Matewu 24:1-51
-
CIKOMBISO CA LEZVAKU KRISTU I KONA CIKARI KA HINA (1-51)
24 Laha Jesu a nga kari a huma lomu tempeleni, a vapizani va no tshinela kakwe va mu komba tempeli.
2 Hikwalaho, i te ngalo kabye: “Ma zvi wona zvontlhe lezvi ke? Ndza tiyisa ka n’wina ndziku: Laha a ku na ribye gi to siyiwa hehla ka gin’wani, wontlhe ma ta khungumulwa.”
3 Na a tshamile Citsungeni ca maOlivha, a vapizani va nota kakwe na va hi voce va taku: “Hi nga hi byela: Kasi a zvilo lezvi zvi ta maheka rini? Kona ci tava cihi a cikombiso ca lezvaku u kona cikari ka hina* ni ca kugumesa ka tiko?”*
4 Jesu i no va hlamula, aku: “Ti woneleni kasi mu nga hambukisiwi hi munhu,
5 hakuva a votala va tata hi vito ga mina va taku: ‘Hi mina Kristu’, va hambukisa votala.
6 Mu tazwa guwa ga tiyimpi ni mahungu ya tiyimpi. Mu nga dzuki, hakuva a zvilo lezvi zvi fanele ku maheka kanilezvi a hi kona kugumesa.
7 “Hakuva a tiko gi ta vhukela tiko, ni mufumo wu vhukela mufumo, ku tava ni tindlala ni kutsekatseka ka misava ka matshamu yo hambanahambana.
8 Zvontlhe lezvi masangulo basi ya kuxaniseka.
9 “A vanhu va ta mu xanisa va tlhela va mu daya. Mu ta vengiwa hi matiko wontlhe hi kota ya vito ga mina.
10 A votala va ta mbhelelwa hi kukholwa, va nyikelana va tlhela va vengana.
11 Ku ta humelela vaphrofeti vanyingi va mawunwa va hambukisa votala;
12 a lirandzo la vanhu vo tala li ta titimela hi kota ya kuengeteleka ka wubihi.
13 Kanilezvi loyi a timiselako kala magumo hi yena a to ponisiwa.
14 A mahungu lawa ya ma nene ya Mufumo ma ta chumayelwa misaveni yontlhe kasi mava wukustumunyu ka matiko wontlhe, hi kona ku to chikela a kugumesa.
15 “Hikwalaho, loku mu wona a cilo co nyenyeza leci ci hahlulako ni ku wonhetela na ci yimile wutshan’wini go basa, kota lezvi zvi wulilweko hi muphrofeti Dhaniyeli (a mugondzi i wa zame ku zvi zwisisa),
16 lava va nga le Judhiya a va tsutsumele zvitsungeni.
17 Loyi a nga hehla ka yindlu a nga chiki a ya teka lezvi zvi nga lomu ndlwini yakwe,
18 ni loyi a nga masin’wini a nga tlheli a ya teka nguwo yakwe.
19 Va xanisekile a vavasati lava va to kumiwa hi masiku lawo na va hi ni tinyimba ni lava va to kumiwa na va an’wisa!
20 Simamani ku khongelela lezvaku a masiku lawo ya kutsutsuma ma nga chikeli hi nguva ya cirami ne hi siku ga sabhadho;
21 hakuva ku tava ni kuxaniseka ka hombe ka ku a ku se tshuka ku humelela kusukela kuvangiweni ka tiko kala lezvi, niku ku nga ta ha humelela kambe.
22 Kunene, loku a masiku lawo ma wa nga komiswangi, na ku nga poni munhu; kanilezvi hi kota ya vahlawulilweko a masiku lawo ma ta komisiwa.
23 “Makunu loku a wokari aku ka n’wina: ‘Hi loyi Kristu!’ kutani ku: ‘Hi gaya!’ mu nga kholwi.
24 Hakuva ku ta humelela vaKristu va mawunwa ni vaphrofeti va mawunwa; va ta maha zviwoniso zva hombe ni zvihlamaliso kasi va kanganyisa hambu ni vahlawulilweko, loku zvi koteka.
25 Ndza mu tlharihisa na zvi nga se maheka.
26 Hikwalaho loku a vanhu vaku: ‘I le ciwuleni’, mu ngayi; kutani ku: ‘I lomu ndlwini’, mu nga kholwi.
27 Hakuva a ku fana ni lezvi a kuhatima loku ku humako hi mutsuwuka-gambo ku woningako kala mupela-gambo, a cikombiso ca lezvaku a N’wana wa munhu i kona cikari ka n’wina* conawu ci tava tano.
28 Ni kwihi laha ku nga ni cirumbi, a magama ma ta hlengeletana laho.
29 “Zvalezvi ku to mbhela a kuxaniseka ka masiku lawo, a gambo gi ta pfhupeliswa, ni hweti yi nga ta woninga; a tinyeleti ti tawa hi le tilweni, ni mintamu ya le tilweni yi ta tsekatsekiswa.
