Marku 5:1-43
5 Makunu va no chikela ka mbhiri leyi yin’wani ya bimbi tikweni ga vaGerasa.
2 Zvalezvi Jesu a nga huma hi lomu ngalaveni, i no telwa hi wanuna a nga hi ni dhimoni na a huma hi lomu zvilahleni.
3 I wa tshama lomu zvilahleni, niku kala ka cikhati leco, i hava a nga zvi kota ku mu boha a nga phewuli, hambu loku ku hi chini.*
4 I wa tshamela ku bohiwa hi tinghomondo* ni machini* kanilezvi i wo phewula, a tshova ni tinghomondo. I hava a nga hi ni ntamu wa ku mu khoma a nga chukuli.
5 Wusiku ni mumu i wa tshama hi ku banguleka lomu zvilahleni ni lomu zvitsungeni na a ti tsemelela hi maribye.
6 Kanilezvi laha a nga wona Jesu hi le kulenyana, i no tsutsuma a mu khinga a yawa mahlweni kakwe,
7 a banguleka hi gezu ga hombe, aku: “Cini ndzi nga ku gohela wena Jesu, N’wana wa Nungungulu a Tlakukileko ku Hundza Vontlhe? Hlambanya hi Nungungulu lezvaku u nga ta ndzi xanisa.”
8 Hakuva Jesu i wa gi byelile, aku: “Dhimoni ndziwena, huma ka wanuna loyi.”
9 Kanilezvi Jesu i no gi wutisa, aku: “Hi wena mani?” Giku: “Hi mina Cikwata hakuva hi tele.”
10 Gi no mu khongotela nguvhu lezvaku a nga ma hlongoli ma huma tikweni lego.
11 Ku wa hi ni ntlhambi wa hombe wa makhumba ma nga kari maga laha citsungeni.
12 Hikwalaho a madhimoni ma no mu khongotela, maku: “Hi rumele ka makhumba kasi hi ya nghena ka wona.”
13 I no ma vhumelela. Hikwalaho, ma no huma ma ya nghena ka makhumba, makunu a ntlhambi wu no tsutsuma wu ya wela bimbini wu mbemba. Ma wa hi cipimo ca 2000 wa makhumba.
14 Kanilezvi a varisi va makhumba va no tsutsuma va ya hlawutela mahungu lawo dhoropeni ni ka matshamu ya laha kusuhani; a vanhu va nota va ta wona lezvi zvi nga mahekile.
15 Hikwalaho va nota ka Jesu va ta wona wanuna wa madhimoni, yaloyi a nga hi ni cikwata, na a tshamile a bohile tinguwo, lezvo na a tiva. Hikwalaho, va no chava.
16 Lava va nga zvi wona, va no va hlawutela lezvi a mhaka leyi yi nga mahekisa zvona ka wanuna loyi a nga hi ni madhimoni ni ka makhumba.
17 Hikwalaho va no khongotela Jesu lezvaku a huma tikweni gabye.
18 Na a nghena lomu ngalaveni, a wanuna loyi a nga hi ni madhimoni i no mu khongotela lezvaku va famba zvin’we.
19 Hambulezvo Jesu a nga vhumelangi, kanilezvi i no mu byela aku: “Famba kaya ka maxaka ya wena u ya ma hlawutela zvontlhe lezvi Jehovha a nga ku mahela ni wuxinji legi a ku maheleko.”
20 A wanuna loyi i no suka a famba a sangula ku huwelela le Dhekapoli* xungetano hi zvontlhe lezvi Jesu a nga mu mahela, ni vanhu vontlhe va no hlamala.
21 Andzhako ka loku Jesu a tlhatukile kambe hi ngalava a wuya tlhelweni legi gin’wani ga bimbi, a citshungu ca hombe ci no hlengeletana kakwe, yena na a hi mbhirini ya bimbi.
22 Ku nota a mun’we wa varangeli va sinagoga a vitaniwako ku hi Jayiro. Laha a nga wona Jesu, i nowa mikondzweni yakwe
23 a mu khongotela makhati yo tala, aku: “A nhanyana wa mina wa babya zva mahati.* Ndza ku kombela lezvaku u ta mu tlhateka mandla kasi a kalamuka a hanya.”
