Marku 8:1-38
8 Masikwini lawo, laha a citshungu ca hombe ci nga hlengeletene kambe na ci nga hi na nchumu ca kuga, Jesu i no vitana vapizani vakwe, aku kabye:
2 “A citshungu leci ndza ci zwela wusiwana, hakuva va tshamile masiku manharu na mina niku a va ha hi na zvakuga.
3 Loku ndzo va tlhelisa kaya ni ndlala,* va ta famba va sika hi ndlela hakuva a vokari vabye vata hi kule.”
4 Kanilezvi a vapizani vakwe va no mu hlamula vaku: “Hi ta ti kuma kwihi a tipawa ta ku xurisa a vanhu lava kwalomu ciwuleni hi nga kona?”
5 I no va wutisa aku: “Tipawa tingani mu nga nato?” Vaku: “I 7.”
6 I no byela citshungu lezvaku ci tshama lahasi. Andzhako ka lezvo i no teka a tipawa leto ta 7, a bonga, a ti khema a nyika vapizani vakwe, a vapizani va avela citshungu.
7 Va wa hi ni zvinjhanjhana zvi tsongwani kambe; loku a zvi katekisile, i no va byela lezvaku va zvi avelawu ka vanhu.
8 Hikwalaho va noga va xura, va hlengeletela a zvikhemu lezvi zvi nga sele va tata a 7 wa zvindzala* zva hombe.
9 Ku wa hi ni cipimo ca 4000 wa vavanuna. Andzhako ka lezvo i no va tsika va famba.
10 Zvalezvo i no nghena ngalaveni ni vapizani vakwe aya tlhelweni ga Dhalmanuta.
11 A vaFarisi va no mu tela va ta sangula ku kanetisana naye va mu kurumeta lezvaku a va komba ciwoniso ca le tilweni, na vo mu ringa.
12 Hikwalaho i no hefemula hi ntamu moyeni wakwe aku: “Hikuyini a cizukulwana leci ci nge kho ni ku lava ciwoniso? Ndza tiyisa ndziku: A cizukulwana leci ci nga ta kombiwa ciwoniso ne cin’we.”
13 Hikwalaho i no va tsika, a nghena kambe ngalaveni aya ka yin’wani mbhiri ya bimbi.
14 Kanilezvi a vapizani va no rivala ku teka tipawa; va wa nga hi na nchumu lomu ngalaveni saseka pawa yin’we basi.
15 I no va tlharihisa aku: “Vhulani mahlo, mu ti wonela ka livrina ya vaFarisi ni ya Herodhi.”
16 Hikwalaho va no sangula ku wulawulisana hi lezvi va nga hi hava tipawa.
17 Loku a zvi wonile, i no va wutisa aku: “Hikuyini mu wulawulisanako hi lezvi mu nga hava tipawa? Kasi a mu se zvi zwisisa ke? A zvi se dlunyateka timbilwini ta n’wina?
18 ‘Kasi hambu lezvi mu nga ni matihlo a mu woni; hambu lezvi mu nga ni tindleve a mu ingisi ke?’ A ma ha alakanyi
19 a ku zvindzala* zvingani mu nga tata hi zvikhemu lezvi mu nga hlengeletela a cikhati leci ndzi nga khemelela a ntlhanu wa tipawa ndzi avela a 5000 wa vavanuna ke? Vaku: “I 12.”
20 “A cikhati leci ndzi nga khemelela a 7 wa tipawa ndzi gisa a 4000 wa vavanuna, zvindzala* zvingani zva hombe mu nga tata hi zvikhemu lezvi zvi nga sala ke?” Vaku: “I 7.”
21 Hikwalaho i no va wutisa aku: “A mu se zvi zwisisa?”
22 Na va chikele Bhetsaidha, a vanhu va no mu tisela wanuna wa cikhumu va ta mu khongotela lezvaku a mu henya.
23 I no khoma a wanuna loye hi woko a huma naye lomu cidhoropaneni. Loku a phelele matihlo yakwe, i no mu tlhateka mandla a mu wutisa aku: “Zvi kona u zvi wonako?”
24 A wanuna loye i no cuwuka hehla aku: “Ndzi wona vanhu, kanilezvi vo khwatsi tisinya ti fambako.”
25 I no tlhela a tlhateka mandla yakwe matihlweni ya wanuna loye, a se wona khwatsi. A matihlo yakwe ma no tlhela ma wona, a sangula ku wona zvontlhe khwatsi.
26 Hikwalaho i no mu tlhelisa kaya aku: “U nga ngheni cidhoropaneni.”
27 Jesu ni vapizani vakwe va no suka vaya zvidhoropaneni zva Khezariya wa Filipi. Laha ndleleni i no wutisa vapizani vakwe aku: “A vanhu ve hi mina mani?”
28 Vaku kakwe: “Ve hi wena Johani Mubhabhatisi, kanilezvi a van’wani ve hi wena Elija, ni van’wani kambe ve u mun’we wa vaphrofeti.”
29 I no va wutisa aku: “N’wina ke, mu hi mina mani?” Pedro i no mu hlamula aku: “Hi wena Kristu.”
30 Hikwalaho i no va laya lezvaku va nga mu tivekisi ka munhu.
31 I no sangula ku va gondzisa lezvaku a N’wana wa munhu i ta xaniseka nguvhu, a aliwa hi madhota ni vapristi lava va tihosana ni vatsali, a dawa, a gumesa a vhuka andzhako ka masiku manharu.
32 Kunene, i wa nga fihli nchumu ka mhaka leyi. Kanilezvi Pedro i no mu koka hi tlhelo a ya mu kawuka.
33 Jesu i no hundzuluka a cuwuka vapizani vakwe, a kawuka Pedro aku: “Suka ka mina, Sathani! Hakuva a maalakanyo ya wena a hi ya Nungungulu kanilezvi ya vanhu.”
34 Makunu i no vitana citshungu ni vapizani vakwe aku kabye: “Loku munhu a lava ku ndzi landzela i wa ti tsike, a rwala a mhandze yakwe ya hlomulo* a simama ku ndzi landzela.
35 Hakuva ni wihi a lavako ku hlayisa wutomi gakwe i ta lahlekelwa hi gona, kanilezvi loyi a lahlekelwako hi wutomi gakwe hi kota ya mina ni hi kota ya mahungu ya ma nene, i ta gi ponisa.
36 Hakuva zvi ta mu vhuna yini munhu a ku ganya tiko gontlhe kanilezvi a luza wutomi gakwe ke?
37 Kona cini ca ku a nga ci nyikela kasi ku tlhatlhisa wutomi gakwe?
38 Hakuva loyi a dhanako hi kota ya mina ni timhaka ta mina ka cizukulwana leci ci nga tsumbekiko ka Nungungulu* ni ca kuwonha, a N’wana wa munhu yenawu i ta dhana hi yena a cikhati leci a tota hi kungangamela ka Papayi wakwe na a hi ni tingilozi to basa.”
Mitlhamuselo ya lahasi
^ Kutani: “na va nga gangi nchumu”.
^ Kutani: “zvirundzu”.
^ Kutani: “zvirundzu”.
^ Kutani: “zvirundzu”.
^ Wona Tlhamuselo wa magezu ya Bhibhiliya.
^ Hi kukongoma: “ca wubhayi”.
