Matewu 13:1-58
-
MIFANANISO YA MUFUMO (1-52)
-
A murimi (1-9)
-
Lezvi zvi nga maha Jesu a tirisa mifananiso (10-17)
-
A tlhamusela mufananiso wa murimi (18-23)
-
A trigo ni nyasavari (24-30)
-
A mbewu ya cinapi ni livrina (31-33)
-
A tirisa mifananiso, a tatisa zviphrofeto (34, 35)
-
A tlhamusela mufananiso wa trigo ni nyasavari (36-43)
-
Tshomba yi fihliweko, ni perola ga lisima (44-46)
-
A likoka (47-50)
-
Titshomba ta tiswa ni ta kale (51, 52)
-
-
Jesu a aliwa tikweni gakwe (53-58)
13 Ka siku lego, Jesu i no suka laha mutini a ya tshama mbhirini ya bimbi.
2 Ku nota kakwe a citshungu ca hombe, hikwalaho i no nghena ngalaveni a tshama, a citshungu contlhe ci yima mbhirini ya bimbi.
3 I no va byela zvilo zvo tala hi mifananiso, aku: “A murimi i no huma a ya xwanya timbewu.
4 A cikhati leci a nga kari a xwanya, a timbewu to kari ti no wela laha ndleleni ti se giwa hi zvinyanyani.
5 A tin’wani ti no wela maribyeni laha ku nga hi hava misava yo enela, ti tekela ku mila hakuva a misava yi wa nga etangi.
6 Kanilezvi laha ku nga huma gambo ti noswa, ti wuna hakuva ti wa nga hi na mitsu.
7 A tin’wani ti no wela cikari ka mimizwa, ni mimizwa yi no kula yi ti tlimba.
8 Ni tin’wani kambe ti no wela ka misava yo nona ti sangula ku pswala mihandzu: Leyi yi pswala hi ka 100, leyi yin’wani hi ka 60, ni yin’wani hi ka 30, a ku hundza lezvi zvi nga byalilwe.
9 Loyi a nga ni tindleve i wa ingise.”
10 Hikwalaho, a vapizani va nota kakwe, va taku: “Hikuyini u wulawulako navo hi mifananiso?”
11 I no va hlamula, aku: “N’wina mu nyikilwe ku zwisisa a zvihundla* zva Mufumo wa matilo, kanilezvi vona a va nyikwangi.
12 Hakuva ni wihi loyi a nga nazvo i ta nyikwa zvin’wani ava ni zvotala; kanilezvi loyi a nga hava nchumu, ni lezvi a nga nazvo i ta tekelwa.
13 Hi zvalezvo zvi ndzi mahako ndzi wulawula navo hi mifananiso; hakuva va cuwuka kanilezvi a va woni nchumu, va ingisela kanilezvi a vazwi nchumu, ne hambu ku zvi zwisisa.
14 A ciphrofeto ca Isaya ca tatiseka kabye. Ci ngalo: ‘A kuzwa mu ta zvizwa kanilezvi mu nga ta zvi zwisisa, a ku cuwuka mu ta cuwuka kanilezvi mu nga ta zvi wona.
15 Hakuva a timbilu ta vanhu lava ti tlanyele; hi tindleve tabye vazwa kanilezvi a va mahi nchumu; va tsimbile kasi va nga tshuki va wona ne ku ingisa hi tindleve tabye ne hambu ku zvi zwisisa hi timbilu tabye kasi va hundzuluka ndzi va hanyisa.’
16 “Kanilezvi ma katekile a matihlo ya n’wina hakuva ma wona, ni tindleve ta n’wina hakuva tazwa.
17 Hakuva ndza tiyisa ka n’wina ndziku: A vaphrofeti vo tala ni vanhu vo lulama va wa xuva ku wona lezvi n’wina mu zvi wonako kanilezvi a va zvi wonangi, ni kuzwa lezvi n’wina mu zvi zwako kanilezvi a va zvi zwangi.
18 “Makunu ingiselani a mufananiso wa murimi loyi a nga huma ku ya xwanya.
19 Laha a wokari a zwako a mhaka ya Mufumo kanilezvi a nga yi zwisisi, kuta loyi wa kubiha a ta wutla lezvi zvi nga byaliwa mbilwini yakwe. Leyi hi leyi yi weleko laha ndleleni.
