Matewu 22:1-46
22 Jesu i no wulawula kambe kabye hi mifananiso, aku:
2 “A Mufumo wa matilo wu nga fananiswa ni hosi yi nga mahela n’wana wa yona a festa ya muchadho.
3 Yi no ruma malandza ya yona lezvaku ma ya vitana lava va rambilweko festeni, kanilezvi va no ala kuta.
4 Yi no ruma kambe man’wani malandza, yiku: ‘Byelani lava va rambilweko, muku: “Ndzi longisele zvakuga. Ndzi dele tihomu ni zvifuyo zvo nona; zvontlhe zvi longile. Tanani festeni ya muchadho.”’
5 Kanilezvi a va khatalangi hi zvona; va no ti fambela. A mun’we aya masin’wini yakwe, a mun’wani a ti yela mabhindzwini yakwe;
6 ni lava van’wani va no khoma malandza ya hosi va ma xanisa, va gumesa va ma daya.
7 “A hosi yi no zangara nguvhu, yi rumela masochwa ya yona ma ya daya vadayi lavo, ma tlhela ma hisa dhoropa gabye.
8 Andzhako ka lezvo yi no byela malandza, yiku: ‘A festa ya muchadho yi longile, kanilezvi lava va rambilweko a va faneli.
9 Hikwalaho, fambani maruweni mu ya ramba ni wihi mu to mu kuma lezvaku ata festeni ya muchadho.’
10 A malandza lawo ma noya maruweni ma ya ramba vontlhe lava ma nga va kuma, a vakubiha ni va va nene. Hikwalaho, a yindlu ya muchadho yi no tala hi lava va nga kari vaga.*
11 “A cikhati leci a hosi yi ngata yi ta hlola vapfhumba, yi no wona a wanuna a nga bohile tinguwo to kala ti nga ringani kuta hi tona muchadhweni.
12 Hikwalaho, yi no mu byela lezvi: ‘Munghana, u nghenisile kuyini laha na u nga bohangi a tinguwo ti ringanako kuta hi tona muchadhweni?’ A wanuna loye i no vhumala ni co wula.
13 A hosi yi no byela malandza ya yona yiku: ‘Mu boheni mawoko ni minenge mu mu hoxa le handle munyameni. Kwaseyo i ta rila a getsela* matino.’
14 “Hakuva va tele va rambilweko, kanilezvi va tsongwani va hlawulilweko.”
15 A vaFarisi va noya va ya xuxa cikungo ca ku mu phasa kuwulawuleni kakwe.
16 Hikwalaho va no rumela vapizani vabye zvin’we ni valandzeli va Herodhi, va yaku: “Mugondzisi, ha zvi tiva lezvaku u wulawula lisine niku u gondzisa a ndlela ya Nungungulu hi lisine, ni lezvaku a wu lavi ku dzundziwa hi munhu, hakuva a wuyi hi nghohe ya munhu.
17 Makunu hi nga hi byela, u alakanya yini hi mhaka leyi: Zva fanela* ku humesa khupo ka Khezari kutani a zvi faneli?”
18 Kanilezvi Jesu na a tiva a kubiha kabye, i te ngalo: “Vakanganyisi ndzin’wina, mu ndzi ringela yini?
19 Ndzi kombeni a mali ya kona.” Va no mu tela ni dhenaryo.*
20 Aku kabye: “A mufananiso lowu ni mutsalo wa kona zva mani?”
21 Vaku: “Zva Khezari.” Jesu aku kabye: “Tlhelisani ka Khezari lezvi zvi nga zva Khezari, ni ka Nungungulu lezvi zvi nga zva Nungungulu.”
22 A cikhati va ngazwa lezvo, va no hlamala nguvhu, va mu tsika va famba.
23 Ka siku galego, a vaSadhusi, lava va nge a vafileko va nga ta vhuka, va nota va ta mu wutisa, vaku:
24 “Mugondzisi, Mosi i te ngalo: ‘Loku a wanuna afa na a nga hi na vana, a makabye wakwe i ta hlambela* sati wa matsuva kasi a mu pswalela vana a makabye wakwe.’
25 Makunu ku wa hi ni 7 wa vavanuna va nga hi va ka makabye. Loyi wa nhondzo i no chadha, afa na a nga hi na n’wana, a sati wakwe a sala a tekwa hi makabye wakwe.
26 Zvi no maha lezvo ka loyi wa wumbiri ni loyi wa wunharu kala vontlhe va 7 va mbhela.
27 Hi magumo a wasati yenawu i nofa.
28 Makunu, kuvhukeni ka vafileko i tava sati wa mani ka lava va 7? Hakuva i vile sati wa vona vontlhe.”
29 Jesu i no va hlamula, aku: “Mu lahlekile hi lezvi mu nga yi tiviko Mitsalo ne ntamu wa Nungungulu;
30 hakuva kuvhukeni ka vafileko, ne vavanuna, ne vavasati va nga ta chadha, kanilezvi va ta fana ni tingilozi le tilweni.
31 Xungetano hi kuvhuka ka vafileko, a mu gondzangi lezvi Nungungulu a nga mu byela, aku:
32 ‘Ndzi Nungungulu wa Abrahama, ni Nungungulu wa Isaka, ni Nungungulu wa Jakobe’? A hi Nungungulu wa vafileko, kanilezvi wa vahanyako.”
33 A cikhati leci a citshungu ci ngazwa lezvo, ci no hlamala nguvhu hi magondzisela yakwe.
34 Loku a vaFarisi va zwile lezvaku i konile vaSadhusi, va nota kakwe na va hi ntlawa.
35 A mun’we wabye a nga hi mugondzisi wa Nayo, i no mu ringa hi ku mu wutisa, aku:
36 “Mugondzisi, hi wihi a nayo wa hombe ka yontlhe Nayweni wa Mosi?”
37 Aku kakwe: “‘Randza Jehovha Nungungulu wa wena hi mbilu ya wena yontlhe, ni muhefemulo* wa wena wontlhe, ni kupima ka wena kontlhe.’
38 Lowu hi wona a nayo wa hombe ni wo ranga ka yontlhe.
39 A wa wumbiri wo fana nawo hi lowu: ‘Randza muakelani wa wena a ku fana ni lezvi u ti randzisako zvona.’
40 A milayo leyi ya yimbiri hi yona tshinya ga Nayo wontlhe ni Vaphrofeti.”
41 Na vaFarisi va ha hi zvin’we, Jesu i no va wutisa, aku:
42 “Mu alakanya yini hi Kristu? I n’wana wa mani?” Vaku: “I n’wana wa Dhavhidha.”
43 Jesu a va wutisa, aku: “Makunu, hikuyini Dhavhidha hi ku pimiselwa hi moya a mu vitanako Hosi, aku:
44 ‘Jehovha i te ngalo ka Hosi ya mina: “Tshama reveni ga mina ga cinene kala ndzi veka valala va wena lahasi ka mikondzo ya wena”’?
45 Loku Dhavhidha a mu vitana ku i Hosi, zvi mahisa kuyini ku tlhela ava n’wana wakwe ke?”
46 I hava a nga zvi kota ku mu hlamula. Kusukela ka siku lego, a nga kona a nga tiya ku mu wutisa nchumu kambe.
Mitlhamuselo ya lahasi
^ Kutani: “va nga tshamile mezeni”.
^ Kutani: “lotela”.
^ Kutani: “Zvi lulamile”.
^ Cingerengere ca Roma ca prata. Wona Tlhamuselo wa magezu ya Bhibhiliya.
^ Kutani: “teka”.
^ Wona Tlhamuselo wa magezu ya Bhibhiliya.
