Marku 6:1-56
6 I no suka laho aya tikweni gakwe, ni vapizani vakwe va no mu landzela.
2 Hi sabhadho i no sangula ku gondzisa lomu sinagogeni, hikwalaho a kutala ka lava va nga muzwa va no hlamala nguvhu, vaku: “Kasi inaloyi i zvi kuma kwihi lezvi? Hikuyini a nyikilweko a wutlhari legi ni ntamu wa ku maha zvihlamaliso?
3 A hi yena muvatli loyi, a n’wana wa Mariya ni makabye wa Jakobe, na Josefa, na Judhasi na Simoni ke? A vamakabye vakwe va cisati a hi vona lava hi hanyako navo?” Hikwalaho va no khunguvanyeka hi yena.
4 Kanilezvi Jesu i te ngalo kabye: “A muphrofeti wa dzundziwa ni kwihi a yako, kanilezvi a nga dzundziwi tikweni gakwe ni maxakeni yakwe ne hambu mutini wakwe.”
5 Hikwalaho a nga mahangi zvihlamaliso zva hombe laho. I no tlhateka mandla ka vababyi va tsongwani, a va hanyisa.
6 Kunene, i no hlamala hi kota ya kungakholwi kabye. I no suka a famba hi dhoropa ni dhoropa a gondzisa.
7 Makunu i no vitana lava va 12, a va ruma hi vambiri vambiri, a va nyika ntamu wa ku hlongola madhimoni.
8 I no va laya lezvaku va nga teki nchumu kufambeni kabye — ne timbuva, ne pasta ya zvakuga, ne hambu mali* lomu zvipachini zvabye — saseka nhonga
9 ni lezvaku va boha zvilato,* kanilezvi va nga bohi tinguwo timbiri.*
10 I no engeta aku kabye: “Ni ka wihi muti mu to nghena, tshamani laho kala mu suka ka wutshamu lego.
11 Ni kwihi laha va to kala ku mu amukela kutani ku mu ingisela, a cikhati leci mu sukako laho, phuhunani lithuri mikondzweni ya n’wina kasi zviva wukustumunyu kabye.”
12 Hikwalaho va no suka va famba va ya chumayela vanhu lezvaku va ti sola,
13 va hlongola madhimoni yo tala ni ku va tota mafura a vababyi vo tala, va va hanyisa.
14 Makunu hosi Herodhi i no zvizwa hakuva a vito ga Jesu gi wa dhumile nguvhu, ni vanhu va waku: “Hi Johani Mubhabhatisi a nga vhuxiwa hi ka vafileko. Hi zvona zvi mu nyikako ntamu wa ku maha zvihlamaliso.”
15 Kanilezvi a van’wani va waku: “Hi Elija.” Ni van’wani kambe va waku: “Muphrofeti wo fana ni mun’we wa vaphrofeti va kale.”
16 Kanilezvi, a cikhati leci Herodhi a nga zvizwa i te ngalo: “Johani loyi ndzi nga mu tsema hloko i vhuxilwe hi ka vafileko.”
17 Hakuva Herodhi i wa layile lezvaku Johani a khomiwa a bohiwa a vhalelwa paxweni hi kota ya Herodhiya, a sati wa Filipu a makabye wakwe,* hakuva Herodhi i wa chadhile naye.
18 Hakuva Johani i wa tala ku byela Herodhi, aku: “A zvi faneli ku u teka sati wa makabye wa wena.”
19 Hikwalaho Herodhiya i no mu vekela civiti a lava ku mu daya, kanilezvi i wa nga zvi koti.
20 Hakuva Herodhi i wa chava Johani hi ku tiva lezvaku munhu wo lulama ni wa kubasa, hikwalaho i wa mu vhikela. Khati ni khati a nga muzwa i wa kanganyiseka nguvhu a nga ci tivi ni co maha, hambulezvo zvi wa mu tsakisa a ku mu ingisela.
21 Kanilezvi a cikhati ca ci nene ci no chikela laha Herodhi a nga mahela festa a tihosana ta hombe ni vakomandante va masochwa ni vahombe va le Galileya, hi siku legi a nga tlhanganisa malembe ya kupswaliwa kakwe.
22 A nhanyana wa Herodhiya i no ta kina a tsakisa Herodhi ni lava a ngaga zvin’we navo.* A hosi yi no byela nhanyana, yiku: “Kombela ni cihi u ci lavako ndzi ta ku nyika.”
23 Herodhi i no patsa ni ku hlambanya, aku: “Ni cihi u to ndzi kombela ndzi ta ku nyika, hambu kova khihlanya ga mufumo wa mina.”
24 Hikwalaho, a nhanyana i no huma a ya wutisa mamani wakwe, aku: “Ndzi kombela yini?” Aku kakwe: “Kombela hloko ya Johani Mubhabhatisi.”
25 Zvalezvo i no tsutsuma aya ka hosi a ya mu byela cikombelo cakwe, aku: “Ndzi lava ku u ndzi nyika a hloko ya Johani Mubhabhatisi lomu ka bhandeja zvalezvi.”
26 Hambu lezvi a hosi yi nga karateka nguvhu hi mhaka leyi, yi wa nga lavi ku ala cikombelo cakwe hi kota ya lezvi yi nga hlambanyile ni hi kota ya vapfhumba va yona.*
27 Hikwalaho, a hosi yi no tekela ku ruma a murindzeli yi mu laya lezvaku a neha hloko ya Johani. A murindzeli i no famba a ya mu tsema hloko lomu paxweni
28 a yi neha lomu ka bhandeja. I no yi nyikela ka nhanyana, a nhanyana a nyika mamani wakwe.