30 Andzhako ka lezvo ku ta woneka ciwoniso ca N’wana wa munhu le tilweni. A vanhu va tixaka tontlhe ta laha misaveni va ta tiba zvifuva hi kukarateka. Va ta wona a N’wana wa munhu na ata hi marefu ya tilo hi ntamu ni kungangamela ka hombe.
31 I taba mpundzu wo vhuma nguvhu, a ruma tingilozi takwe lezvaku ti ya hlengeleta a vahlawulilweko ka mune wa matlhelo ya misava* kusukela magemeta-musi ya tilo kala ka man’wani magemeta-musi.
32 “Gondzani ka mufananiso lowu wa nkuwu: Neti a zvidhavana* zva wona zvi nyuka zvi hluka matluka, ma zvi tiva lezvaku a cimumu ci chikele.
33 Na n’winawu, loku mu wona a zvilo lezvi zvontlhe, zvi tiveni lezvaku a N’wana wa munhu i laha kusuhani; i kwalaha tinyangweni.
34 Ndza tiyisa ka n’wina, ndziku: A cizukulwana leci ci nga ta hundza na zvi nga se maheka zvontlhe a zvilo lezvi.
35 A tilo ni misava zvi ta hundza kanilezvi a timhaka ta mina ti nga ta hundza.
36 “Xungetano hi siku lego ni cikhati ca kona a ku na munhu a zvi tivako, ne tingilozi le tilweni ne hambu N’wana, zvo tiviwa hi Papayi yece.
37 Hakuva a ku fana ni lezvi zvi nga maheka masikwini ya Nowa, zvi ta mahisa zvezvo a cikhati leci a N’wana wa munhu a tova kona cikari ka n’wina.*
38 A ku fana ni lezvi zvi nga maheka masikwini lawo na yi nga se chikela Ndambi, a vanhu va waga, vanwa, va chadha, kala siku legi Nowa a nga nghena hi gona lomu tarwini,*
39 a va chelangi kota kala a Ndambi yita yi ta va kukuleta vontlhe, zvi ta mahisa zvezvo a cikhati leci a N’wana wa munhu a tova kona cikari ka n’wina.
40 A vavanuna vambiri va tava masin’wini; a mun’we i ta tekiwa, loyi mun’wani a tsikiwa.
41 A vavasati vambiri va tava cigayweni; a mun’we i ta tekiwa, loyi mun’wani a tsikiwa.
42 Hikwalaho, tshamani na mu rindzele hakuva a mu gi tivi a siku legi a Hosi ya n’wina yi tota hi gona.
43 “Kanilezvi tivani lezvi: Loku a n’winyi wa muti i wa no ci tiva a cikhati* leci a khamba gi nga wa tata hi cona, na a tshamile a rindzela; na a nga tsikangi a yindlu yakwe yi pandziwa.
44 Hikwalaho, n’winawu tshamani na mu longile hakuva a N’wana wa munhu wata hi cikhati mu nga ci alakanyiko.
45 “Himani loyi hakunene a nga nandza go tsumbeka ni go tlhariha legi a n’winyi wa gona a gi yimisileko hehla ka malandza yakwe, kasi ku ma nyika zvakuga hi cikhati ca kona ke?
46 Gi katekile a nandza lego loku a n’winyi wa gona a wuya a ta gi kuma na gi maha lezvo!
47 Ndza tiyisa ka n’wina, ndziku: I ta gi nyika ntiro wa ku wonelela zvontlhe a nga nazvo.
48 “Kanilezvi loku a nandza lego go biha go tshuka gi ti byela lezvi mbilwini ya gona: ‘A n’winyi wa mina wa hlwela’,
49 gi sangula kuba malandza-kulobye, giga ni kunwa zvin’we ni zvidhakwa,
50 a n’winyi wa nandza lego i ta wuya hi siku legi gi nga gi rindzelangiko ni cikhati leci gi nga ci tiviko,
51 a ta gi tsayisa zva xapi, a gi nyika ciavelo ca gona zvin’we ni vakanganyisi. Kwaseyo gi ta rila gi getsela* matino.
Mitlhamuselo ya lahasi
^ Wona laha ka ku: “U kona” ka Tlhamuselo wa magezu ya Bhibhiliya.
^ Kutani: “ka nguva”. Wona laha ka ku: “Nguva” ka Tlhamuselo wa magezu ya Bhibhiliya.
^ Wona laha ka ku: “U kona” ka Tlhamuselo wa magezu ya Bhibhiliya.
^ Hi kukongoma: “ka mune wa mimoya”.
^ Kutani: “zvidzavana”.
^ Wona laha ka ku: “U kona” ka Tlhamuselo wa magezu ya Bhibhiliya.
^ Hi kukongoma: “bhokiseni”. A taru lego gi wa hi ngalava ya hombe yo fana ni bhokisa.
^ Kutani: “cikhati ca wusiku”.
^ Kutani: “lotela”.
