Matewu 26:1-75
-
A vapristi va xuxa cikungo ca ku daya Jesu (1-5)
-
Jesu a cheliwa mafura yo nuhela (6-13)
-
Phasika go gumesa ni kunyikelwa kakwe (14-25)
-
A yimisa a Cilalelo ca Hosi (26-30)
-
Jesu a phrofeta lezvaku Pedro i ta mu kaneta (31-35)
-
Jesu a khongela le Getsemane (36-46)
-
Jesu a khon’wa (47-56)
-
Jesu a thethisiwa hi Tribhunali ya Hombe (57-68)
-
Pedro a kaneta Jesu (69-75)
26 Loku Jesu a mbhetile ku wula a timhaka leti tontlhe, i no byela vapizani vakwe, aku:
2 “Ma zvi tiva lezvaku ku no sala masiku mambiri kasi ku mahiwa Phasika, makunu a N’wana wa munhu i ta nyikelwa lezvaku a dawa laha mhandzeni.”
3 A vapristi lava va tihosana ni madhota va no hlengeletana mutini wa mupristi wa hombe a nga vitaniwa ku hi Kayafasi,
4 va luka mano ya ku khoma Jesu va mu daya.
5 Kanilezvi va waku: “Hi nga mu khomeni laha festeni, kasi ku nga vhuki vhilinganya cikari ka vanhu.”
6 A cikhati leci Jesu a nga hi Bhetaniya, mutini wa Simoni loyi wa hlokonho,
7 ku nota kakwe a wasati ni botori ga alabhasteri gi nga hi ni mafura yo nuhela yo dhura nguvhu, a ta ma chulula hlokweni yakwe na a kari aga.*
8 Laha va nga wona lezvo, a vapizani va no swireka, vaku: “Ma xakelelwa yini?
9 Phela a mafura lawa na ma xavisilwe hi mali yo tala kasi yi nyikwa zvisiwana.”
10 A cikhati leci Jesu a nga tiva lezvo, i te ngalo kabye: “Mu mu karatela yini a wasati loyi? I ndzi mahele zvilo zva zvi nene.
11 Hakuva a zvisiwana zvi na n’wina contlhe cikhati, kanilezvi a hi contlhe cikhati mu tova na mina.
12 I chelile mafura lawa yo nuhela mirini wa mina kasi ku longisela kulahliwa ka mina.
13 Ndza tiyisa ka n’wina, ndziku: Ni kwihi laha ku to chumayelwa a mahungu lawa ya ma nene laha misaveni, lezvi zvi mahilweko hi wasati loyi zvonawu zvi ta hlawutelwa kasi ku mu alakanya hi zvona.”
14 Andzhako ka lezvo, Judhasi Iskariyoti, a mun’we wa lava va 12, i noya ka vapristi lava va tihosana,
15 a yaku: “Mu ta ndzi nyika yini loku ndzi mu nyikela ka n’wina ke?” Va no mu tsumbisa a 30 wa macheleni.
16 A kusukela kwalaho, i no lavetela cikhati ca ci nene ca ku mu nyikela hi cona.
17 Ka siku go sangula ga Tipawa to kala Livrina, a vapizani va nota ka Jesu, va taku: “U lava ku hi ya ku longiselela kwihi a Phasika?”
18 Aku kabye: “Fambani ka manyani le dhoropeni mu ya mu byela lezvi: ‘Mugondzisi i ngalo: “A cikhati ca mina ci chikele; ndzi taga Phasika ni vapizani va mina mutini wa wena.”’”
19 Hikwalaho, a vapizani va no maha zvalezvi Jesu a nga va leletela, va longisela Phasika.
20 A cikhati leci gi nga phuma, Jesu i no tshama mezeni ni vapizani vakwe va 12.
21 Na va kari vaga, i te ngalo kabye: “Ndza tiyisa ka n’wina, ndziku: A mun’we wa n’wina laha i ta ndzi xavisa.”
22 Na va bayisekile nguvhu hi kota ya lezvo, a mun’we ni mun’wani wabye i no mu wutisa, aku: “Hosi, hi mina ke?”
23 I no va hlamula, aku: “Loyi a nghenisako canja gakwe khatigin’we na mina lomu ngelweni hi yena a to ndzi xavisa.
24 Lisine lezvaku a N’wana wa munhu wa famba, kota lezvi zvi tsalilweko xungetano hi yena, kanilezvi khombo ka loyi a to xavisa N’wana wa munhu! Na zvi vile chukwana ka yena loku i wa nga pswaliwangi.”
25 Judhasi, loyi a nga lava ku mu nyikela, i no hlamula, aku: “Rabi, hi mina ke?” Jesu aku kakwe: “U wula zvona.”
26 Na va haga, Jesu i no teka pawa, a yi katekisa, a khema a nyika vapizani vakwe, aku kabye: “Tekani muga. A pawa leyi i miri wa mina.”
