Marku 14:1-72
-
A vapristi va xuxa cikungo ca ku daya Jesu (1, 2)
-
Jesu a cheliwa mafura yo nuhela (3-9)
-
Judhasi a xavisa Jesu (10, 11)
-
A Phasika go gumesa (12-21)
-
A yimisa a Cilalelo ca Hosi (22-26)
-
Jesu a phrofeta lezvaku Pedro i ta mu kaneta (27-31)
-
Jesu a khongela le Getsemane (32-42)
-
Jesu a khon’wa (43-52)
-
Jesu a thethisiwa hi Tribhunali ya Hombe (53-65)
-
Pedro a kaneta Jesu (66-72)
14 Makunu ku wa kiyela masiku mambiri kasi ku mahiwa a Phasika ni Festa ya Tipawa to kala Livrina. A vapristi lava va tihosana ni vatsali va wa lavetela ndlela ya ku khoma Jesu hi mano kasi va mu daya;
2 hakuva va waku: “Hi nga mu khomeni laha festeni, ku nga tshuka ku vhuka vhilinganya cikari ka vanhu.”
3 Na a hi kugeni* le Bhetaniya mutini wa Simoni loyi wa hlokonho, ku nota wasati ni botori ga alabhasteri gi nga hi ni mafura ya nardho* yo nuhela, yo dhura nguvhu, yo kala ku patselwa ni nchumu. I no bandza botori lego ga alabhasteri a chulula mafura hlokweni ya Jesu.
4 Laha a vokari va nga wona lezvo, va no swireka, va wutisana vaku: “Ma xakelelwa yini a mafura lawa yo nuhela?
5 Phela a mafura lawa yo nuhela na ma xavisilwe hi mali yo hundza 300 wa tidhenaryo* yi nyikwa zvisiwana!” Va no mu zangarela* nguvhu a wasati loye.
6 Kanilezvi Jesu i te ngalo: “Mu tsikeni. Mu mu karatela yini? I ndzi mahele zvilo zva zvi nene.
7 Hakuva a zvisiwana zvi na n’wina contlhe cikhati; mu nga zvi mahela zva zvi nene ni ka cihi cikhati mu zvi lavako, kanilezvi a hi contlhe cikhati mu tova na mina.
8 I mahile lezvi a nga zvi kota; i chelile mafura lawa yo nuhela mirini wa mina kasi ku longisela kulahliwa ka mina.
9 Ndza tiyisa ka n’wina ndziku: Ni kwihi laha ku to chumayelwa a mahungu ya ma nene laha misaveni, lezvi zvi mahilweko hi wasati loyi zvonawu zvi ta hlawutelwa kasi ku mu alakanya hi zvona.”
10 Judhasi Iskariyoti, a mun’we wa lava va 12, i noya ka vapristi lava va tihosana a ya bhula navo hi lezvi a nga wa ta mu nyikelisa zvona kabye.
11 Laha va ngazwa lezvo, va no tsaka nguvhu va mu tsumbisa ku mu nyika mali ya prata. Hikwalaho i no sangula ku lavetela cikhati ca ci nene ca ku mu nyikela hi cona.
12 Makunu, hi siku go sangula ga Tipawa to kala Livrina, hi siku legi va nga tolovela ku daya a cihari ca Phasika, a vapizani vakwe va te ngalo kakwe: “U lava ku hi ya ku longiselela kwihi a Phasika?”
13 I no ruma vapizani vakwe va vambiri, aku kabye: “Fambani dhoropeni, mu ta khingiwa hi wanuna a rweleko cifukwana ca mati. Mu landzeleni;
14 ka muti lowu a to nghena, byelani n’winyi wa muti muku: ‘Mugondzisi i ngalo: “Yi kwihi a yindlu ya vapfhumba lomu ndzi to gela kona Phasika ni vapizani va mina?”’
15 I ta mu komba sala ya hombe ya le hehla yi longileko ku tiriswa. Hi longiseleleni kwalomo.”
16 Hikwalaho, a vapizani va no suka va famba vaya dhoropeni. Va noya zvi kumisa zvalezvi a nga va byelisile zvona, va longisela Phasika.
17 Loku gi pelile, i nota ni lava va 12.
18 Na va tshamile mezeni vaga, Jesu i te ngalo kabye: “Ndza tiyisa ka n’wina ndziku: A mun’we wa n’wina, loyi a gako na mina i ta ndzi xavisa.”
19 Va no bayiseka, a mun’we ni mun’wani wabye a mu wutisa aku: “Hosi, hi mina ke?”
20 Aku kabye: “Mun’we wa n’wina va 12, loyi a nghenisako canja khatigin’we na mina lomu ngelweni.
21 Hakuva a N’wana wa munhu wa famba, kota lezvi zvi tsalilweko xungetano hi yena, kanilezvi khombo ka loyi a to xavisa N’wana wa munhu! Na zvi vile chukwana ka yena loku i wa nga pswaliwangi.”
