Matewu 12:1-50
-
Jesu i “Hosi ya sabhadho” (1-8)
-
Jesu a hanyisa wanuna wa canja go limala (9-14)
-
Nandza legi Nungungulu a gi randzako (15-21)
-
A hlongola madhimoni hi moya wo basa (22-30)
-
Ciwonho co kala ci nga tsetselelwi (31, 32)
-
A sinya yi tiviwa hi mihandzu ya yona (33-37)
-
Ciwoniso ca Jona (38-42)
-
Loku a moya wo biha wu tlhela (43-45)
-
A mamani wa Jesu ni vamakabye vakwe (46-50)
12 Ka khati go kari, Jesu na a hundza hi lomu masin’wini ya trigo hi sabhadho, a vapizani vakwe va nozwa ndlala va sangula ku hulula trigo vaga.
2 A cikhati leci a vaFarisi va nga wona lezvo, va te ngalo kakwe: “A vapizani va wena va maha zvilo zvi nga faneliko ku mahiwa hi sabhadho.”
3 Yena aku kabye: “A mu gondzangi lezvi Dhavhidha a nga maha a cikhati leci yena ni vavanuna vakwe va ngazwa ndlala ke?
4 A mu zvi tivi ku i nghenile ndlwini ya Nungungulu aga tipawa ta munyikelo ni lava a nga hi navo, kasi lezvo ne mun’we wabye i wa nga faneli kuga, ntsena vapristi ke?
5 Kona a mu gondzangi Nayweni lezvaku a vapristi va simama ku tira lomu tempeleni hi sabhadho, hambulezvo a va nyikiwi nandzu ke?
6 Kanilezvi ndza mu byela, ndziku: Kwalaha i kona wa hombe ku hundza tempeli.
7 Loku mu wa zvi zwisisile lezvaku zvi wula yini ku: ‘Ndzi randza wuxinji, a ndzi randzi miphahlo’, na mu nga konangi vanhu lava vo kala nandzu.
8 Hakuva a N’wana wa munhu i Hosi ya sabhadho.”
9 I no suka hi laho, a nghena sinagogeni gabye,
10 a kuma wanuna wa canja go limala! Makunu na va lava co mu phasa hi cona va no mu wutisa lezvi: “Zva fanela ku hanyisa hi sabhadho ke?”
11 Yena aku kabye: “Loku a munhu a hi ni yivhu yin’we, makunu a yivhu leyo yi wela kheleni hi sabhadho, i kona cikari ka n’wina a to kala a nga yi humesi ke?
12 Kasi a munhu a hi wa lisima nguvhu ku hundza yivhu ke? Hikwalaho zva fanela ku maha zvilo zva zvi nene hi sabhadho.”
13 I no byela wanuna loye, aku: “Tshambuluta canja ga wena.” I no gi tshambuluta gi tlhela gi hanya a ku fana ni legi gin’wani.
14 Kanilezvi a vaFarisi va no huma va ya xuxa cikungo ca ku mu daya.
15 Loku Jesu a zvi tivile, i no suka a famba, a landziwa hi vanhu vo tala, a va hanyisa vontlhe.
16 Kanilezvi i no va laya nguvhu lezvaku va nga mu tivekisi,
17 kasi ku tatiseka lezvi zvi wulilweko hi muphrofeti Isaya, zvaku:
18 “Wonani a nandza ga mina legi ndzi gi hlawulileko, ndzi gi randzako, legi ndzi* xalalako hi gona! Ndzi ta chulula a moya wa mina hehla kakwe; i ta tlhamusela vamatiko a ku cini kululama ka Nungungulu.
19 A nga ta phikizana ni munhu, ne hambu ku banguleka. A nga kona a tozwa gezu gakwe lomu maruweni ya hombe.
20 A ku na lihlanga li khinyekileko a to li tshova, ne a nga ta tima kandiya yi tuvikako,* kala a tisa kululama.
21 Kunene, a matiko ma ta veka kutsumba ka wona vitweni gakwe.”
22 Andzhako ka lezvo, va no mu nehela a wanuna wa cikhumu, wo kala ku wulawula, a nga hi ni dhimoni. Jesu i no mu hanyisa, hikwalaho a wanuna loye i no sangula ku wulawula a tlhela a wona.
23 A citshungu contlhe ci no hlamala, ciku: “A hi yena loyi N’wana wa Dhavhidha ke?”
24 A cikhati leci a vaFarisi va ngazwa lezvo, va te ngalo: “Inaloyi, i hlongola madhimoni hi ntamu wa Bhelzebhubha,* a hosi ya madhimoni.”
25 Na a tiva maalakanyo yabye, i te ngalo kabye: “Ni wihi mufumo wu ti pandzako wu ti vhukela wu ta hangalaka. Ni gihi dhoropa kutani muti wu ti pandzako wu ti vhukela wu nga ta pindzuka.
26 Hikwalaho, loku Sathani a hlongola Sathani o ti pandza a ti vhukela ha yece; makunu a mufumo wakwe wu ta tiyisa kuyini ke?
27 Loku mina ndzi hlongola a madhimoni hi ntamu wa Bhelzebhubha, a vana* va n’wina ke, va ma hlongola hi ntamu wa mani? Hi kota ya lezvo, vona va ta mu lamula.
28 Kanilezvi, loku ndzi hlongola madhimoni hi ntamu wa Nungungulu, a Mufumo wa Nungungulu wu cikari ka n’wina kanilezvi a mu wu woni.
