Marku 9:1-50
-
Jesu a hundzuka (1-13)
-
Jesu a hanyisa mufana a nga hi ni dhimoni (14-29)
-
Zvontlhe zvilo zva koteka ka loyi a nga ni kukholwa (23)
-
-
Jesu a phrofeta kambe hi kufa kakwe (30-32)
-
A vapizani va kanetisana hi ku hi mani wahombe (33-37)
-
Loyi a nga hi vhukeliko i yima na hina (38-41)
-
Lezvi zvi mahako munhu a wonha (42-48)
-
“Tshamani ni munyu ndzeni ka n’wina” (49, 50)
9 I no va byela kambe aku: “Ndza tiyisa ka n’wina ndziku: Ku na ni vokari va yimileko laha va to kala kufa kala va wona a Mufumo wa Nungungulu na wuta hi ntamu.”
2 Loku ku hundzile a 6 wa masiku, Jesu i no teka Pedro, na Jakobe, na Johani a famba navo citsungeni co leha na va hi voce. I no hundzuka mahlweni kabye;
3 a tinguwo takwe ti hatima, ti basa ti ku pa a ku hundza ni tihi tinguwo ti basisilweko hi muhlazvi wa laha misaveni.
4 Ku no woneka Elija na Mosi na va bhula na Jesu.
5 Pedro aku ka Jesu: “Rabi, zva hi tsakisa a ku tshama laha. Hikwalaho, hi tsike hi gwimba matenda manharu: A gin’we ga wena, a gin’we ga Mosi, a gin’wani ga Elija.”
6 Kunene, i wa nga zvi tivi ni ku i ta kuyini hakuva va wa chava nguvhu.
7 Ku nota refu gi ta va fenengeta, ku zwala gezu hi lomu refini, giku: “Loyi hi yena N’wana wa mina ndzi mu randzako. Mu ingiseni.”
8 Zvalezvo va no cuwuka matlhelweni va wona lezvaku va wa nga ha hi na munhu, va wova na Jesu basi.
9 Laha va nga kari va relela hi citsungeni, i no va laya nguvhu lezvaku va nga byeli munhu lezvi va nga zvi wonile kala a N’wana wa munhu a vhuka hi ka vafileko.
10 Va no hlayisa timhaka leto timbilwini tabye,* kanilezvi va wa wutisana ku a kuvhuka loko hi ka vafileko ku wula yini.
11 Makunu va no mu wutisa vaku: “Hikuyini a vatsali va nge ku ta ranga hi Elija ata?”
12 Aku kabye: “Kunene, Elija i ta ranga hi yena ata, a ta vhuxeta zvilo zvontlhe; kanilezvi hikuyini ku tsalilweko lezvaku a N’wana wa munhu i fanele ku xaniseka nguvhu ni ku chepetiwa?
13 Kanilezvi ndza mu byela ndziku: Elija i tile va ta maha ni cihi va nga ci lava laha kakwe, kota lezvi zvi tsalilweko xungetano hi yena.”
14 A cikhati leci va nga kari va chikela laha ku nga hi ni vapizani lava van’wani, va no wona a citshungu ca hombe na ci va randzele, ni vatsali na va kanetisana navo.
15 Kanilezvi, zvalezvi a citshungu contlhe ci nga mu wona ci no hlamala ci tsutsuma ciya kakwe ci ya mu losa.
16 Hikwalaho i no va wutisa aku: “Mu kanetisana hi yini ni vapizani?”
17 A mun’we cikari ka citshungu i no mu hlamula aku: “Mugondzisi, ndzi ku tele ni mufana wa mina hakuva i na ni dhimoni gi mu vhalako ku wulawula.
18 Ni kwihi laha gi mu khomako, go mu tlatlalata lahasi, a pupuma khuvi ni ku getsela* matino a mbhela ntamu. Ndzi kombele a vapizani va wena lezvaku va gi hlongola, kanilezvi a va gi kotangi.”
19 I no va hlamula aku: “N’wina cizukulwana ci nga kholwiko, ndzi ta simama na n’wina kala rini? Ndzi ta mu timisela kala rini? Tanani naye ka mina.”
20 Va nota ni mufana loye, kanilezvi laha a dhimoni gi nga mu wona, gi no tekela ku mu cherukisa, awa lahasi, a puluwundza na a pupuma khuvi.
21 Makunu Jesu i no wutisa a papayi wa kona aku: “Zvi mu sangulile rini zvalezvi?” Aku: “Kusukela wun’wananeni gakwe.
22 Gi tala ku mu wisela laha ndzilweni ni lomu matini kasi gi mu daya. Kanilezvi loku wena u zvi kota ku maha cokari, hi zwele wusiwana u hi vhuna.”
23 Jesu aku kakwe: “Hikuyini u nge ‘loku u zvi kota!’ Zvontlhe zva koteka ka loyi a nga ni kukholwa.”
24 Zvalezvo a papayi wa n’wanana i no banguleka aku: “Ndza kholwa! Ndzi vhune laha ndzi kiyelelwako hi kukholwa!”
25 Makunu a cikhati leci Jesu a nga wona lezvaku a citshungu ci tsutsumela kakwe, i no kawuka a dhimoni aku: “Dhimoni ndziwena ga mbeveve* ni ciwiri, ndza ku laya: Huma ka yena, u nga ha ngheni kambe kakwe!”