22 Na va haga, Jesu i no teka pawa, a yi katekisa, a khema a va nyika, aku: “Tekani muga. A pawa leyi i miri wa mina.”
23 I no teka kopo ya vhinyo, a bonga a va nyika vanwa vontlhe hi yona.
24 Aku kabye: “A vhinyo leyi i ‘nkhata wa mina wa civhumelwano’, lowu wu to halatiwa kasi ku vhuna votala.
25 Ndza tiyisa ka n’wina ndziku: Ndzi nga ta hanwa kambe a vhinyo kala siku legi ndzi tonwa leyi ya yiswa Mufun’weni wa Nungungulu.”
26 Hi kugumesa, na va mbhetile ku yimbelela tisimu ta kudhumisa, va noya Citsungeni ca maOlivha.
27 Jesu i te ngalo kabye: “N’wina n’wentlhe mu ta ndzi tsika, hakuva ku tsalilwe ku ngalo: ‘Ndzi taba murisi, ni tiyivhu ti ta hangalaka.’
28 Hambulezvo, loku ndzi vhuxilwe hi ka vafileko, ndzi ta ranga hi mina ndzi chikela Galileya.”
29 Kanilezvi Pedro i te ngalo kakwe: “Hambu loku vontlhe lava vo ku tsika, mina ndzi nga ta ku tsika.”
30 Jesu aku kakwe: “Ndza tiyisa ka wena ndziku: Nyamutlha, ka wusiku galegi, na nkuku wu nga seba kumbiri, u ta ndzi kaneta kunharu.”
31 Kanilezvi i no phikiza aku: “Hambu loku zvi lava ku ndzifa na wena, cima ndzi nga ta ku kaneta.” Vontlhe lava van’wani va no wulawu zvalezvo.
32 Makunu va no chikela ka wutshamu gi vitaniwako ku i Getsemane, aku ka vapizani vakwe: “Tshamani laha, ndza ha ya khongela.”
33 I no teka Pedro, na Jakobe, na Johani a famba navo, a sangula ku karateka nguvhu.
34 Aku kabye: “Ndzafa hi kukarateka.* Salani laha mu rindzela.”
35 I no suka laho a fambanyana phambeni a yawa a kombela lezvaku loku zvi koteka, a cikhati leco ci hundza kakwe.
36 Aku: “Abha,* Papayi, ka wena zvontlhe zva koteka; susa a kopo leyi ka mina. Hambulezvo, ku nga maheki lezvi ndzi zvi lavako, kanilezvi a ku maheke lezvi u zvi lavako.”
37 I no wuya a ta va kuma na va etlele, aku ka Pedro: “Simoni, wo etlela? A wu zvi kotangi ku rindzela hora yin’we?
38 Tshamani na mu rindzele, mu khongela contlhe cikhati kasi mu nga weli kuringweni. Kunene, a moya wa zvi lava, kanilezvi a nyama* a yi na ntamu.”
39 I no tlhela kambe a ya khongela a wula zvalezvi zva zvin’we.
40 I no wuya kambe a ta va kuma na va etlele, hakuva a matihlo yabye ma wa bindza hi wurongo, hikwalaho a va ci kumangi ni co mu hlamula.
41 Hi khati ga wunharu i no wuya a taku kabye: “Ka cikhati co kota leci, n’wina mo etlela, mu humula! Vhukani! A cikhati ci tshinele! A N’wana wa munhu wa nyikelwa mandleni ya vawonhi.
42 Sukani hi famba. Loyi a ndzi nyikelako i laha kusuhani.”
43 Zvalezvo na a ha wulawula, Judhasi, a mun’we wa lava va 12, i no chikela ni citshungu ci nga hi ni zvipadha ni migomba, ci nga rumilwe hi vapristi lava va tihosana ni vatsali ni madhota.
44 Loyi a nga mu nyikela i wa va nyikile cikombiso aku: “Loyi ndzi to mu pswopswa hi yaloye, mu khomeni mu famba naye na mu mu gadha.”
45 I no kongoma Jesu, a mu tshinelela aku: “Rabi!” a mu pswopswa.
46 Va no mu khoma va famba naye.
47 Kanilezvi, a mun’we wa lava va nga hi laho i no hlomula cipadha cakwe aba nandza ga mupristi wa hombe, a gi tsema ndleve.