24 Zvalezvo Jesu i no famba naye, ni citshungu ca hombe ci no mu landzela na ci mu manya.
25 Makunu ku wa hi ni wasati a nga hi ni mababyi yo huma nkhata a 12 wa malembe.
26 I wa xanisekile nguvhu mandleni ya vadhokodhela vo tala niku i wa mbhetile mali yakwe yontlhe, kanilezvi a nga chukwatangi, a mababyi ma wo kula.
27 A cikhati leci a ngazwa mahungu hi Jesu, i no mu landza hi lendzhako lomu cikari ka citshungu a ya henya a nguwo yakwe,
28 hakuva i waku: “Loku ndzo kota ku henya a nguwo yakwe basi, ndzi ta hanya.”
29 Zvalezvo a nkhata wakwe wu no nyima ku huma, a zvizwa lomu mirini wakwe lezvaku i hanyisilwe ka mababyi yakwe yo bayisa.
30 Jesu i no tekela ku zvizwa lezvaku ku humile ntamu hi ka yena, a se hundzuluka a wutisa citshungu, aku: “Himani a nga henya tinguwo ta mina?”
31 Kanilezvi a vapizani vakwe va te ngalo kakwe: “A wu ci woni citshungu leci ci ku manyako, makunu hikuyini u wutisako ku: ‘Himani a nga ndzi henya?’”
32 Hambulezvo, i no cuwuka matlhelweni kasi ku wona loyi a nga mu henya.
33 A wasati, na kari a chava ni ku rurumela, ni ku tiva lezvi zvi nga mu mahekela, i nota a tawa mahlweni kakwe a wulela zvontlhe.
34 Jesu aku kakwe: “N’wananga, a kukholwa ka wena ku ku hanyisile. Famba hi kurula, u hanyiswa ka mababyi ya wena yo bayisa.”
35 Na a ha wulawula, ku no chikela vavanuna vo kari va ngata hi mutini wa murangeli wa sinagoga va taku: “A nhanyana wa wena i file! Wa ha mu karatela yini Mugondzisi?”
36 Kanilezvi Jesu i no zvizwa, aku ngalo ka murangeli wa sinagoga: “U nga chavi,* wena kholwa basi.”
37 Kanilezvi a nga tsikangi munhu a mu landza, sine Pedro na Jakobe na Johani a makabye wa Jakobe.
38 A cikhati leci va nga chikela mutini wa murangeli wa sinagoga, Jesu i no wona tsanga-tsanga ni lava va nga kari va rila ni kuba tihuwa.
39 Loku a nghenile, i te ngalo kabye: “Hikuyini mu rilako ni ku maha tsanga-tsanga? A n’wanana loyi a nga fangi i no etlela.”
40 Loku va zwile lezvo va no mu hleka. Kanilezvi andzhako ka loku a humesile vontlhe lomu ndlwini, i no teka papayi ni mamani wa n’wanana ni lava a nga hi navo va nghena lomu a n’wanana a nga hi kona.
41 Hi kulandzela, i no khoma canja ga n’wanana, aku kakwe: “Talita kumi”, zvi wulako ku: “Nhanyana, ndzili ka wena, vhuka!”
42 A nhanyana i no tekela ku vhuka a sangula ku fambafamba. (I wa hi ni 12 wa malembe.) Zvalezvi va nga wona lezvo a va ha ti kotangi hi kutsaka.
43 Kanilezvi Jesu i no va laya nguvhu lezvaku va nga byeli munhu a mhaka leyi, a tlhela a ku mu nyikeni zvakuga.
Mitlhamuselo ya lahasi
^ Kutani: “korente”.
^ Kutani: “tinjema”.
^ Kutani: “makorente”.
^ Kutani: “Tikweni ga Khume ga Madhoropa”.
^ Kutani: “i kusuhani ni kufa”.
^ Kutani: “U nga ha chavi”.