Matewu 14:1-36
14 Hi cikhati leco, Herodhi,* a adhimistradhori wa dhistrito, i nozwa lezvi Jesu a nga kari a maha,
2 aku ngalo ka malandza yakwe: “Loyi hi Johani Mubhabhatisi, a nga vhuxiwa hi ka vafileko, hi zvona zvi mu nyikako ntamu wa ku maha zvihlamaliso lezvi.”
3 Herodhi i wa khomile Johani a mu boha, a mu vhalela paxweni hi kota ya Herodhiya, a sati wa Filipu a makabye wakwe.*
4 Hakuva Johani i wa tala ku mu byela ku: “A zvi faneli ku u teka Herodhiya ava sati wa wena.”
5 Kanilezvi, hambu lezvi Herodhi a nga lava ku mu daya, i wa chava citshungu hakuva ci wa ku Johani muphrofeti.
6 Kanilezvi a cikhati leci va nga maha festa ya ku tlhanganisa malembe ya kupswaliwa ka Herodhi, a nhanyana wa Herodhiya i no kina ka festa leyo. Herodhi i no tsaka nguvhu
7 laha ka kuza a hlambanya lezvaku i ta mu nyika ni cihi a to ci kombela.
8 Makunu na a kucetelwa hi mamani wakwe, i te ngalo: “Ndzi nyike a hloko ya Johani Mubhabhatisi lomu ka bhandeja.”
9 Hambu lezvi a hosi yi nga karateka hi kota ya lezvo, yi no laya lezvaku a nyikiwa a hloko leyo hi lezvi a nga hlambanyile ni hi kota ya lava a ngaga zvin’we navo.*
10 Hikwalaho i no rumela mhaka paxweni lezvaku ku tsemiwa hloko ya Johani.
11 Va nota ni hloko lomu ka bhandeja va ta nyika nhanyana, a se famba nayo ka mamani wakwe.
12 Andzhako ka cikhati, a vapizani va Johani va no ta teka cirumbi cakwe va ya lahla; va gumesa vata ka Jesu va ta mu byela lezvi zvi nga humelela.
13 Laha Jesu a ngazwa lezvo, i no suka laho hi ngalava aya ka wutshamu ga ciwula kasi a ya ti tshamela yece. Kanilezvi laha a citshungu ci nga zvi tiva, ci no mu landza hi minenge na cita hi lomu madhoropeni.
14 Loku Jesu a humile hi lomu ngalaveni, i no wona citshungu ca hombe a ci zwela wusiwana, a hanyisa lava va nga babya.
15 Kanilezvi laha gi nga kari gi pela, a vapizani vakwe va nota kakwe va taku: “A wutshamu legi ciwula niku makunu gi phumile; chusa citshungu ci famba, kasi ciya zvidhoropaneni ci ya ti xavela zvakuga.”
16 Kanilezvi Jesu i te ngalo kabye: “Va nga fambi; va nyikeni zvakuga n’wina.”
17 Vaku kakwe: “A hi na nchumu, hova ni ntlhanu wa tipawa ni tinjhanjhi timbiri basi.”
18 Yena aku: “Tanani nazvo seno ka mina.”
19 Makunu i no byela citshungu lezvaku ci tshama byanyini. Hi kulandzela i no teka a ntlhanu wa tipawa ni tinjhanjhi timbiri a cuwuka tilweni a zvi katekisa. Andzhako ka loku a khemile tipawa i no nyika vapizani vakwe, a vapizani va avela citshungu.
20 Hikwalaho vontlhe va noga va xura va guma va hlengeletela a zvikhemu lezvi zvi nga sele va tata a 12 wa zvindzala.*
21 Lava va ngaga va wa hi 5000 wa vavanuna, na ku nga hlayiwi a vavasati ni vanana.
22 Zvalezvo i no byela vapizani vakwe lezvaku va nghena ngalaveni va ranga vaya tlhelweni legi gin’wani ga bimbi, yena na a ha salisana ni citshungu.
23 Andzhako ka ku hambana ni citshungu, i noya citsungeni a ya khongela na a hi yece. A wusiku gi noza gi tiyela na a ha hi kwaseyo.
24 Hi leco cikhati, a ngalava yi wa hi cikari ka bimbi na yi biwa hi mavingo,* hakuva a moya wu waba wuya ko hambana ni lomu va ngaya kona.
25 Kanilezvi na giya kuceni,* Jesu i nota kabye na a famba hehla ka bimbi.
26 Laha a vapizani va nga mu wona na a famba hehla ka bimbi, va no dzuka, vaku: “A cigono!” vaba huwa hi kuchava.
27 Kanilezvi Jesu i no tekela ku va angula, aku: “Tiyani hlana! Mu nga chavi, hi mina.”
28 Pedro i no mu hlamula, aku: “Hosi, loku ku hi wena, ndzi vitane ndzita ka wena hi hehla ka mati.”
29 Jesu aku kakwe: “Tana!” Hikwalaho Pedro i no huma lomu ngalaveni a famba hehla ka mati aya kakwe.
30 Kanilezvi a cikhati leci a nga cuwuka a wona lezvaku a moya wa hombe i no chava. Laha a nga sangula ku mbombomela i noba huwa, aku: “Hosi, ndzi ponise!”
31 Jesu i no tekela ku nawuluta woko gakwe a mu khoma, aku: “Wena wa kukholwa kutsongwani, hikuyini u kanakanako ke?”
32 Loku va nghenile ngalaveni, a moya wu no nyima.
33 Lava va nga hi lomu ngalaveni va no mu khizamela, vaku: “Hakunene u N’wana wa Nungungulu.”
34 Va no tsemakanya bimbi va chikela Genezareta.
35 Laha a vanhu va wutshamu lego va nga pola ku hi yena, va no rumela gezu ka man’wani matshamu ya laha kusuhani. Makunu a vanhu va nota ni vontlhe lava va nga babya.
36 Va no mu khongotela, va kombela ku henya machakafula ya nguwo yakwe basi. Vontlhe lava va nga ma henya va no hanya.
Mitlhamuselo ya lahasi
^ Ku nga Herodhi Antipasi. Wona Tlhamuselo wa magezu ya Bhibhiliya.
^ Kutani: “a makabye wa Herodhi”.
^ Kutani: “a nga tshamile zvin’we navo mezeni”.
^ Kutani: “zvirundzu”.
^ Kutani: “mabyandlati; mavimbi”.
^ Kwalomu ka 3 hora kala 6 hora ya kuca.