48 Kanilezvi Jesu aku kabye: “Mu ndzi tela ni zvipadha ni migomba kasi ku ta ndzi khoma, ndzova khamba ke?
49 Siku ni siku ndzi wa hi na n’wina tempeleni ndzi gondzisa, kanilezvi a mu ndzi khomangi. Hambulezvo, lezvi zvi maheka kasi ku tatiseka a Mitsalo.”
50 Vontlhe va no mu tsika va tsutsuma.
51 Kanilezvi a jaha go kari gi nga bohile nguwo ya yi nene ya wukene* basi, gi no mu landzela hi laha kusuhani. Va no zama ku gi khoma,
52 kanilezvi gi no siya nguwo ya gona ya wukene* gi tsutsuma na gi hi cimbyiri.*
53 Va no teka Jesu va famba naye ka mupristi wa hombe; makunu vontlhe a vapristi lava va tihosana ni madhota ni vatsali va no hlengeletana.
54 Kanilezvi Pedro i no mu landzela hi le kule kala mutini wa mupristi wa hombe. I no ya tshama ni zvitiri a wora ndzilo.
55 A vapristi lava va tihosana ni yontlhe Tribhunali ya Hombe va no lavetela wukustumunyu ga ku kona Jesu kasi va mu daya kanilezvi a va gi kumangi.
56 Kunene, a votala va no nyika wukustumunyu ga mawunwa hi yena, kanilezvi gi wa nga zwanani.
57 Ku nota van’wani kambe va ta nyika wukustumunyu ga mawunwa hi yena, vaku:
58 “Hi mu zwile na aku: ‘Ndzi ta hahlula a tempeli leyi yi akilweko hi mandla, ndzi aka yin’wani hi masiku manharu yo kala yi nga akiwi hi mandla.’”
59 Kanilezvi hambu ka mhaka leyi, a wukustumunyu gabye gi wa nga zwanani.
60 Makunu a mupristi wa hombe i no suka a yima cikari kabye a wutisa Jesu aku: “A wu wuli nchumu? A wu zvizwi lezvi a vavanuna lava va ku kecarako hi zvona ke?”
61 Kanilezvi Jesu i no miyela a nga hlamuli nchumu. A mupristi wa hombe i no tlhela a mu wutisa aku: “Hi wena Kristu a N’wana wa Nungungulu a Basileko ke?”
62 Jesu aku kakwe: “Hi mina; niku mu ta wona a N’wana wa munhu na a tshamile reveni ga cinene ga ntamu na ata hi marefu ya tilo.”
63 Zvalezvo, a mupristi wa hombe i no handzula tinguwo takwe aku: “Ha ha va lavela yini a vakustumunyu?
64 Mu mu zwile na a rukatela. Mu li yini?” Vontlhe va ku i wa dawe.
65 A vokari va no sangula ku mu phelela, va mu fenengeta nghohe va muba zvibhakela vaku: “Phrofeta!” Andzhako ka loku va mu bile tipama, a maphoyisa ma no mu teka.
66 A cikhati leci Pedro a nga hi lahasi laha mutini, ku nota citiri ca mupristi wa hombe ca nhanyana.
67 Laha ci nga mu wona na a wora ndzilo, ci no mu cuwuka ciku: “Wenawu u wa hi na Jesu wa le Nazareta.”
68 Kanilezvi i no kaneta aku: “A ndzi mu tivi ne a ndzi zvi zwisisi lezvi u wulawulako hi zvona”. I no suka aya nyangweni.
69 Na a hi kwalaho, a citiri leci ca nhanyana ci no tlhela ci mu wona ci se byela lava va nga yimile laho ciku: “Loyi mun’we wabye.”
70 Pedro i no kaneta kambe. Andzhako ka cikhatana, lava va nga yimile laho va no tlhela vaku ka Pedro: “Hakunene wenawu u mun’we wabye, hakuva u wa le Galileya.”
71 Kanilezvi i no sangula ku rukatela a tlhela a hlambanya aku: “A ndzi mu tivi wanuna loyi mu mu wulako!”
72 Zvalezvo a nkuku wu noba hi khati ga wumbiri. Pedro i no alakanya lezvi Jesu a nga wulile, zvaku: “Na nkuku wu nga seba kumbiri, u ta ndzi kaneta kunharu.” I no bayiseka nguvhu a sangula ku rila.
Mitlhamuselo ya lahasi
^ Hi kukongoma: “kubeni ka nkuku”.
^ Kutani: “Na a tshamile mezeni”.
^ A nardho i sinya yo nuhela.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “bhongela”.
^ Kutani: “A muhefemulo wa mina wa karateka”.
^ I gezu ga ciHebheru kutani ga ciAramaiko gi wulako ku: “O, Papayi!”
^ Ku wuliwa tshamela ga munhu ga kuva muwonhi, na a nga mbhelelangi.
^ Kutani: “linyo”.
^ Kutani: “linyo”.
