga kholwi.
22 Hakuva ku ta humelela vaKristu va mawunwa ni vaphrofeti va mawunwa; va ta maha zviwoniso ni zvihlamaliso kasi va kanganyisa hambu ni vahlawulilweko, loku zvi koteka.
23 Makunu n’wina, rindzelani. Ndzi mu byelile zvontlhe zvilo lezvi na zvi nga se maheka.
24 “Kanilezvi masikwini lawo, andzhako ka kuxaniseka loko, a gambo gi ta pfhupeliswa, ni hweti yi nga ta woninga;
25 a tinyeleti ti tawa hi le tilweni, ni mintamu ya le tilweni yi ta tsekatsekiswa.
26 Andzhako ka lezvo va ta wona a N’wana wa munhu na ata hi marefu na a hi ni ntamu wa hombe ni kungangamela.
27 Hi kulandzela, i ta ruma tingilozi takwe lezvaku ti ya hlengeleta a vahlawulilweko vakwe ka mune wa matlhelo ya misava* kusukela magemeta-musi ya misava kala magemeta-musi ya tilo.
28 “Gondzani ka mufananiso lowu wa nkuwu: Neti a zvidhavana* zva wona zvi nyuka zvi hluka matluka, ma zvi tiva lezvaku a cimumu ci chikele.
29 Na n’winawu, loku mu wona a zvilo lezvi na zvi maheka, zvi tiveni lezvaku a N’wana wa munhu i laha kusuhani; i kwalaha tinyangweni.
30 Ndza tiyisa ka n’wina ndziku: A cizukulwana leci ci nga ta hundza na zvi nga se maheka zvontlhe a zvilo lezvi.
31 A tilo ni misava zvi ta hundza kanilezvi a timhaka ta mina ti nga ta hundza.
32 “Xungetano hi siku lego ni cikhati ca kona a ku na munhu a zvi tivako, ne tingilozi le tilweni ne hambu N’wana, zvo tiviwa hi Papayi yece.
33 Tlharihani mu rindzela, hakuva a mu zvi tivi lezvaku a zvilo lezvi zvi ta maheka rini.
34 Zvi fana ni munhu a endzako aya tikweni gin’wani, loyi a nga siya muti wakwe ni zvitiri lezvaku zvi sala zvi maha mitiro ya laha kaya, a cin’we ni cin’we ni ntiro wa cona, a laya a murindzeli wa nyangwa lezvaku a rindzela.
35 Hikwalaho, tshamani na mu rindzele hakuva a mu ci tivi a cikhati leci a n’winyi wa muti a to wuya hi cona, kani i ta wuya ni gambo, kutani cikari ka wusiku, kutani na giya kuceni,* kutani ni mixo,
36 kasi loku a chikela hi citshuketi a nga mu kumi na mu etlele.
37 Lezvi ndzi wulako ka n’wina, ndzi wula ka vontlhe ndziku: Tshamani na mu rindzele!”
Mitlhamuselo ya lahasi
^ Hi kukongoma: “tileptoni timbiri, ti ringanako a dezana”.
^ Hi kukongoma: “ka mune wa mimoya”.
^ Kutani: “zvidzavana”.
