Matewu 15:1-39
15 A vaFarisi ni vatsali va ngata hi Jerusalema va noya ka Jesu va yaku:
2 “Hikuyini a vapizani va wena va hambunyetako a zvihena zva vakale? Hakuva a va hlambi* mandla loku va lava kuga.”
3 I no va hlamula, aku: “Hikuyini n’winawu mu hambunyetako a nayo wa Nungungulu hi kota ya zvihena zva n’wina?
4 Hakuva Nungungulu i te ngalo: ‘Kombisa cichavo ka papayi wa wena ni ka mamani wa wena’, niku ‘Ni wihi loyi a wulawulako zvahava hi* papayi wakwe kutani mamani wakwe i wa dawe’.
5 Kanilezvi n’wina mu ngalo: ‘Ni wihi loyi a byelako papayi wakwe kutani mamani wakwe, aku: “Ni cihi leci ndzi nga naco ndzi nga lava ku ku vhuna hi cona ndzi ci nyikele ka Nungungulu”,
6 a zva ha faneli ku a kombisa cichavo ka papayi wakwe kutani mamani wakwe.’ Hikwalaho mu chipisile a mhaka ya Nungungulu hi zvihena zva n’wina.
7 Vakanganyisi ndzin’wina, Isaya i wa wula n’wina a cikhati leci a nga phrofeta, aku:
8 ‘A vanhu lava va ndzi dzundza hi minomu yabye ntsena, kanilezvi a timbilu tabye ti kule nguvhu na mina.
9 Va ndzi khozela mahala, hakuva lezvi va zvi gondzisako tigondzo ta vanhu.’”
10 I no vitana citshungu aku ka cona: “Zwanani mu tlhela mu zvi zwisisa:
11 Lezvi zvi bihisako munhu a hi lezvi zvi nghenako non’wini wakwe, kanilezvi lezvi zvi humako hi non’wini wakwe hi zvona zvi mu bihisako.”
12 Makunu a vapizani va nota kakwe va taku: “Wa zvi tiva ku a vaFarisi va khunguvanyekile hi kuzwa lezvi u nga wula?”
13 I no va hlamula, aku: “Ni yihi sinya yi nga kala ku byaliwa hi Papayi wa mina wa le tilweni yi ta tsuwuliwa.
14 Va tsikeni. Va komba van’wani ndlela kuveni vona zvikhumu. Makunu loku a cikhumu ci rangela cikhumu hi wumbiri ga zvona zvi ta wela kheleni.”
15 Pedro aku ngalo kakwe: “Hi tlhamusele a mufananiso lowu.”
16 Jesu aku ngalo: “Kasi n’winawu a mu se zvi zwisisa?
17 A mu zvi tivi ku ni cihi ci nghenako non’wini ci hundza hi lomu khwirini ci gumesa ciya cikoti?
18 Kanilezvi, ni cihi leci ci humako hi lomu non’wini cita hi mbilwini. A zvilo lezvo hi zvona zvi bihisako munhu.
19 Hi lomu mbilwini ku huma maalakanyo ya kubiha, ni kudaya, ni wubhayi,* ni kuyiva, ni kuhemba ni kurukatela.
20 Lezvi hi zvona zvi bihisako munhu, kanilezvi a kuga na u nga hlambangi* mandla a zvi bihisi munhu.”
21 Jesu i no suka hi laho aya Tire ni Sidhoni.
22 Makunu ku nota wasati wa muFenikiya* hi tikweni lego a ta mu rilela, aku: “Hosi, N’wana Dhavhidha, ndzi mahele wuxinji. A nhanyana wa mina i na ni dhimoni gi mu xanisako nguvhu.”
23 Kanilezvi Jesu a nga mu hlamulangi. Hikwalaho a vapizani vakwe va no ta mu khongotela, vaku: “Mu byele a famba hakuva wa hi kulumela.”
24 I no hlamula, aku: “A ndzi rumelwangi ka vanhu vontlhe, kanilezvi ndzi rumelwe ntsena ka tiyivhu ti lahlekileko ta yindlu ya ka Izrayeli.”
25 Kanilezvi a wasati i no ta mu khizamela, aku: “Hosi, ndzi vhune!”
26 I no mu hlamula, aku: “A zvi ringani ku teka zvakuga zva vanana u nyika zvimbyanana.”
27 A wasati aku ngalo: “Hi zvona Hosi, kanilezvi a zvimbyanana zva rolela matlhatlha lawa ma wako hi laha mezeni ya venyi va zvona.”
28 Jesu aku kakwe: “A kukholwa ka wena ka hombe; a zvi maheke ka wena lezvi u zvi kombelako.” Zvalezvo a nhanyana wakwe i no hanya.
29 Jesu i no suka laho aya kusuhani ni Bimbi ga Galileya; i no kandziha citsungeni a tshama.
30 Ku nota kakwe a citshungu ca hombe ci ngata ni zvilima, ni zvigulani, ni zvikhumu, ni lava vo kala ku wulawula ni van’wani vo tala, va ta va veka mikondzweni yakwe, a va hanyisa.
31 Hikwalaho a citshungu ci no tsaka nguvhu hi ku wona lava va nga kala va nga wulawuli na va wulawula, a zvigulani na zvi hanyiswa, a zvilima na zvi famba, ni zvikhumu na zvi wona, va dhumisa Nungungulu wa Izrayeli.
32 Jesu i no vitana vapizani vakwe aku kabye: “A citshungu leci ndza ci zwela wusiwana hakuva va tshamile masiku manharu na mina, niku a va ha hi na zvakuga. A ndzi zvi lavi ku va tlhelisa ni ndlala* hakuva va nga famba va sika hi ndlela.”
33 Kanilezvi a vapizani va te ngalo kakwe: “Hi ta ti kuma kwihi tipawa lomu ciwuleni hi nga kona ti ringanako ku xurisa a citshungu co kota leci?”
34 Jesu aku ngalo kabye: “Tipawa tingani mu nga nato?” Vaku: “I 7 ni zvinjhanjhana zvi tsongwani basi.”
35 Hikwalaho andzhako ka ku byela citshungu lezvaku ci tshama lahasi,
36 i no teka a 7 wa tipawa ni tinjhanjhi a khongela. Loku a khemile i no nyika vapizani, a vapizani va avela citshungu.
37 Vontlhe va noga va xura, va hlengeletela a zvikhemu lezvi zvi nga sele va tata 7 wa zvindzala* zva hombe.
38 Lava va ngaga va wa hi 4000 wa vavanuna, na ku nga hlayiwi a vavasati ni vanana.
39 Andzhako ka ku salisana ni citshungu, Jesu i no nghena ngalaveni aya tlhelweni ga Magadhani.
Mitlhamuselo ya lahasi
^ Ku nga ku ti basisa hi kuya hi nayo.
^ Kutani: “a rukatelako”.
^ Hi ciGreki: porneía. Wona Tlhamuselo wa magezu ya Bhibhiliya.
^ Ku nga ku kala ku ti basisa hi kuya hi nayo.
^ Kutani: “muKhanani”.
^ Kutani: “na va nga gangi nchumu”.
^ Kutani: “zvirundzu”.
