Marku 3:1-35
3 Ka khati gin’wani Jesu i no nghena sinagogeni, a ya kuma wanuna wa canja go limala.
2 Hikwalaho va wa mu cuwukela khwatsi kasi ku wona lezvaku i ta hanyisa wanuna loye hi sabhadho ke, kasi va fela ku mu nyika nandzu.
3 I no byela wanuna loye wa canja gi limeleko, aku: “Suka uta laha cikari.”
4 Hi kulandzela aku kabye: “Zva fanela ku maha zva zvi nene kutani zvobiha hi sabhadho; a ku ponisa wutomi kutani ku daya ke?” Kanilezvi a va mu hlamulangi.
5 Andzhako ka loku a va cuwukile na a swirekile ni ku bayiseka nguvhu hi kota ya kutlanyala ka timbilu tabye, i no byela wanuna loye aku: “Tshambuluta canja ga wena.” I no gi tshambuluta, a canja gakwe gi se hanya.
6 Hi kota ya lezvo, a vaFarisi va no huma va ya tekela ku tlhangana ni valandzeli va Herodhi va xuxa cikungo ca lezvaku va ta mu dayisa kuyini.
7 Kanilezvi Jesu i no suka ni vapizani vakwe vaya bimbini. A citshungu ca hombe ca le Galileya ni le Judhiya ci no mu landzela.
8 Hambu leci ca le Jerusalema ni le Idhumeya ni ca le tlhatuko wa Jordhani ni ca le matlhelweni ya Tire ni Sidhoni, ci nota kakwe laha ci ngazwa zvilo zvo tala lezvi a nga kari a maha.
9 I no byela vapizani vakwe lezvaku va longisela cingalavana ci tshama ci mu lavelela kasi a nga manyiwi hi citshungu.
10 Hi kota ya lezvi a nga hanyisa votala, vontlhe lava va nga hi ni mababyi ya hombe va wo tlimbana laha kakwe na va lava ku mu henya.
11 Hambu ni madhimoni, khati ni khati ma nga ku mu cu, ma wowa mahlweni kakwe, ma banguleka, maku: “Wena u N’wana wa Nungungulu.”
12 Kanilezvi a makhati yo tala i wo ma laya nguvhu lezvaku ma nga mu tivekisi.
13 I no kandziha citsungeni a vitana lava a nga va lava, vata kakwe.
14 I no wumba* ntlawa wa 12 wa vona a va chula ku vapostoli, ku nga lava va nga wa ta fambafamba naye, ni ku va ruma va ya chumayela
15 ni kuva ni ntamu wa ku hlongola madhimoni.
16 A ntlawa lowu wa 12 a nga wu yimisa wu wa wumbiwa hi Simoni, loyi a nga mu chula ku hi Pedro,
17 na Jakobe a n’wana wa Zabhedhi, na Johani a makabye wa Jakobe (lava kambe a nga va chula vito gaku Bhowanerjes, zvi wulako ku: “Vana va Kudzindza”),
18 na Andrewu, na Filipu, na Bhartolomewu, na Matewu, na Tomasi, na Jakobe a n’wana wa Alfewu, na Tadhewu, na Simoni a muKhanani,*
19 na Judhasi Iskariyoti, loyi a nga gumesa a mu xavisa.
Jesu i no gumesa a nghena ndlwini,
20 ni citshungu ci no ta talelana kambe, laha ka kuza va vhumala ni cikhati ca kuga zvakuga.
21 Kanilezvi a cikhati leci a maxaka yakwe ma ngazwa lezvo, ma no huma ku ya mu khoma, hakuva ma waku: “Wa hlanya.”
22 Ni vatsali lava va nga relele hi Jerusalema va waku: “I tira hi Bhelzebhubha* niku i hlongola madhimoni hi ntamu wa hosi ya madhimoni.”
23 Hikwalaho, andzhako ka loku a va vitanile vata kakwe i no wulawula navo hi mifananiso, aku: “Sathani a nga zvi kotisa kuyini ku hlongola Sathani ke?
24 Loku a mufumo wu ti pandza ha woce wu ti vhukela, a mufumo lowo wu nga ta pindzuka,
25 ni loku a muti wu ti pandza wu ti vhukela, a muti lowo wu nga ta pindzuka.
26 Loku Sathani yenawu a ti vhukela, a tlhela a ti pandza ha yece, a nga ta pindzuka; i ta gumesa hi ku lova.
27 A ku na munhu a zvi kotako ku nghena lomu ndlwini ya wanuna wa ntamu a yiva zvilo zvakwe na a nga rangangi hi ku mu bohelela. Loku a mu bohelele hi kona a to zvi kota ku phanga a yindlu yakwe.
28 Ndza wula ka n’wina ndziku: A vanhu va ta tsetselelwa ka zvilo zvontlhe, hambu loku vo maha zviwonho zva tshamela muni kutani ku wula ni cihi ciruko.
29 Kanilezvi loyi a rukatelako a moya wo basa a nga ta tsetselelwa kala kupindzuka kanilezvi i na ni nandzu wa ciwonho ca kala kupindzuka.”
30 I wulile lezvo hakuva va waku: “I na ni dhimoni.”
31 Makunu a mamani wakwe ni vamakabye vakwe va no ta yima le handle va ruma munhu a ya mu vitana.
32 Kota lezvi a citshungu ci nga tshamile ci mu randzela, va te ngalo kakwe: “A mamani wa wena ni vamakabye va wena va ku lava le handle.”
33 Kanilezvi i no va hlamula aku: “Kasi himani a mamani wa mina ni vamakabye va mina ke?”
34 I no cuwuka lava va nga tshamile matlhelweni yakwe, aku: “A mamani wa mina ni vamakabye va mina hi lava!
35 Ni wihi loyi a mahako kurandza ka Nungungulu, hi yena a nga makabye wa mina ni mamani wa mina.”
Mitlhamuselo ya lahasi
^ Kutani: “yimisa”.
^ Kutani: “loyi wo pinyama”.
^ I vito gin’wani ga Sathani.