29 Kona a munhu a nga dhumelisa kuyini a yindlu ya wanuna wa ntamu a phanga zvilo zvakwe na a nga rangangi hi ku mu bohelela ke? Loku a mu bohelele hi kona a to zvi kota ku phanga a yindlu yakwe.
30 Ni wihi a nga hiko tlhelweni ga mina wa ndzi vhukela, ni loyi a nga hlengeletiko na mina wa hangalasa.
31 “Hikwalaho ndza mu byela, ndziku: Ni cihi ciwonho hambu ciruko ci wuliwako hi munhu ci ta tsetselelwa, kanilezvi loyi a rukatelako moya wo basa a nga ta tsetselelwa.
32 Hi cikombiso, ni wihi a wulawulako kubiha hi N’wana wa munhu i ta tsetselelwa; kanilezvi loyi a rukatelako a moya wo basa a nga ta tsetselelwa, ne ka tiko legi,* ne hambu ka legi gi tako.
33 “Loku mu rimela sinya ya yi nene, yi ta pswala mihandzu ya yi nene. Loku mu rimela sinya yi nga hiko yi nene, yi ta pswala mihandzu yi nga hiko yi nene. Hakuva a sinya yi tiviwa hi mihandzu ya yona.
34 Vana va tinyoka, mu nga wulawulisa kuyini zvilo zva zvi nene kuveni mu bihile ke? Hakuva a nomu wu wulawula lezvi zvi teleko mbilwini.
35 A munhu wa mu nene i humesa zvilo zva zvi nene tshombeni yakwe ya yi nene, kuveni a munhu wa kubiha i humesa zvilo zva kubiha tshombeni yakwe ya kubiha.
36 Ndza mu byela ndziku: A vanhu va ta ti hlamulela Sikwini ga Kulamula hi kota ya timhaka tontlhe ta hava leti va wulawulako.
37 Hakuva hi magezu ya n’wina mu ta wuliwa vakululama, hi magezu ya n’wina kambe mu ta koneka.”
38 A vatsali vo kari ni vaFarisi va no mu hlamula, vaku: “Mugondzisi, hi kombe ciwoniso.”
39 Jesu i no va hlamula, aku: “N’wina cizukulwana co biha ci nga tsumbekiko ka Nungungulu,* mu kho ni ku lava ku kombiwa ciwoniso, kanilezvi a ku na ciwoniso mu to kombiwa loku ku nga hi leci ca muphrofeti Jona.
40 Hakuva khwatsi hi lezvi Jona a nga tshama masiku manharu* lomu ndzeni ka njhanjhi ya hombe, a N’wana wa munhu yenawu i ta tshama masiku manharu lomu hasi ka misava.
41 A vanhu va le Ninivha va ta vhuxiwa kulamulweni ni cizukulwana leci, va ci kona, hakuva vona va ti solile hi kuzwa lezvi Jona a nga chumayela. Kanilezvi, a nchumu wa hombe wo hundza Jona wu kwalaha.
42 A hosi ya cisati ya le dzongeni* yi ta vhuxiwa kulamulweni ni cizukulwana leci, yi ci kona, hakuva yi tile hi magemeta-musi ya misava kasi ku tazwa a wutlhari ga Solomoni. Kanilezvi, a nchumu wa hombe wo hundza Solomoni wu kwalaha.
43 “A cikhati leci a moya wo biha wu humako ka munhu, wu hundza hi lomu matshan’wini ma nga hiko na mati na wu lavetela wutshamu go humula kona, wu nga gi kumi,
44 wu gumesa wuku: ‘Ndza ha tlhela kaya ka mina lomu ndzi tako hi kona’. Loku wu chikela, wu kuma muti na wu swiyelilwe wu basa wu tlhela wu sasekiselwa, na wu nga hi na munhu.
45 Andzhako ka lezvo, wu suka wu famba wu ya teka yin’wani mimoya ya 7 yo biha nguvhu ku hundza wona wu wuya nayo. Loku yi nghenile, yi tshama laho. Makunu a munhu loye i biha nguvhu ku hundza lezvi a nga bihisile zvona kusanguleni. Hi zvalezvo zvi to maheka ka cizukulwana leci co biha.”
46 Na a ha wulawula ni citshungu, ku no chikela mamani wakwe ni vamakabye vakwe va nyima le handle na va lava ku wulawula naye.
47 Makunu a wokari i te ngalo ka Jesu: “A mamani wa wena ni vamakabye va wena va nyimile le handle, va lava ku wulawula na wena.”
48 Jesu a mu hlamula aku: “Kasi himani a mamani wa mina ni vamakabye va mina ke?”
49 I no nawuluta a woko a xungeta vapizani vakwe, aku: “A mamani wa mina ni vamakabye va mina hi lava!
50 Hakuva ni wihi loyi a mahako kurandza ka Papayi wa mina a nga tilweni, hi yena a nga makabye wa mina ni mamani wa mina.”
Mitlhamuselo ya lahasi
^ Kutani: “legi a muhefemulo wa mina wu”.
^ Hi kukongoma: “trisido yi tuvikako”.
^ I vito gin’wani ga Sathani.
^ Kutani: “vapizani”.
^ Kutani: “ka nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Hi kukongoma: “ca wubhayi”.
^ Hi kukongoma: “masiku manharu, wusiku ni mumu”.
^ Kutani: “sul”.