20 Leyi yi nga wela maribyeni, hi loyi a zwako mhaka a tekela ku yi vhumela na a tsakile;
21 kanilezvi kota lezvi a mbewu yi nga kala ku zima mitsu mbilwini yakwe, yo hanya zva cikhatana. Loku a xanisiwa ni ku vhukelwa hi kota ya mhaka i tekela ku khunguvanyeka.
22 Leyi yi nga wela cikari ka mimizwa, hi loyi a zwako mhaka kanilezvi a kukaratekela a zvilo zva tiko* legi ni kunavela titshomba* zvi tlimba mhaka yi nga pswali mihandzu.
23 Leyi yi nga wela ka misava yo nona hi loyi a zwako mhaka a yi zwisisa, a tlhela a pswala mihandzu: Leyi yi pswala hi ka 100, leyi yin’wani hi ka 60, ni yin’wani hi ka 30, a ku hundza lezvi zvi nga byalilwe.”
24 I no va hlawutela mufananiso wun’wani, aku: “A Mufumo wa matilo wu nga fananiswa ni munhu a nga byala a mbewu yi nene sin’wini gakwe.
25 Na vanhu va etlele, ku nota nala wakwe a ta byalawu nyasavari cikari ka trigo a guma a ti fambela.
26 Laha a tihlanga ti nga rumbuka ti sangula ku chela, ku no woneka ni nyasavari.
27 Makunu a zvitiri zvi nota ka n’winyi wa simu zvi ta mu wutisa, zviku: ‘Hosi, kasi a wu byalangi mbewu yi nene ntsena lomu sin’wini ga wena? Makunu ita hi kwihi a nyasavari?’
28 I no zvi hlamula, aku: ‘I nala a nga maha lezvi.’ A zvitiri zviku kakwe: ‘U lava ku hi ya wu tsuwulela hi wu hlengeletela ke?’
29 Yena aku: ‘Ahihi, ndza chava ku laha mu tsuwulelako a nyasavari mu tsuwula ni trigo kambe.
30 Zvi tsikeni zvi kula zvin’we kala kutshoveleni. Cikhatini ca kutshovela ndzi ta byela vatshoveli, ndziku: A kusangula hlengeletani nyasavari mu mu boha hi tinyandza kasi a hisiwa; mu gumesa mu hlengeleta trigo matshaleni ya mina.’”
31 I no va hlawutela mufananiso wun’wani, aku: “A Mufumo wa matilo wu fana ni mbewu ya cinapi* leyi a munhu a nga yi teka a yi byala sin’wini gakwe.
32 Kunene, hi yona mbewu ya yitsongwani ka tontlhe, kanilezvi yi kula yi hundza makhuho wontlhe yi maha sinya, ni zvinyanyani zva tilo zvita zvi ta zumba ka madhavi* ya yona.”
33 I no va hlawutela wun’wani mufananiso, aku: “A Mufumo wa matilo wu fana ni livrina leyi a wasati a nga yi teka a yi vhuva ni 10 kilo ya mapa kala a mapa wontlhe ma kukumuka.”
34 Jesu i no wulawula zvilo zvontlhe lezvi ka citshungu hi mifananiso. Kunene, a ku na nchumu a nga va byela na a nga tirisi mufananiso,
35 kasi ku tatisa lezvi zvi nga wulilwe hi muphrofeti, loyi a ngaku: “Ndzi ta vhulula a nomu wa mina hi mifananiso, ndzi hlawutela lezvi zvi fihlilweko kusukela kusanguleni.”*
36 Makunu andzhako ka ku hambana ni citshungu, i no nghena mutini. A vapizani va nota kakwe, va taku: “Hi tlhamusele a mufananiso wa nyasavari lomu sin’wini.”
37 I no va hlamula, aku: “A mubyali wa mbewu yi nene i N’wana wa munhu;
38 a simu i tiko. A mbewu yi nene i vana va Mufumo, kanilezvi a nyasavari i vana va loyi wa kubiha.