26 Loku gi bile huwa gi mu cherukisa nguvhu gi no huma, a n’wanana a sala na a ku khwatsi i nofa laha ka kuza a kutala ka vanhu vaku: “I file!”
27 Kanilezvi Jesu i no mu khoma hi woko a mu vhuxa, a se yima.
28 Andzhako ka ku nghena lomu ndlwini, a vapizani vakwe va no mu wutisa na va hi voce vaku: “Hikuyini hina hi nga zvi tsandzeka ku gi hlongola?”
29 Aku kabye: “A dhimoni ga lixaka leli gi huma ntsena hi mukhongelo.”
30 Va no suka hi laho va tsemakanya Galileya, kanilezvi i wa nga lavi lezvaku zvi tiviwa hi munhu.
31 Hakuva i wa gondzisa vapizani vakwe ni ku va byela lezvi: “A N’wana wa munhu i ta nyikelwa mandleni ya vanhu, va mu daya, kanilezvi, hambu lezvi a to dawa, i ta vhuka andzhako ka masiku manharu.”
32 Hambulezvo, a va yi zwisisangi a mhaka leyi, kanilezvi va wa chava ku mu wutisa.
33 Makunu va no chikela Kapernawume. Laha a nga hi lomu ndlwini, i no va wutisa aku: “Mu wa kanetisana hi yini lomu ndleleni?”
34 Va no miyela, hakuva lomu ndleleni va wa kanetisana hi lezvaku hi mani wahombe cikari kabye.
35 Hikwalaho, i no tshama hasi a vitana lava va 12, aku kabye: “Loku a wokari a lava kuva wo sangula, i fanele kuva wo gumesa ka vontlhe ni citiri ca vontlhe.”
36 Makunu i no teka cin’wanana a ci yimisa cikari kabye. I no ci angarela aku kabye:
37 “Ni wihi loyi a amukelako a cin’we ca zvivanana lezvi hi kota ya vito ga mina i amukela na minawu; ni loyi a ndzi amukelako a nga amukeli mina ndzoce kanilezvi i amukela ni Loyi a ndzi rumileko.”
38 Johani aku kakwe: “Mugondzisi, hi wonile munhu na a hlongola madhimoni hi vito ga wena hi se mu betela hakuva i wa nga hi landzeli.”
39 Kanilezvi Jesu aku: “Mu nga mu beteli, hakuva a ku na munhu a to maha zvihlamaliso hi vito ga mina a to tekela ku wulawula zvahava hi mina.
40 Hakuva loyi a nga hi vhukeliko, i yima na hina.
41 Ni wihi loyi a mu nyikako a kopo ya mati ya kunwa hi lezvi mu nga va Kristu, ndza tiyisa ka n’wina ndziku: A nga ta lahlekelwa hi nchachazelo wakwe.
42 Kanilezvi loyi a wonhisako mun’we wa lava vatsongwani va kholwako, zvi wa tava chukwana ku a bohelelwa ribye ga hombe nhan’wini yakwe* a rikhiswa bimbini.
43 “Loku a canja ga wena go tshuka gi ku maha u wonha,* gi tseme. I chukwana a ku nghena wutomini na u hi cilima a ku hundza ku hoxiwa ni mandla mambiri Gehena* ga ndzilo wu nga timekiko.
44 *——
45 Ni loku a nkondzo wa wena wu ku maha u wonha,* wu tseme. I chukwana a ku nghena wutomini na u khwita a ku hundza ku hoxiwa Gehena* ni mikondzo yimbiri.
46 ——
47 Ni loku a tihlo ga wena gi ku maha u wonha,* gi hoxe kule. Hakuva i chukwana a ku nghena Mufun’weni wa Nungungulu ni tihlo gin’we a ku hundza ku hoxiwa Gehena* na u hi ni matihlo mambiri,
48 laha a zviwungwani zvi nga fiko ni ndzilo wa kona wu nga timekiko.
49 “Hakuva a mun’we ni mun’wani i fanele ku lungiwa hi ndzilo.
50 A munyu wu nene, kanilezvi loku a munyu wo tshuka wu pswhama wu ta lungiwa hi yini ke? Tshamani ni munyu ndzeni ka n’wina, mu hlayisa kurula cikari ka n’wina.”
Mitlhamuselo ya lahasi
^ Zvi nga ha wula ku: “Va no tshama nazvo”.
^ Kutani: “lotela”.
^ Kutani: “cidudu”.
^ Kutani: “ribye ga cigayo nhan’wini yakwe legi gi rendzelekiswako hi mbongola”.
^ Hi kukongoma: “u ti phinganyeta”.
^ Wona Tlhamuselo wa magezu ya Bhibhiliya.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
^ Hi kukongoma: “u ti phinganyeta”.
^ Wona Tlhamuselo wa magezu ya Bhibhiliya.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
^ Hi kukongoma: “u ti phinganyeta”.