27 I no teka kopo ya vhinyo, a bonga a va nyika, aku: “Nwanani hi yona n’wentlheni,
28 hakuva a vhinyo leyi i ‘nkhata wa mina wa civhumelwano’, lowu wu to halatiwa kasi ku tsetselela a zviwonho zva votala.
29 Kanilezvi ndza wula ka n’wina, ndziku: Ndzi nga ta hanwa kambe a vhinyo kala siku legi ndzi tonwa leyi ya yiswa na ndzi hi na n’wina Mufun’weni wa Papayi wa mina.”
30 Hi kugumesa, na va mbhetile ku yimbelela tisimu ta kudhumisa, va noya Citsungeni ca maOlivha.
31 Makunu Jesu i te ngalo kabye: “N’wina n’wentlhe mu ta ndzi tsika a wusiku legi, hakuva ku tsalilwe ku ngalo: ‘Ndzi taba murisi, ni tiyivhu ti ta hangalaka.’
32 Hambulezvo, loku ndzi vhuxilwe hi ka vafileko, ndzi ta ranga hi mina ndzi chikela Galileya.”
33 Kanilezvi Pedro i no mu hlamula, aku: “Hambu loku vontlhe lava vo ku tsika, mina ndzi nga ta ku tsika!”
34 Jesu aku kakwe: “Ndza tiyisa ka wena ndziku: Ka wusiku legi, na wu nga seba nkuku, u ta ndzi kaneta kunharu.”
35 Pedro aku kakwe: “Hambu loku zvi lava ku ndzifa na wena, cima ndzi nga ta ku kaneta.” A vapizani vontlhe lava van’wani va no wula zvalezvo.
36 Andzhako ka lezvo, Jesu i no famba navo wutshan’wini gi vitaniwako ku i Getsemane, aku ka vapizani vakwe: “Tshamani laha, ndza haya lahaya ndzi ya khongela.”
37 I no teka Pedro zvin’we ni vana vambiri va Zabhedhi a famba navo, a sangula ku karateka nguvhu.
38 Aku kabye: “Ndzafa hi kukarateka.* Salani laha mu rindzela zvin’we na mina.”
39 I no fambanyana phambeni a yawa hi nghohe, a khongela, aku: “Papayi, loku zvi koteka, a kopo leyi a yi suke ka mina. Hambulezvo, ku nga maheki kurandza ka mina, kanilezvi a ku maheke kurandza ka wena.”
40 I no wuya ka vapizani a ta va kuma na va etlele, aku ka Pedro: “A mu zvi koti ne ku rindzela hora yin’we zvin’we na mina ke?
41 Tshamani na mu rindzele, mu khongela contlhe cikhati kasi mu nga weli kuringweni. Kunene, a moya wa zvi lava, kanilezvi a nyama* a yi na ntamu.”
42 I no famba kambe hi khati ga wumbiri a ya khongela, aku: “Papayi, loku zvi nga koteki ku a kopo leyi yi hundza na ndzi nga nwangi, a ku maheke kurandza ka wena.”
43 I no wuya kambe a ta va kuma na va etlele hakuva a matihlo yabye ma wa bindza hi wurongo.
44 I no va siya a famba kambe a ya khongela hi khati ga wunharu, a wula zvalezvi zva zvin’we.
45 Andzhako ka lezvo, i no wuya ka vapizani, a taku kabye: “Ka cikhati co kota leci, n’wina mo etlela, mu humula! Phela a cikhati ca ku a N’wana wa munhu a nyikelwa mandleni ya vawonhi ci tshinele.
46 Sukani hi famba. Loyi a ndzi nyikelako i laha kusuhani.”
47 Na a ha wulawula, Judhasi, a mun’we wa lava va 12, i no chikela ni citshungu ca hombe ci nga hi ni zvipadha ni migomba, ci nga rumilwe hi vapristi lava va tihosana ni madhota.
48 Loyi a nga mu nyikela i wa va nyikile cikombiso, aku: “Loyi ndzi to mu pswopswa hi yaloye, mu khomeni.”
49 I no kongoma Jesu, a yaku kakwe: “Xewe Rabi!” a mu pswopswa.
50 Kanilezvi Jesu aku kakwe: “Munghana, u tela yini laha?” Va no tshinela va khoma Jesu va famba naye.
51 Zvalezvo a mun’we wa lava va nga hi na Jesu i no hlomula cipadha cakwe aba nandza ga mupristi wa hombe, a gi tsema ndleve.
52 Kanilezvi Jesu aku kakwe: “Tlhelisa cipadha ca wena lomu ci tshamako kona, hakuva vontlhe lava va khomako cipadha va ta dawa hi cipadha.