39 A nala loyi a nga ta byala nyasavari hi Sathani.* A kutshovela kugumesa ka tiko,* a vatshoveli tingilozi.
40 Hikwalaho, khwatsi hi lezvi a nyasavari a hlengeletwako a tlhela a hisiwa hi ndzilo, zvi ta mahisa lezvo kugumeseni ka tiko.*
41 A N’wana wa munhu i ta rumela tingilozi takwe ti ta hlengeleta zvontlhe lezvi zvi khunguvanyisako ni vanhu lava va mahako zvakubiha ti va humesa Mufun’weni wakwe,
42 ti va hoxa ndzilweni. Kwaseyo va ta rila va getsela* matino.
43 Cikhatini leco a vakululama va ta woninga a ku fana ni gambo Mufun’weni wa Papayi wabye. Loyi a nga ni tindleve i wa ingise.
44 “A Mufumo wa matilo wu fana ni tshomba yi fihlilweko lomu sin’wini, leyi a munhu a nga yi kuma a yi fihla. Hi kota ya kutsaka i noya a ya xavisa zvontlhe a nga nazvo, a xava a simu lego.
45 “A Mufumo wa matilo wu fana kambe ni muxavisi a fambafambako, a lavetela maperola* ya lisima.
46 A cikhati leci a nga kuma perola* gin’we ga lisima nguvhu, i no famba a ya tekela ku xavisa zvontlhe a nga hi nazvo, a gi xava.
47 “A Mufumo wa matilo wu fana kambe ni likoka* li petilweko bimbini li kukuta tinjhanjhi ta tixaka tontlhe.
48 A cikhati leci li nga tala, va no li kokela handle, va ta tshama hasi va sangula ku hlawulela leti ta ti nene va ti chela zvibyeni, kanilezvi leti ti nga vhuniko nchumu va no hoxa.
49 Zvi ta mahisa lezvo kugumeseni ka tiko.* A tingilozi ti ta huma ti ya hambanisa vakubiha cikari ka vakululama
50 ti va hoxa ndzilweni. Kwaseyo va ta rila va getsela* matino.
51 “Mu zvi zwisisile zvontlhe lezvi ke?” Vaku kakwe: “Ina.”
52 Aku kabye: “Loku zvi hi tano, ni wihi mugondzisi loyi a gondzisilweko hi Mufumo wa matilo i fana ni n’winyi wa muti a humesako ndlwini yakwe a titshomba ta tiswa ni ta kale.”
53 Laha Jesu a nga mbheta ku va hlawutela mifananiso leyi, i no suka laho.
54 Loku a chikele tikweni gakwe, i no sangula ku va gondzisa lomu sinagogeni gabye, hikwalaho va no hlamala nguvhu, vaku: “Kasi inaloyi i gi kumile kwihi a wutlhari legi ni ntamu wa ku maha zvihlamaliso?
55 A hi yena loyi a n’wana wa muvatli? A hi yena loyi n’wana wa Mariya? A hi yena makabye wa Jakobe, na Josefa, na Simoni, na Judhasi?
56 A vamakabye vakwe va cisati a hi vona lava hi hanyako navo ke? Makunu i zvi kuma kwihi zvontlhe lezvi?”
57 Hikwalaho va no khunguvanyeka hi yena. Kanilezvi Jesu i te ngalo kabye: “A muphrofeti wa dzundziwa ni kwihi a yako, kanilezvi a nga dzundziwi tikweni gakwe ni mutini wakwe.”
58 Hikwalaho a nga mahangi zvihlamaliso zvo tala laho hi kota ya kungakholwi kabye.
Mitlhamuselo ya lahasi
^ Kutani: “zvihundla zvo basa”.
^ Wona Tlhamuselo wa magezu ya Bhibhiliya.
^ Kutani: “kukhohlisa ka titshomba”.
^ I mbewu ya yitsongwani nguvhu yi kumekako Palestina. Yi nga kula yiza yi chikela ka 4 wa timetro, lezvo na yi hi ni madhavi.
^ Kutani: “madzavi”.
^ Zvi nga ha wula ku: “kusukela kusanguleni ka tiko”.
^ Hi ciGreki: di·á·bo·los, zvi wulako ku “mulumbeti”.
^ Kutani: “nguva”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “nguva”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “lotela”.
^ Kutani: “mufazi”.
^ Kutani: “mufazi”.
^ Kutani: “juya”.
^ Kutani: “nguva”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “lotela”.
