Matewu 2:1-23
2 Andzhako ka loku Jesu a pswalilwe le Bhetlehema wa Judhiya masikwini ya hosi Herodhi,* a vahlahluvi va tirisako tinyeleti va le Mutsuwuka-gambo va nota Jerusalema,
2 va taku: “I kwihi a n’wanana loyi a tova hosi ya vaJudha? Hakuva hi wonile a nyeleti yakwe a cikhati leci hi nga ha hi Mutsuwuka-gambo, makunu hi tele ku ta mu khizamela.”
3 Laha hosi Herodhi a ngazwa lezvo, i no karateka nguvhu zvin’we ni vanhu vontlhe va Jerusalema.
4 Hikwalaho i no tlhanganisa vapristi vontlhe lava va tihosana ni vatsali, a va wutisa lomu Kristu* a nga wa ta pswalelwa kona.
5 Vona vaku kakwe: “I ta pswalelwa Bhetlehema wa Judhiya, hakuva a muphrofeti i tsalile ha yena, aku:
6 ‘Wena Bhetlehema wa tiko ga Judha, a wu dhoropa ga gitsongwani nguvhu cikari ka vagovhernadhori va Judha. Hakuva ku ta huma hi ka wena loyi a to risa a vanhu va mina, a va ka Izrayeli.’”
7 Herodhi i no vitanisa a vahlahluvi va tirisako tinyeleti a va wutisa cihundleni a ku hi rini khwatsi-khwatsi va nga wona nyeleti leyo.
8 A cikhati leci a nga va ruma kuya Bhetlehema i te ngalo kabye: “Fambani mu ya lavetela khwatsi a n’wanana loye, loku mu mu kumile wuyani mu ta ndzi byela kasi minawu ndzi ya mu khizamela.”
9 Loku va mu zwile, va no khoma ndlela. A nyeleti leyi va nga yi wonile na va ha hi Mutsuwuka-gambo yi no ranga mahlweni kabye kala yi ya nyima laha hehla ka muti lowu a n’wanana a nga hi ka wona.
10 A cikhati va nga wona lezvaku a nyeleti yi nyimile, va no tsaka nguvhu.
11 Laha va nga nghena lomu ndlwini, va no wona a n’wanana na Mariya a mamani wakwe, va mu khizamela.* Va no vhulula tipasta tabye va humesa a ouro, ni hlakati yo nuhela, ni mira va nyika n’wanana.
12 Kanilezvi, kota lezvi va nga tlharihisilwe hi Nungungulu norweni lezvaku va nga ha tlheli ka Herodhi, va no tlhela tikweni gabye hi yin’wani ndlela.
13 Loku va fambile, a ngilozi ya Jehovha yi no woneka ka Josefa lomu norweni, yiku: “Suka, u teka n’wanana ni mamani wakwe mu tsutsuma muya Gibhite. Tshamani seyo kala ndzi mu byela cokari, hakuva Herodhi i ta hlota n’wanana kasi ku mu daya.”
14 Hikwalaho Josefa i no suka ni wusiku a teka n’wanana ni mamani wa kona vaya Gibhite.
15 I no tshama seyo kala Herodhi afa. Lezvo zvi no tatisa lezvi zvi nga wulilwe hi Jehovha hi nomu wa muphrofeti wakwe, aku: “Ndzi no vitana n’wana wa mina hi le Gibhite.”
16 Laha Herodhi a nga wona lezvaku a vahlahluvi va tirisako tinyeleti va mu kanganyisile, i no zangara nguvhu a laya lezvaku ku dawa a zvifanyana zvontlhe zva lomu Bhetlehema ni matshamu ya lomu kusuhani zvi nga hi ni malembe mambiri kuya hasi, na a pima hi cikhati leci a nga byelilwe hi vahlahluvi va tirisako tinyeleti.
17 Makunu ku no tatiseka lezvi zvi nga wulilwe hi muphrofeti Jeremiya, aku:
18 “Ku zwele gezu ga kurila ni huwa ya hombe le Rama. Hi Rakeli a nga rilela vana vakwe. I wa nga vhumeli ku chavelelwa hakuva va delwe.”
19 Laha Herodhi a ngafa, a ngilozi ya Jehovha yi no woneka ka Josefa lomu norweni le Gibhite,
20 yiku: “Suka u teka n’wanana ni mamani wakwe, muya tikweni ga Izrayeli hakuva lava va nga hlota a wutomi ga n’wanana va file.”
21 Hikwalaho, i no suka a teka n’wanana ni mamani wakwe vaya tikweni ga Izrayeli.
22 Kanilezvi laha a ngazwa lezvaku Arkelawu hi yena a nga kari a fuma le Judhiya cikhundleni ca papayi wakwe Herodhi, i no chava kuya seyo. Makunu laha a nga nyikwa citlharihiso hi Nungungulu norweni, i noya tikweni ga Galileya.
23 I no ya tshama dhoropeni gi vitaniwako ku Nazareta, kasi ku tatiseka lezvi zvi nga wulilwe hi vaphrofeti, vaku: “I ta vitaniwa ku muNazareta.”*
Mitlhamuselo ya lahasi
^ Wona Tlhamuselo wa magezu ya Bhibhiliya.
^ Kutani: “Mesiya; a Totilweko”.
^ Kutani: “va khizamela n’wanana”.
^ Ko khwatsi gita hi ka gezu ga ciHebheru ga ku “hluke”.