29 Loku a vapizani va Johani va zvi zwile, va nota va ta teka cirumbi cakwe va ya lahla.
30 A vapostoli va no hlengeletana ka Jesu va mu hlawutela zvontlhe lezvi va nga mahile, ni zvontlhe lezvi va nga gondzisile vanhu.
31 Aku kabye: “Tanani hiya ka wutshamu ga ciwula hi ya tshama hoce hi humula kutsongwani.” Hakuva ku wa hi ni vanhu vo tala va ngata ni ku famba laha ka kuza va vhumala ni cikhati ca kuga.
32 Hikwalaho, va no nghena ngalaveni va famba ka wutshamu ga ciwula kasi va ya tshama voce.
33 Kanilezvi a vokari va no va wona ni ku famba zvi se tiviwa hi votala. Hikwalaho a vanhu va madhoropa wontlhe va no tsutsuma hi minenge va ranga hi vona va chikela.
34 Loku Jesu a humile hi lomu ngalaveni i no wona citshungu ca hombe a ci zwela wusiwana hakuva va wa ku khwatsi tiyivhu to kala murisi. I no sangula ku va gondzisa zvilo zvo tala.
35 Laha gi ngaya kuphumeni, a vapizani vakwe va nota kakwe, va taku: “A wutshamu legi ciwula niku makunu gi phumile.
36 Va chuse va famba kasi vaya zvidhoropaneni zva lomu kusuhani va ya ti xavela zvakuga.”
37 Yena aku kabye: “Va nyikeni zvakuga n’wina.” A vapizani va no mu hlamula vaku: “U lava ku hi ya xava tipawa ta 200 wa tidhenaryo* hi ta nyika vanhu vaga ke?”
38 Aku kabye: “Tipawa tingani mu nga nato? Fambani mu ya cuwuka!” Loku va zvi tivile, va te ngalo: “I ntlhanu wa tipawa ni tinjhanjhi timbiri.”
39 I no byela vanhu vontlhe lezvaku va tshama byanyini.*
40 Hikwalaho va no tshama hi mitlawa ya 100 ni ya 50.
41 Makunu i no teka a ntlhanu wa tipawa ni tinjhanjhi timbiri a cuwuka tilweni a zvi katekisa. Hi kulandzela, i no khema tipawa a nyika vapizani vakwe, a vapizani va avela vanhu a gumesa a avela a tinjhanjhi leti ta timbiri ka vontlhe.
42 Hikwalaho vontlhe va noga va xura,
43 va guma va hlengeletela a zvikhemu lezvi zvi nga sele va tata a 12 wa zvindzala,* na ku nga hlayiwi lezvi zva tinjhanjhi.
44 Lava va ngaga tipawa va wa hi 5000 wa vavanuna.
45 Zvalezvo i no byela vapizani vakwe lezvaku va nghena ngalaveni va ranga vaya ka mbhiri leyi yin’wani ya bimbi tlhelweni ga Bhetsaidha, yena na a ha salisana ni citshungu.
46 Andzhako ka ku salisana naco, i noya citsungeni a ya khongela.
47 Laha makunu gi nga hi wusiku, a ngalava yi wa hi cikari ka bimbi, kanilezvi Jesu i wa hi yece seno handle.
48 Hikwalaho, a cikhati leci a nga va wona na valwa ni ngalava, kota lezvi a moya wu ngaba wuya ko hambana ni lomu va ngaya kona, i noya kabye na giya kuceni* na a famba hehla ka bimbi; kanilezvi i wa ku khwatsi i lava ku va hundza.
49 Kanilezvi laha va nga mu wona na a famba hehla ka bimbi, va noba huwa vaku: “A cigono!”
50 Hakuva vontlhe va wa mu wonile, va chava nguvhu. Kanilezvi, i no tekela ku va angula aku: “Tiyani hlana! Mu nga chavi, hi mina.”
51 I no nghena ngalaveni, a moya wu se nyima. Laha va nga wona lezvo va no hlamala nguvhu,
52 hakuva a va zvi zwisisangi lezvi zvi nga mahekile hi tipawa, kanilezvi a timbilu tabye ti no simama ku vhaleka.
53 Loku va tlhatukile, va no chikela Genezareta va nyimisa ngalava kusuhani ni mbhiri ya bimbi.
54 Kanilezvi zvalezvi va nga huma hi lomu ngalaveni a vanhu va no mu tiva.
55 Va no tsutsuma-tsutsuma tikweni lego gontlhe, va rwalela hi tihlaka* lava va nga babya va va yisa laha va ngazwa lezvaku i kona.
56 Ni ka cihi cidhoropana kutani dhoropa, kutani tiko a nga nghena, va wa veka vababyi mamerkadho, va mu khongotela lezvaku a va tsika va henya machakafula ya nguwo yakwe basi. Vontlhe lava va nga ma henya va no hanya.
Mitlhamuselo ya lahasi
^ Hi kukongoma: “prata”.
^ Hi kukongoma: “masandalya”.
^ Kutani: “va nga teki tinguwo ta ku cica hi tona”.
^ Kutani: “a makabye wa Herodhi”.
^ Kutani: “a nga tshamile navo mezeni”.
^ Kutani: “ya lava va nga tshamile mezeni”.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Hi kukongoma: “byanyini go nyuka”.
^ Kutani: “zvirundzu”.
^ Kwalomu ka 3 hora kala 6 hora ya kuca.
^ Kutani: “timaka; zvitatara”.
