Marku 7:1-37
7 A vaFarisi ni vatsali vo kari va nga tile hi Jerusalema va no hlengeletana ka Jesu.
2 Makunu va no wona a vapizani vo kari va Jesu va ngaga na mandla yabye ma nga hlazvekangi, ku nga lezvaku, va wa nga hlambangi mandla.*
3 (Hakuva a vaFarisi ni vaJudha vontlhe a vagi na va nga hlambangi mandla kala lomu ka zvisungunu, va namarela ka zvihena zva vakale,
4 ni loku va wuya hi merkadho a vagi na va nga se hlamba. Ku na ni zvihena zvin’wani zvo tala va nga zvi vhumele ni ku namarela ka zvona, zvo fana ni ku bhabhatisa tikopo, ni tijaro, ni zvibya zva kobre.)
5 Hikwalaho, a vaFarisi lavo ni vatsali va no mu wutisa vaku: “Hikuyini a vapizani va wena va nga landzeliko a zvihena zva vakale, kanilezvi vaga na mandla yabye ma nga hlazvekangi ke?”
6 Aku kabye: “Vakanganyisi ndzin’wina, Isaya i wa phrofeta hi n’wina a cikhati leci a nga tsala aku: ‘A vanhu lava va ndzi dzundza hi minomu yabye ntsena, kanilezvi a timbilu tabye ti kule nguvhu na mina.
7 Va ndzi khozela mahala, hakuva lezvi va zvi gondzisako tigondzo ta vanhu.’
8 Mu tsika a nayo wa Nungungulu mu namarela ka zvihena zva vanhu.”
9 I no engeta aku kabye: “Mu hambunyeta a nayo wa Nungungulu hi mano kasi mu landzela a zvihena zva n’wina.
10 Mosi i te ngalo: ‘Kombisa cichavo ka papayi wa wena ni ka mamani wa wena’, niku: ‘Ni wihi loyi a wulawulako zvahava hi* papayi wakwe kutani mamani wakwe i wa dawe.’
11 Kanilezvi n’wina mu ngalo: ‘Loku a munhu a byela papayi wakwe kutani mamani wakwe aku: “Ni cihi leci ndzi nga naco ndzi nga lava ku ku vhuna hi cona i korbani (zvi wulako ku: cinyikiwo ci nyikelweko ka Nungungulu)”’,
12 a ma ha mu tsiki a mahela nchumu papayi wakwe kutani mamani wakwe.
13 Hikwalaho mu chipisa a mhaka ya Nungungulu hi zvihena zva n’wina lezvi mu zvi tsalileko. Mu maha zvilo zvin’wani zvo tala zvo khwatsi hi lezvi.”
14 I no vitana citshungu kambe aku ka cona: “N’wentlheni ndzi ingiseleni, mu zwisisa lezvi ndzi wulako.
15 A ku na nchumu wu tako hi lahandle ka munhu wu nghena ndzeni kakwe wu zvi kotako ku mu bihisa; kanilezvi lezvi zvi humako hi ka munhu hi zvona zvi mu bihisako.”
16 *——
17 A cikhati leci a nga siya citshungu a nghena lomu ndlwini, a vapizani vakwe va no mu wutisa xungetano hi mufananiso lowu.
18 Hikwalaho i te ngalo kabye: “Kasi n’winawu a mu zvi zwisisi a ku fana na vona? Kasi a mu zvi tivi lezvaku a ku na nchumu wu tako hi lahandle wu nghena ndzeni ka munhu wu zvi kotako ku mu bihisa ke?
19 Hakuva a wu ngheni mbilwini yakwe, kanilezvi wu nghena khwirini gakwe wu gumesa wuya cikoti.” Hikwalaho, i no komba lezvaku a zvakuga zvontlhe zvi basile.
20 I no va byela kambe aku: “Leci ci humako hi ka munhu hi cona ci mu bihisako.
21 Hakuva hi lomu mbilwini ya munhu ku huma maalakanyo yo biha, ku nga wubhayi,* ni kuyiva, ni kudaya,
22 ni ku tsika nuna kutani sati wa wena u etlela ni mun’wani, ni timbilu, ni mitiro yo biha, ni kukanganyisa, ni mahanyela ya tingana,* ni tihlo ga wunavenave, ni kurukatela, ni matshandza, ni wupumbu.
23 A zvilo zvontlhe lezvi zvo biha zvi huma hi lomu ndzeni, niku hi zvona zvi bihisako munhu.”
24 I no suka hi laho aya tikweni ga Tire ni Sidhoni. I no ya nghena lomu ndlwini hakuva i wa nga lavi lezvaku zvi tiviwa hi munhu, kanilezvi va no zvi tiva.
25 Zvalezvi a wasati loyi a cinhanyetana cakwe ci nga hi ni dhimoni a ngazwa hi Jesu i nota a tawa mikondzweni yakwe.
26 A wasati loye i wa hi muGreki, wa muSirofenike hi kupswaliwa. I no mu khongotela lezvaku a hlongola dhimoni ka nhanyana wakwe.
27 Kanilezvi Jesu i te ngalo kakwe: “A kusangula tsika vanana va xura, hakuva a zvi ringani ku teka zvakuga zva vanana u nyika zvimbyanana.”
28 Kanilezvi yena i no mu hlamula aku: “Hi zvona hosi, kanilezvi hambu a zvimbyanana zvi nga lahasi ka meza zva rolela matlhatlha ma wisiwako hi vanana.”
29 Jesu aku kakwe: “Kota lezvi u nga wula lezvi, famba; a dhimoni gi humele ka nhanyana wa wena.”
30 Hikwalaho i no tlhela kaya a ya kuma n’wanana na a etlele laha mubhedhini, a dhimoni na gi humele.
31 Loku Jesu a sukile hi Tire, i no tsemakanya Sidhoni aya bimbini ga Galileya, a hundza hi Dhekapoli.*
32 Va no mu tisela wanuna wofa tindleve na a nga wulawuli khwatsi, va mu khongotela lezvaku a mu tlhateka mandla.
33 I no mu koka hi tlhelo a suka naye laha ka citshungu, a ya nghenisa titiho takwe lomu tindleveni ta wanuna loye, a phela, a gumesa a mu henya lirimi lakwe.
34 Na a cuwukile tilweni, i no hefemula hi ntamu aku kakwe: “Efata”, zvi wulako ku: “Vhululeka.”
35 Zvalezvo a tindleve takwe ti no vhululeka, ni misiha ya lirimi lakwe yi tlhatlheka, a sangula ku wulawula khwatsi.
36 Makunu Jesu i no va laya lezvaku va nga byeli munhu, kanilezvi laha a nga va laya nguvhu vonawu va wo engetela ku wulawula hi zvona.
37 Kunene, va no hlamala nguvhu vaku: “Zvontlhe lezvi a zvi mahako a zvi no ku saseka. Wa vhulula hambu tindleve ta lava vofa tindleve ni ku maha zvidudu* zvi wulawula.”
Mitlhamuselo ya lahasi
^ Ku nga ku kala ku ti basisa hi kuya hi nayo.
^ Kutani: “a rukatelako”.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
^ Hi ciGreki: porneía. Wona Tlhamuselo wa magezu ya Bhibhiliya.
^ Hi ciGreki: asélgeia. Wona Tlhamuselo wa magezu ya Bhibhiliya.
^ Kutani: “Tikweni ga Khume ga Madhoropa”.
^ Kutani: “lava vo kala ku wulawula”.
