Marku 2:1-28
2 Kanilezvi andzhako ka masiku yo kari i no nghena kambe Kapernawume. A mahungu ya lezvaku i kona laha kaya ma no hangalaka.
2 Hikwalaho ku no hlengeletana vanhu vo tala nguvhu laha ka kuza ku nga ha sali wutshamu hambu ni laha nyangweni. I no sangula ku kanela kabye.
3 Va no mu tela ni munhu wo kala a nga zvi koti ku famba na a rwalilwe hi mune wa vavanuna.
4 Kanilezvi a va zvi kotangi ku nghena naye kala laha Jesu a nga hi kona hi kota ya citshungu. Hikwalaho va no gwawula yindlu hi le hehla, hi laha Jesu a nga hi kona, va releta a lihlaka* leli loyi wo kala a nga zvi koti ku famba a nga latilwe ka lona.
5 A cikhati leci Jesu a nga wona kukholwa kabye, i no byela loyi wo kala a nga zvi koti ku famba, aku: “N’wananga, a zviwonho zva wena zvi tsetselelwe.”
6 Makunu a vatsali vo kari va nga tshamile laho va no alakanyela timbilwini tabye, vaku:
7 “Hikuyini a wanuna loyi a wulawulisako lezvi? Wa rukatela. Himani a nga ni ntamu wa ku tsetselela zviwonho loku ku nga hi Nungungulu?”
8 Kanilezvi Jesu i no tekela ku zvi tiva lezvaku va wa hi ni maalakanyo lawo, aku kabye: “Hikuyini mu alakanyako zvilo lezvo timbilwini ta n’wina?
9 Hi cihi ci olovako? Ku wula ku: ‘A zviwonho zva wena zvi tsetselelwe’, kutani ku: ‘Suka u yima, u teka lihlaka* la wena u famba’?
10 Kanilezvi kasi mu tiva lezvaku a N’wana wa munhu i na ni ntamu wa ku tsetselela zviwonho laha misaveni . . .” i no byela loyi wo kala a nga zvi koti ku famba, aku:
11 “Ndza wula ka wena ndziku: Suka u yima, u teka lihlaka* la wena u famba kaya.”
12 Zvalezvo i no suka a yima a teka lihlaka* lakwe a famba na a woniwa hi vontlhe. Hikwalaho vontlhe va no hlamala nguvhu va dhumisa Nungungulu, vaku: “A hi se tshuka hi wona zvilo zvo khwatsi hi lezvi.”
13 I no huma a famba kambe hi mbhiri ya bimbi, ni citshungu contlhe ci no simama kuta ka yena a ta ci gondzisa.
14 Laha a nga kari a hundza, i no wona Levhi,* a n’wana wa Alfewu, na a tshamile laha ku hakhelwako mikhupo, aku kakwe: “Ndzi landzele.” Zvalezvo i no suka a mu landzela.
15 Hi ndzhako ka cikhati, na a kari aga* mutini wa Levhi, ku wa hi ni vakhupisi vo tala ni vawonhi va nga kari vaga* zvin’we naye ni vapizani vakwe, hakuva ku wa hi ni vakhupisi ni vawonhi vo tala va nga mu landzela.
16 Kanilezvi laha a vatsali lava va nga hi vaFarisi va nga wona lezvaku iga ni vawonhi ni vakhupisi, va no wutisa vapizani vakwe, vaku: “Hikuyini a gako ni vakhupisi ni vawonhi ke?”
17 Loku Jesu a zwile lezvo, i te ngalo kabye: “Lava va kalako va nga babyi a va lavi dhokodhela, kanilezvi lava va babyako va mu lava. A ndzi telangi ku ta vitana valulamileko, kanilezvi ndzi tele vawonhi.”
18 Ku wa hi ni vapizani va Johani ni vapizani va vaFarisi va ngata na va hlambanya ku tshama va ngagi nchumu.* Hikwalaho va nota kakwe va taku: “Hikuyini a vapizani va Johani ni vapizani va vaFarisi va tako na va hlambanya ku tshama va ngagi nchumu, kanilezvi a vapizani va wena va nga mahi?”
19 Hikwalaho Jesu i te ngalo kabye: “A vanghana va noivho a va hlambanyi ku tshama va ngagi nchumu* kuveni a noivho ya ha hi zvin’we navo, a hi zvona ke? Loku va ha hi ni noivho a va hlambanyi ku tshama va ngagi nchumu.
20 Kanilezvi cata cikhati leci va to tekelwa a noivho, hi kona va to hlambanya ku tshama va ngagi nchumu* ka siku lego.
21 A nga kona a tsemako nguwo ya yiswa a yi rungela kota ciziva ka nguwo ya kale. Loku a maha lezvo, a ciziva leco ci ta dungurula a nguwo leyo ci engetela ku handzula.
22 A nga kona kambe a chelako vhinyo ya yiswa ka mikwama* ya kale. Loku a maha lezvo, a mikwama yi ta phuxuka, a vhinyo yi halaka ni mikwama ya kona yi wonheka. Kanilezvi a vhinyo ya yiswa yi cheliwa ka mikwama ya yiswa.”
23 Makunu laha a nga kari a hundza hi lomu masin’wini ya trigo hi sabhadho, a vapizani vakwe va no sangula ku hulula trigo na va kari va famba.
24 Hikwalaho a vaFarisi va te ngalo kakwe: “Hi nga wona! Hikuyini va mahako zvilo zvi nga faneliko ku mahiwa hi sabhadho?”
25 Kanilezvi yena aku kabye: “A mu se gondza lezvi Dhavhidha a nga maha a cikhati leci yena ni vavanuna vakwe va ngazwa ndlala ke?
26 Kasi a mu gondzangi ka matimu ya Abhiyatari, a hosana ya vapristi, lezvaku Dhavhidha i nghenile ndlwini ya Nungungulu aga tipawa ta munyikelo, a gumesa a teka to kari a nyika vavanuna lava a nga hi navo, kasi lezvo ne mun’we wabye i wa nga faneli kuga, ntsena vapristi ke?”
27 A gumesa aku: “A sabhadho give kona hi kota ya munhu, a hi munhu a nga vangelwa sabhadho.
28 Hikwalaho, a N’wana wa munhu i Hosi ya sabhadho kambe.”
Mitlhamuselo ya lahasi
^ Kutani: “maka; citatara”.
^ Kutani: “maka; citatara”.
^ Kutani: “maka; citatara”.
^ Kutani: “maka; citatara”.
^ Legi i vito gin’wani ga Matewu.
^ Kutani: “na a tshamile mezeni”.
^ Kutani: “va nga tshamile mezeni”.
^ Kutani: “na va jejuwara; na va pfhunga”.
^ Kutani: “a va jejuwari; a va pfhungi”.
^ Kutani: “jejuwara; pfhunga”.
^ Kutani: “tinghotso to mahiwa hi mabhebhe”.
