Matewu 11:1-30
11 Loku Jesu a gumesile ku nyika zvileletelo a vapizani vakwe va 12, i no suka laho a ya gondzisa ni ku chumayela madhoropeni yabye.
2 Kanilezvi, loku Johani a zwile mitiro ya Kristu na a hi paxweni, i no ruma vapizani vakwe
3 va ya wutisa Jesu vaku: “Hi wena Loyi a Tako kutani ha ha rindzela mun’wani ke?”
4 Jesu i no va hlamula, aku: “Fambani mu ya byela Johani lezvi mu zvi zwako ni lezvi mu zvi wonako, muku:
5 A zvikhumu makunu zva wona ni zvilima zva famba, a vahlokonho va hanyiswa* ni lava vofa tindleve va ingisa, a vafileko va vhuxiwa ni zvisiwana zva byeliwa a mahungu ya ma nene.
6 I katekile loyi a nga khunguvanyekiko* hi kota ya mina.”
7 A cikhati leci va nga famba, Jesu i no sangula ku wulawula ni citshungu hi Johani, aku: “Mu waya mu ya wona yini le ciwuleni? Mu wa yela ku ya wona a lihlanga li ninginisiwako hi moya?
8 Makunu mu waya mu ya wona yini? A ku ya wona wanuna a bohileko tinguwo to saseka?* Phela lava va bohako tinguwo to saseka va lomu tindlwini ta tihosi.
9 Mu waya kwihi? Mu waya mu ya wona muphrofeti? Ina hi yena, niku wa hundza nguvhu a muphrofeti.
10 Loyi hi yena ku tsalilweko ha yena ku ngalo: ‘Ndza rumela a nandza ga mina mahlweni ka wena,* legi gi to ranga mahlweni ka wena gi ku longiselela ndlela!’
11 Ndza tiyisa ka n’wina, ndziku: Cikari ka lava va pswalilweko hi vavasati a ku se humelela wa hombe ku hundza Johani Mubhabhatisi, kanilezvi loyi a nga mutsongwani Mufun’weni wa matilo wa hombe ku hundza yena.
12 Kusukela masikwini ya Johani Mubhabhatisi kala nyamutlha, a vanhu va kulula va n’watseka na va lava Mufumo wa matilo, niku lava va kululako va n’watseka va wu kuma.
13 Hakuva a Vaphrofeti vontlhe ni Nayo va phrofetile kala ka Johani;
14 makunu kani ma kholwa, kani a mu kholwi, Johani hi ‘Elija loyi a nga wa tata’.
15 Loyi a nga ni tindleve i wa ingise.
16 “A cizukulwana leci ndzi ta ci fananisa na mani ke? Ci fana ni vanana va tshamileko merkadho lava va vitanako vanghana vabye,
17 vaku: ‘Hi mu chayele muzka* kanilezvi a mu kinangi; hi bile huwa kanilezvi a mu ti bangi zvifuva hi hlomulo.’
18 Hizvalezvo, Johani i tile a ta tshama a ngagi ne kunwa, kanilezvi a vanhu ve ngalo: ‘I na ni dhimoni.’
19 A N’wana wa munhu i tile a taga ni kunwa kanilezvi a vanhu ve ngalo: ‘I khobomu* niku cidhakwa; munghana wa vakhupisi ni vawonhi.’ Hambulezvo, a wutlhari gi kombisa kululama* hi mitiro* ya gona.”
20 Andzhako ka lezvo i no sangula ku sola a madhoropa lawa a nga mahile zvihlamaliso zvo tala ka wona hakuva a va ti solangi, aku:
21 “Khombo ka wena Korazini na wena Bhetsaidha! Hakuva loku a zvihlamaliso lezvi zvi mahilweko ka n’wina zvi wa no mahiwa le Tire ni le Sidhoni na va ti solile kale nguvhu, va boha tisakwa va tshama khumeni.
22 Kanilezvi ndza wula ka n’wina, ndziku: Sikwini ga Kulamula a kutsayiswa ka n’wina ku ta hundza loku ka Tire ni Sidhoni.
23 Wena Kapernawume, u alakanya ku u ta tlakuselwa tilweni? Kokwihi! Uya Cilahleni.* Hakuva loku a zvihlamaliso lezvi zvi mahilweko ka wena zvi wa no mahiwa le Sodhoma, na ga ha hi kona kala nyamutlha.
24 Kanilezvi ndza wula ka wena, ndziku: Sikwini ga Kulamula a kutsayiswa ka wena ku ta hundza loku ka Sodhoma.”
25 Hi kota ya lezvo, Jesu i te ngalo: “Ndza ku dhumisa Papayi mahlweni ka vanhu, wena Hosi ya tilo ni misava hakuva u fihlile a timhaka leti ka vatlharihileko ni lava va gondzileko nguvhu, u ti tivekisa ka lava va ti koramisako a ku fana ni vanana.
26 Ina Papayi, zvi tano hakuva loko hi kona kurandza ka wena.
27 Papayi i ndzi nyikile zvilo zvontlhe. A ku na munhu a mu tivako khwatsi a N’wana, saseka Papayi. Ne a nga kona a mu tivako khwatsi Papayi, saseka N’wana ni lava a N’wana a xuvako ku va gondzisa hi Papayi wakwe.
28 Tanani ka mina n’wina n’wentlhe mu tirako ni ku bindziwa, ndzi ta mu humuta.
29 Pingani a pingu* wa mina mu gondza ka mina hakuva ndzi rulile niku ndzi na ni mbilu yo ti koramisa, mu ta humula.*
30 Hakuva a pingu* wa mina a wu gogonyi ni ndzhwalo wa mina wa vevuka.”
Mitlhamuselo ya lahasi
^ Kutani: “basiswa”.
^ Hi kukongoma: “wiko”.
^ Kutani: “tinguwo ta ti nene”.
^ Hi kukongoma: “ka nghohe ya wena”.
^ Hi kukongoma: “Hi mu bele citoliya”.
^ Kutani: “Munhu wa makolo”.
^ Kutani: “gi lweliwa”.
^ Kutani: “hi mihandzu”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Ku wuliwa nchumu wu tiriselwako ku pinga hi wona zvilo.
^ Kutani: “mu ta pepa mihefemulweni ya n’wina”.
^ Ku wuliwa nchumu wu tiriselwako ku pinga hi wona zvilo.