53 U alakanya ku ndzo tsandzeka ku kombela Papayi wa mina lezvaku a ndzi rumelela zvalezvi a 12 wa mabutho* ya tingilozi ke?
54 Loku ndzo maha lezvo, yi ta tatisekisa kuyini a Mitsalo leyi yi nge zvi fanele ku mahekisa lezvi ke?”
55 Jesu aku ka citshungu: “Mu ndzi tela ni zvipadha ni migomba kasi ku ta ndzi khoma, ndzova khamba ke? Siku ni siku ndzi wa tshama tempeleni ndzi gondzisa, kanilezvi a mu ndzi khomangi.
56 Hambulezvo, zvontlhe lezvi zvi maheka kasi ku tatiseka a mitsalo ya vaphrofeti.” Makunu a vapizani vontlhe va no mu tsika va tsutsuma.
57 Lava va ngata va ta khoma Jesu va no famba naye ka Kayafasi, a mupristi wa hombe, laha a vatsali ni madhota va nga tlhangene kona.
58 Kanilezvi Pedro i no simama ku mu landzela hi le kule, kala mutini wa mupristi wa hombe. Andzhako ka loku a nghenile, i no ya tshama ni zvitiri kasi ku wona lezvi zvi nga lava ku maheka.
59 A vapristi lava va tihosana ni yontlhe Tribhunali ya Hombe va no lavetela a wukustumunyu ga mawunwa ga ku kona Jesu kasi va mu daya.
60 Kanilezvi a va gi kumangi, hambu lezvi ku nga humelela vakustumunyu vo tala va mawunwa. Hi magumo ku no humelela vambiri,
61 vaku: “A wanuna loyi i te: ‘Ndzi nga hahlula a tempeli ya Nungungulu ndzi tlhela ndzi yi aka hi masiku manharu.’”
62 Laha a mupristi wa hombe a ngazwa lezvo, i no suka a yima, aku kakwe: “A wu wuli nchumu? A wu zvizwi lezvi a vavanuna lava va ku kecarako hi zvona ke?”
63 Kanilezvi Jesu i no miyela. Hikwalaho a mupristi wa hombe i te ngalo kakwe: “Ndza ku hlambanyisa hi Nungungulu a hanyako lezvaku u hi byela a ku hakunene hi wena Kristu a N’wana wa Nungungulu ke!”
64 Jesu aku kakwe: “U wula zvona. Kanilezvi ndza wula ka n’wina, ndziku: Kusukela lezvi mu ta wona N’wana wa munhu na a tshamile reveni ga cinene ga ntamu na ata hi marefu ya tilo.”
65 Zvalezvo, a mupristi wa hombe i no handzula tinguwo takwe, aku: “I rukatele! Ha ha va lavela yini a vakustumunyu? Mu mu zwile na a rukatela.
66 Mu zvi wonisa kuyini?” Va no hlamula, vaku: “I wa dawe!”
67 Va no mu phelela lomu nghoheni, va muba zvibhakela. A van’wani va muba tipama,
68 vaku: “Hi nga hi phrofetela Kristu. Himani a nga kuba?”
69 Na Pedro a tshamile lahandle laha mutini, ku nota citiri ca nhanyana ci taku kakwe: “Wenawu u wa hi na Jesu wa le Galileya!”
70 Kanilezvi i no kaneta mahlweni ka vontlhe, aku: “A ndzi zvi tivi lezvi u zvi wulako.”
71 Loku a sukile laho aya nyangweni ya muti, i no woniwa hi mun’wani nhanyana, aku ka lava va nga hi laho: “A wanuna loyi i wa hi na Jesu wa le Nazareta.”
72 I no kaneta kambe, a hlambanya aku: “A ndzi mu tivi wanuna loye!”
73 Andzhako ka cikhatana, lava va nga yimile laho va no tshinela ka Pedro, vaku: “Hakunene wenawu u mun’we wabye, hakuva a wulawulela ga wena ga ku kombisa.”
74 I no sangula ku rukatela a tlhela a hlambanya, aku: “A ndzi mu tivi wanuna loye!” Zvalezvo a nkuku wu noba.
75 Pedro i no alakanya lezvi Jesu a nga wulile, zvaku: “Na wu nga seba nkuku, u ta ndzi kaneta kunharu.” I no huma a ya rila nguvhu.
Mitlhamuselo ya lahasi
^ Kutani: “na a tshamile mezeni”.
^ Kutani: “A muhefemulo wa mina wa karateka”.
^ Ku wuliwa tshamela ga munhu ga kuva muwonhi, na a nga mbhelelangi.
^ Kutani: “12 wa zvikwata”. A cikwata cin’we ci wa hi ni cipimo ca 4000 kala 6000 wa masochwa. Laha gi tirisilwe kasi ku komba a ntsengo wa tsandza-vahlayi.
